1-3. Eaha te orama ta Petero i ite, e no te aha mea faufaa ia ite tatou i te auraa?

 I TE matahiti 36, e rave rahi mahana to Petero faaearaa ia Simona ra i Iopa. Te ora ra Simona i pihai iho i te miti, e taata rapaau iri animara o ˈna. E manaˈo oti noa to te ati Iuda no te mau taata e rave ra i taua ohipa, e aita atoa ratou i farii e faaea i ǒ tera taata. Aita râ Petero i manaˈo mai ia ratou. I to Petero haereraa i nia i te tafare no te pure, ua tauturu Iehova ia ˈna ia taa e eita iho â o ˈna e maitiiti i te taata. a Ua haapii Iehova ia ˈna i te hoê haapiiraa faufaa.

² A pure ai Petero, faaite atura te Atua ia ˈna i te hoê ahu lino rahi e pou mai ra mai te ra ˈi mai e ua rau te animara i nia iho. E mau animara teie eita e fariihia ia amu te ati Iuda e no te hiˈo noa ˈtu i teie mau animara e huru ê roa te ati Iuda. Ua parauhia ia Petero ia tupai e ia amu, pahono atura o ˈna: “Eiaha, no te mea aita vau i amu aˈenei i te mea viivii.” E toru taime to te Atua parauraa ia ˈna: “A faaea i te parau e mea viivii ta te Atua i tamâ.” (Ohi. 10:14-16) Ua painu roa Petero, ua tauturu râ Iehova ia ˈna ia taa eaha te auraa o ta ˈna i ite.

³ Eaha te auraa o te orama a Petero? Mea faufaa roa ia ite tatou i te auraa, e faaite mai hoi te reira i te huru hiˈoraa a Iehova i te mau taata atoa. Ei Kerisetiano mau, eita ta tatou e nehenehe e faataa maitai i te parau o te Faatereraa arii a te Atua mai te peu eita tatou e hiˈo i te taata mai ta te Atua e hiˈo ra ia ratou. No te taa i te orama a Petero, e hiˈo mai tatou eaha tei tupu na mua ˈtu e i muri iho i tera tupuraa.

4, 5. O vai o Korenelio, e eaha tei tupu a pure ai oia?

⁴ Aita Petero i ite e i te mahana na mua ˈtu i Kaisarea, fatata 50  kilometera mai Iopa mai. E ua ite atoa te hoê taata o Korenelio te iˈoa i te hoê orama no ǒ mai i te Atua ra. E taata ‘haamori i te Atua’ o Korenelio te raatira faehau Roma. b E metua tane hiˈoraa maitai oia o te ‘mǎtaˈu i te Atua e to ˈna atoa utuafare taatoa.’ E ere Korenelio i te ati Iuda tei farii i te haapaoraa ati Iuda, ei taata nunaa ěê peritome-ore-hia râ oia. Ua faaite oia i te aumihi i te mau ati Iuda ma te tauturu ia ratou i te pae materia. Ma te aau tae ua “taparuparu noa [teie taata] i te Atua.”—Ohi. 10:2.

⁵ I te hora toru i te avatea o tera mahana, te pure ra Korenelio a ite orama ˈi oia i te hoê melahi o te parau ia ˈna: “Ua tae ta oe mau pure i te Atua ra e ua haamanaˈo oia i ta oe mau ô aroha hamani maitai.” (Ohi. 10:4) Ua parau atoa te melahi ia ˈna ia tono i te tahi mau tane no te tii atu ia Petero. O Korenelio te taata matamua i roto i te nunaa ěê peritome-ore-hia o tei riro mai ei Kerisetiano.

6, 7. (1) A horoa i te hoê tupuraa o te faaite ra e pahono te Atua i te pure a te feia aau tae o te hinaaro ra e ite o vai o ˈna. (2) Eaha ta teie tupuraa e faaite mai ra?

⁶ I teie mahana, e pahono anei te Atua i te mau aniraa a te feia aau tae o te hinaaro ra e ite o vai o ˈna? Teie te hiˈoraa o te hoê vahine no Albanie, o tei farii i Te Pare Tiairaa e itehia ˈi te tuhaa e nafea e haapii i te tamarii. c Ua parau oia i te hoê Ite o te haere mai e farerei ia ˈna: “Aita i maoro aˈenei ua pure au i te Atua no te tauturu mai ia haapii i ta ˈu na tamahine, e ua tono mai oia ia oe. Ua haaputapû roa oe i to ˈu aau, no te mea tera iho â ta ˈu i hinaaro.” Haamata aˈera teie vahine e ta ˈna na tamahine i te haapii i te Bibilia e i muri iho, ua apiti atoa mai te tane.

⁷ E ite-pinepine-hia te mau tupuraa mai teie ati aˈe te fenua, eita ïa tatou e maere! Eaha ta te reira e faaite mai? A tahi, te pahono ra Iehova i te mau pure a te feia aau  tae o te hinaaro ra e ite o vai o ˈna. (Arii 1, 8:41-43; Sal. 65:2) A piti, te aratai ra te mau melahi ia tatou i roto i te ohipa pororaa.—Apo. 14:6, 7.

8, 9. Eaha ta te Atua i faaite ia Petero, e ua aha o ˈna?

⁸ Te ‘feruri noa ra Petero’ i te auraa o te orama ta ˈna i ite a tae mai ai te mau taata a Korenelio i te fare o Simona. (Ohi. 10:17) A toru taime to Petero patoiraa e amu i te maa viivii ia au i te Ture, e farii anei oia e pee ia ratou no te haere i te fare o te hoê taata e ere i te ati Iuda? Ua faaohipa te Atua i to ˈna varua no te faaite ia Petero eaha te tia ia ˈna ia rave. Parauhia ˈtura ia Petero: “E toru taata te ani mai ra ia oe. A pou e a haere na muri ia ratou, eiaha roa oe e feaa, no te mea na ˈu i tono mai ia ratou.” (Ohi. 10:19, 20) Ua tauturu te orama ta Petero i ite ia pee i te aratairaa a te varua moˈa o te Atua.

⁹ I to Petero iteraa e na te hoê melahi i faaue ia Korenelio ia tono atu i teie mau taata, ua titau Petero ia ratou i roto i te fare “e parau atura ia faaea mai.” (Ohi. 10:23a) Ua haamata aˈena Petero i te taui i to ˈna huru feruriraa i to ˈna taaraa eaha to te Atua hinaaro.

10. Nafea Iehova i te aratairaa i to ˈna nunaa, e eaha te mau uiraa ta tatou e uiui?

¹⁰ I teie mahana, te aratai mǎrû noa ra Iehova i to ˈna nunaa. (Mas. 4:18) Te faaohipa ra Iehova i to ˈna varua moˈa no te aratai i “te tavini haapao maitai e te paari.” (Mat. 24:45) I te tahi taime, e fanaˈo tatou i te mau faatanotanoraa no te taa ˈtu â i te Parau a te Atua aore ra i te mau tauiraa i roto i te faanahonahoraa. Mea au ia uiui ia tatou iho: ‘Te hinaaro ra anei au e taui i to ˈu huru feruriraa? Te pee maite ra anei au i te aratairaa a te varua o te Atua?’

11, 12. Eaha ta Petero i rave i to ˈna tapaeraa ˈtu i Kaisarea, e eaha ta ˈna i haapii mai?

¹¹ I te mahana i muri iho, ua haere Petero i Kaisarea e na toru vea a Korenelio apitihia e e ‘ono taeae ati Iuda’ no Iopa. (Ohi. 11:12) A tiai ai Korenelio ia Petero, ua haaputuputu oia “i to ˈna mau fetii e to ˈna mau hoa rahi,” e nunaa ěê anaˈe ratou. (Ohi. 10:24) I to ˈna tapaeraa ˈtu, ua rave Petero i te hoê ohipa ta ˈna i ore i manaˈo: Ua tomo oia i roto i te fare o te hoê taata nunaa ěê peritome-ore-hia! Ua faataa Petero: “Ua ite maitai outou e e opanihia te hoê ati Iuda ia amuimui aore ra ia tapiri atu i te hoê taata ê. Ua faaite mai râ te Atua ia ˈu e eiaha vau e parau faahou e mea viivii te taata.” (Ohi. 10:28) Ua taa ia Petero te auraa o ta te Atua i faaite ia ˈna i nia i te tafare, e ere noa i te haapiiraa no nia i te maa ta ˈna e nehenehe e amu, ia ore atoa râ o ˈna ia “parau faahou e mea viivii te taata [oia atoa te nunaa ěê].”

 ¹² Ua anaanatae pauroa te taata i te fare o Korenelio i ta Petero e parau. Ua faataa Korenelio: “Tei ǒ nei matou pauroa i mua i te aro o te Atua no te faaroo i te mau mea atoa ta Iehova i faaue ia oe ia parau.” (Ohi. 10:33) Mai te peu o outou aˈe Petero, e oaoa outou i te faaroo i tera huru paraparau! Na ô atura Petero: “I teie nei, ua taa ˈtura ia ˈu e ore te Atua e maitiiti i te taata, i roto râ i te mau nunaa atoa, e farii oia i te taata o te mǎtaˈu ia ˈna e o te rave i te mea tia.” (Ohi. 10:34, 35) Ua taa ia Petero i to te Atua manaˈo no nia i te taata, eita oia e haapao noa i te peu tumu, nunaa aore ra iri. Faataa maitai atura Petero ia ratou no nia i te taviniraa a Iesu, to ˈna poheraa e to ˈna tia-faahou-raa.

13, 14. (1) Eaha tei tupu i to te feia nunaa ěê riroraa mai ei Kerisetiano? (2) No te aha eiaha tatou e haava i te huru rapaeau o te taata?

¹³ E tupuraa faahiahia tei itehia: “Te paraparau noa ra Petero,” tae maira te varua moˈa i nia i “te taata o te mau nunaa ěê.” (Ohi. 10:44, 45) I roto i te Bibilia, teie noa te faahitiraa i niniihia ˈi te varua moˈa hou te bapetizoraa. Ua ite Petero e ua farii te Atua ia ratou ei tavini na ˈna, e ‘faaue atura Petero i tera nunaa ěê ia bapetizohia ratou.’ (Ohi. 10:48) I to te feia nunaa ěê riroraa mai ei Kerisetiano, te faataa ra te reira e ua hope te taime i faaite ai te Atua i te farii maitai i nia noa i te ati Iuda. (Dan. 9:24-27) I tera taime, ua faaohipa Petero te toru o te taviri “o te Faatereraa arii.” (Mat. 16:19) Maoti teie taviri, i nehenehe atoa ˈi te feia nunaa ěê peritome-ore-hia e riro mai ei Kerisetiano faatavaihia e te varua moˈa.

¹⁴ No reira, ia poro tatou i te parau apî oaoa i teie mahana, e farii tatou e aita “te Atua e maitiiti i te taata.” (Roma 2:11) To ˈna hinaaro, “ia ora mai te mau huru taata atoa.” (Tim. 1, 2:4) Eiaha ïa tatou e haava i te huru rapaeau o te taata. Ua faaue hoi Iesu ia tatou ia poro i te taata atoa no nia i te Faatereraa arii a te Atua, noa ˈtu to ratou nunaa, peu tumu, huru rapaeau aore ra haapaoraa.

15, 16. No te aha te tahi ati Iuda Kerisetiano i faaino ai ia Petero, e nafea oia i te faataaraa i te mau ohipa ta ˈna i rave?

¹⁵ Ua hinaaro mau â Petero e faataa i to ˈna mau taeae i Ierusalema eaha tei tupu. Ua ite aˈena râ ratou e ua farii te feia nunaa ěê peritome-ore-hia i “te poroi a te Atua,” no te mea i to Petero taeraa ˈtu i Ierusalema, te ‘faaino noa ra te feia e turu ra i te peritomeraa ia ˈna.’ Ua huru ê ratou no te mea ua ‘tomo oia i roto i te fare o te feia aita i peritomehia e ua tamaa o ˈna e o ratou.’ (Ohi. 11:1-3) To ratou fifi, e ere te riroraa mai te nunaa ěê ei Kerisetiano. Te hinaaro râ ratou ia pee maite te feia o te nunaa ěê i te Ture, oia hoi te peritomeraa, ia nehenehe Iehova e farii i  ta ratou haamoriraa. Te mea papu, mea fifi no teie mau ati Iuda Kerisetiano ia faarue i te Ture a Mose.

¹⁶ Nafea Petero i te faataaraa i te mau ohipa ta ˈna i rave? Ia au te Ohipa 11:4-16, ua horoa oia e maha haapapuraa e e tera to te Atua hinaaro: (1) Te orama ta ˈna i ite no ǒ mai i te Atua ra (Irava 4-10); (2) te faaueraa a te varua moˈa (Irava 11, 12); (3) te farereiraa te melahi ia Korenelio (Irava 13, 14) e (4) te niniiraa te varua moˈa i nia i te feia nunaa ěê. (Irava 15, 16) Ua faaoti Petero i ta ˈna oreroraa parau ma teie mau parau puai: “Inaha ua horoa te Atua ia ratou [te nunaa ěê] i taua ô ra [te varua moˈa] ta ˈna i horoa atoa mai ia matou [te ati Iuda], o tei tiaturi i te Fatu ra o Iesu Mesia, o vai ïa vau no te tapea i te Atua?”—Ohi. 11:17.

17, 18. (1) I muri aˈe i te oreroraa a Petero, eaha te faaotiraa ta te ati Iuda Kerisetiano i rave? (2) No te aha mea fifi paha ia vai hoê noa te amuiraa, e eaha te mau uiraa te tia ia tatou ia uiui?

¹⁷ I muri aˈe i to te ati Iuda Kerisetiano faarooraa i ta Petero i parau, ua rave ratou i te hoê faaotiraa. E haere anei ia ratou ia haapae i te manaˈo oti noa e ia farii i te feia nunaa ěê tei riro mai ei Kerisetiano? Te faataa ra te aamu: “I to ratou [te mau aposetolo e te tahi atu ati Iuda Kerisetiano] faarooraa i teie mau parau, faaea aˈera ratou i te mârô, e faahanahana ˈtura i te Atua, a na ô ai: ‘Ua horoa atoa ïa te Atua i te taata o te mau nunaa ěê i te ravea e tatarahapa e noaa ˈi ia ratou te ora.’” (Ohi. 11:18) Ma te na reira, ua vai noa te hoêraa i roto i te amuiraa.

¹⁸ I teie atoa mahana, mea fifi paha no te mau tavini a Iehova ia vai hoê noa, no te mea no roto mai ratou “i te mau nunaa e opu e reo atoa.” (Apo. 7:9) I roto e rave rahi amuiraa, e ite tatou e rave rau nunaa, peu tumu e tupuraa. No reira a uiui ia tatou iho: ‘Ua iriti ê anei au i te manaˈo oti noa i roto i to ˈu aau? I roto i teie nei ao, te manaˈo ra te taata e mea faufaa aˈe ratou i te tahi atu, ua ineine anei au i te haapae i tera huru feruriraa i nia i te mau taeae e tuahine?’ A haamanaˈo tera tei tupu no Petero tau matahiti a riro mai ai te feia nunaa ěê ei Kerisetiano. No  te manaˈo oti noa o vetahi, ‘faataa ê ihora Petero ia ˈna’ i te mau Kerisetiano nunaa ěê, e ua aˈo Paulo ia ˈna no tera huru feruriraa. (Gal. 2:11-14) E vai ara ïa tatou eiaha e faatupu i te manaˈo oti noa.

19. I Anetiohia, ua poro te ati Iuda Kerisetiano ia vai, e eaha tei itehia?

¹⁹ I muri iho i to ratou taaraa i te aratairaa a te Atua, ua haamata te mau Kerisetiano i te poro i te mau taata atoa. A tapao na, eaha tei tupu i Anetiohia no Suria. d E rave rahi ati Iuda e ora ra i tera oire, e mea au ore na ratou te feia e ere i te ati Iuda. Ua riro ïa Anetiohia ei tuhaa fenua maitai no te haamata i te pororaa. I ǒ, ua poro te ati Iuda tei riro mai ei pǐpǐ i te parau apî oaoa i “te feia e paraparau i te reo Heleni.” (Ohi. 11:20) E ere noa te feia reo Heleni ta ratou i poro, oia atoa râ i te feia nunaa ěê peritome-ore-hia. Ua haamaitai Iehova teie ohipa “e mea rahi tei tiaturi e tei pee i te Fatu.”—Ohi. 11:21.

20, 21. Nafea Baranaba i te faaiteraa i te aau faahaihai, e nafea tatou e nehenehe ai e pee i to ˈna haehaa i roto i ta tatou taviniraa?

²⁰ No te poro i te taata tei farii i te parau apî, ua tono te amuiraa no Ierusalema ia Baranaba i Anetiohia. Mea rahi te feia tei anaanatae, eita e maraa teie ohipa i te hoê noa taata. Ua tano ïa Baranaba i te ohiparaa e o Saulo, no te mea e riro mai Saulo ei aposetolo i tonohia ˈtu i te mau nunaa ěê. (Ohi. 9:15; Roma 1:5) Ua mǎtaˈu anei Baranaba e riro mai Saulo ei taata haapii maitai aˈe? Aita. Ua faaite Baranaba i te aau faahaihai e ua faˈi oia e titauhia ia farii o ˈna i te tauturu. Ua haere ïa o ˈna i Tareso no te tii ia Saulo no te tauturu ia ˈna i Anetiohia. Ua faaea raua i ǒ hoê matahiti no te faaitoito i te amuiraa.—Ohi. 11:22-26a.

²¹ Nafea tatou e nehenehe ai e pee i te aau faahaihai o Baranaba i roto i ta tatou taviniraa? Mea taa ê to tatou puai e aravihi i to te tahi atu. Ei hiˈoraa, mea ohie paha no tatou ia poro i tera e tera fare aore ra ma te faanaho-ore-hia, tera râ, mea fifi paha no tatou ia hoˈi faahou e farerei i te taata aore ra ia haamata i te hoê haapiiraa Bibilia. Mai te peu te hinaaro ra tatou e haamaitai atu â i ta tatou taviniraa, e nehenehe tatou e ani i te tauturu. Ma te na reira, e maitai e e oaoa ˈtu â tatou i roto i te taviniraa.—Kor. 1, 9:26.

22, 23. Mea nafea te mau taeae i Anetiohia i te faaiteraa i te here taeae, e nafea te nunaa o te Atua i teie mahana e na reira atoa ˈi?

²² Tei Anetiohia te taime matamua i parauhia ˈi “te mau pǐpǐ e Kerisetiano ia au i te aratairaa a te Atua.” (Ohi. 11:26b) Ua farii te Atua ia piihia ratou mai tera, no te mea ua pee ratou i te hiˈoraa o te Mesia. I te  riroraa mai te taata no te nunaa atoa ei Kerisetiano, ua itehia anei te here fetii taeae i rotopu i te ati Iuda e te nunaa ěê? A tapao na eaha tei itehia a tupu ai te oˈe rahi i te area matahiti 46. e I tera tau, ia tupu te oˈe, o te feia veve iho â ra te fifihia, aita hoi ta ratou e moni e e maa. A tupu ai tera oˈe, mea veve roa te ati Iuda Kerisetiano e ora ra i Iudea, aita ta ratou e maa e te mau mea hinaarohia e ratou. A ite ai te mau taeae i Anetiohia, oia atoa te feia nunaa ěê Kerisetiano i te reira, ua hapono oioi ratou i te “tauturu na te mau taeae e parahi ra i Iudea.” (Ohi. 11:29) Ua faaite ratou i te here taeae!

²³ Hoê â huru no te nunaa o te Atua i teie mahana. Ia ite tatou e te hinaaro ra to tatou mau taeae i te tahi atu fenua aore ra i to tatou vahi i te tauturu, e haa oioi tatou no te turu ia ratou. E faanaho ïa te mau Tomite amaa i te mau Tomite tauturu i tei ati ia nehenehe ratou e aupuru i tei faaruru i te vero rahi e te aueueraa fenua e te miti faaî. Ia na reira tatou, e itehia te here mau i rotopu ia tatou.—Ioa. 13:34, 35; Ioa. 1, 3:17.

24. Nafea tatou e faaite ai e mea faufaa no tatou te auraa o te orama ta Petero i ite?

²⁴ Ei Kerisetiano mau, mea faufaa no tatou te auraa o te orama ta Petero i ite i nia i te tafare i Iopa. Te haamori ra tatou i te hoê Atua o te ore e maitiiti i te taata. To Iehova hinaaro, ia faataa maitai tatou i te parau no nia i ta ˈna Faatereraa arii e ia porohia te taata atoa noa ˈtu te peu tumu, te nunaa e te tupuraa. No reira, e faaoti anaˈe i te poro i te feia o te faaroo ia nehenehe atoa ratou e tavini ia Iehova.—Roma 10:11-13.