1-3. (1) No te aha te aposetolo Paulo i huru ê ai i te feia no Ateno? (2) Nafea tatou e haapii ai i te hiˈoraa o Paulo?

 UA HURU ê roa Paulo. Tei Ateno oia i te pu rahi no Heleni i reira to Socrate, Platon e Aristote i te haapiiraa ˈtu. I Ateno, mea puai te taata i te pae haapaoraa. I te mau vahi atoa ta Paulo i haere, ua î te mau atua hape i roto i te mau hiero, i te mau vahi taata e i te mau aroâ. Ua ite Paulo i ta Iehova huru hiˈoraa no nia i te haamoriraa idolo. (Exo. 20:4, 5) Tera atoa ta Paulo huru hiˈoraa: Mea hae na ˈna te mau atua hape!

² I to Paulo tomoraa i te mahora, ua huru ê roa o ˈna. Mea rahi te tii o te atua Hereme i te pae apatoerau hitia o te râ i te poro i pihai iho noa mai i te tomoraa o te mahora. Mea rahi atoa te vahi no te haere e haamori. Nafea te aposetolo e poro ai i teie mau taata o te haamori ra e rave rahi atua? E tapi anei oia i te hau e te faatura ia anaanatae mai te taata i ta ˈna e parau atu? E haere anei ia ˈna ia tauturu hoê noa ˈˈe taata ia ite o vai te Atua mau e ia haamori ia ˈna?

³ E nehenehe tatou e taio i ta Paulo i parau i te mau taata maramarama no Ateno i te Ohipa 17:22-31. Ua paraparau Paulo ia ratou ma te tura e te haroˈaroˈa. Ma te haapii i to Paulo hiˈoraa, e nehenehe tatou e ite atu â eaha te rave ia anaanatae mai te taata e ia haaferuri ia ratou.

4, 5. Ihea Paulo i te pororaa i Ateno, e eaha te huru o te mau taata i reira?

⁴ Ua haere Paulo i Ateno i te piti o to ˈna tere mitionare i 50 muri aˈe te tau o Iesu. a A tiai ai oia ia Sila e Timoteo ia tae mai i Berea, ‘i roto i te sunago, ua haaferuri Paulo i te ati Iuda’ mai ta ˈna i matau. Ua poro atoa Paulo “i te mahora” i te mau taata e ere i te ati Iuda e ora ra i Ateno. (Ohi. 17:17) Mea rarahi te mahora o Ateno, mea piri roa te reira i te mouˈa piihia Akeropoli. E ere te mahora i te vahi hoohooraa noa, e vahi  atoa e putuputu ai te taata. Ia au i te hoê buka, teie te vahi o te oire e putuputu ai te feia tapihoo, te feia poritita, te philosopho e te feia papai. Mea au na to Ateno e haere i ǒ no te mau tauaparauraa maramarama.

⁵ E ere ïa i te mea ohie no Paulo ia haaferuri i te mau taata tei haere mai i te mahora. I rotopu i taua mau taata ra, te vai ra te mau Epikuro e te mau Setoiko, mea taa ê to ratou tiaturiraa. b No te mau Epikuro, ua fa noa mai te ora mai tera. Teie ta ratou e tiaturi nei: “Aita e faufaa ia mǎtaˈu i te Atua, aita e mauiui ia pohe anaˈe, e nehenehe e ite i te oaoa e e nehenehe e faaoromai i te mauiui.” Area râ te mau Setoiko, te tiaturi nei ratou e mea faufaa ia noaa te ite e te maramarama. E aita ratou e tiaturi ra i te Atua. Aita te mau Epikuro e te mau Setoiko i tiaturi i te tia-faahou-raa haapiihia e te mau pǐpǐ a te Mesia. Papu maitai, aita te manaˈo o na pǔpǔ e piti i tuea i te pue parau mau ta te mau Kerisetiano i tiaturi e ta Paulo i poro.

6, 7. Eaha ta te mau philosopho Heleni i manaˈo i ta Paulo haapiiraa, e eaha te huru o te mau taata i ta tatou mau haapiiraa?

⁶ Eaha ta te mau philosopho Heleni i manaˈo i ta Paulo haapiiraa? Ua parau te tahi no Paulo, e “taata mea paraparau roa” aore ra “titotito i te huero.” (Ohi. 17:18) Ua parau te hoê taata aravihi: “Ua faaohipahia teie parau no te hoê manu nainai o te titotito ra i te huero i tera e tera vahi, e i muri iho ua faaohipahia no te mau taata e ohi haere ra i te toetoea maa i te vahi atoa o te mahora. I muri aˈe, ua faaohipa-atoa-hia te reira no te faahohoˈa i te hoê taata e haaputu ra e rave rahi haamaramaramaraa, aita râ i taa i te auraa.” Ua parau ïa teie mau philosopho, mea maˈua o Paulo e mea tahana noa ta ˈna parau. E ite mai râ tatou e aita te reira i faatoaruaru ia Paulo.

⁷ E ere i te mea taa ê i teie mahana. E faaino pinepine te taata ia tatou no te mea e Ite no Iehova e te tiaturi nei tatou i te Bibilia. Ei hiˈoraa, te haapii ra te tahi mau orometua mea tupu noa te mau mea atoa e te onoono nei ratou e ia farii oe i teie manaˈo, mea maramarama ïa oe. E te feia o te patoi ra i teie tiaturiraa mea poiri ïa. To ratou hinaaro ia manaˈohia e mea maˈua tatou, no te mea te haapii ra tatou i ta te Bibilia e parau ra e te faaite ra tatou i te mau haapapuraa e te vai ra te Atua poiete o tei hamani i te mau mea atoa. Aita râ tatou e toaruaru. Ma te itoito, te paturu nei tatou i to tatou tiaturiraa e na te Atua ra o Iehova i poiete i te mau mea ora atoa i te fenua nei.—Apo. 4:11.

8. (1) Eaha te huru o tei faaroo i ta Paulo haapiiraa? (2) Eaha te auraa o te Areopago i reira paha Paulo i te aratairaahia? (A hiˈo i te nota i te api 142.)

⁸ Ua parau te tahi atu, o tei faaroo i ta Paulo i parau i te mahora: “E  au ra e taata poro oia i te mau atua ěê.” (Ohi. 17:18) Ahani Paulo i poro i te mau atua ěê i to Ateno, ua ati ïa o ˈna. E rave rahi matahiti na mua ˈtu, ua parihia Socrate i te na reiraraa. No reira e no te tahi atu mau tumu i haavahia e faautuahia ˈi oia i te utua pohe. E ere i te mea maere i to Paulo aratairaahia i te Areopago e aniraahia ia ˈna ia faataa i te mau haapiiraa mea huru ê no to Ateno. c Nafea Paulo e poro ai i te feia aita i ite i te mau Papai?

9-11. (1) Nafea Paulo i te haaferuriraa i te feia e faaroo ra ia ˈna ia anaanatae mai ratou? (2) Nafea tatou e pee ai i to Paulo hiˈoraa i roto i ta tatou taviniraa?

⁹ A haamanaˈo ua huru ê roa Paulo i te mau haamoriraa idolo ta ˈna i ite. Aita o ˈna i aro i te haamoriraa idolo ua vai hau noa râ o ˈna. Ma te faatura ua haaferuri oia, ia anaanatae mai te feia e faaroo ra i ta ˈna e parau atu. Ua na ô oia: “Outou to Ateno, ia hiˈo vau, i roto i te mau  taata atoa, o outou te mǎtaˈu aˈe i te mau atua.” (Ohi. 17:22) E au ra e, ua parau atu Paulo: ‘Ua ite au e taata faaroo outou.’ No reira Paulo i haapopou ai ia ratou. Ua ite oia e aau farii to ratou o tei haavarehia i te mau tiaturiraa hape. Tera hoi ta Paulo i rave “no te taa ore e te ereraa i te faaroo.”—Tim. 1, 1:13.

¹⁰ I muri iho, ua faahiti Paulo i te hoê ohipa o tei haapapu i te faaroo o to Ateno. Ua ite oia i te hoê fata pûpûhia “Na te hoê Atua aita matou i matau.” Ia au i te hoê buka: “E hamani pinepine te mau Heleni e te tahi atu i te mau fata no ‘te mau atua aita i matau.’ Ua mǎtaˈu hoi ratou aˈunei ratou e haamoˈe ai i te hoê atua aita i matau ia ratou a riri atu ai tera atua.” Ua faaite teie fata e ua tiaturi to Ateno e te vai ra te hoê Atua aita ratou i matau. Ua faaohipa ïa Paulo i te reira no te poro atu i te parau apî oaoa. Ua faataa oia: “Ta outou e haamori nei ma te ite ore o vai, o ˈna ïa ta ˈu e faaite atu ia outou.” (Ohi. 17:23) E haaferuriraa î i te paari e te puai atoa râ. Aita o ˈna i poro i te hoê atua apî aore ra ěê mai tei parihia ia ˈna. Ua faataa o ˈna, te Atua aita ratou i matau, o te Atua mau ïa.

¹¹ Nafea tatou e pee ai i to Paulo hiˈoraa i roto i ta tatou taviniraa? Ia hiˈopoa anaˈe tatou e taa paha ia tatou e taata faaroo te tahi, peneiaˈe te vai ra ia ˈna te hoê taoˈa i nia ia ˈna aore ra i roto i to ˈna fare aore ra to ˈna aua. E parau paha tatou: ‘Te ite ra vau e taata faaroo oe ua hinaaro iho â vau e paraparau i te hoê taata mai ia oe.’ E ia taa ia tatou i ta ˈna mau tiaturiraa e nehenehe tatou e faaau ohie i te hoê tumu parau ia anaanatae mai oia. A haamanaˈo, ta tatou fa e ere i te haavaraa i te tahi atu ia au i ta ratou mau tiaturiraa. E rave rahi o to tatou mau taeae e tuahine tei tiaturi na i te mau haapiiraa hape.

12. Nafea Paulo i faaau ohie ai i ta ˈna haapiiraa no te feia e faaroo mai ra ia ˈna?

¹² Ua nehenehe anei Paulo e poro noa i to Ateno no nia i te hoê ohipa ta ratou i matau? Ua taa ia Paulo ua ite to Ateno i te mau haapiiraa philosopho Heleni eiaha râ i te mau Papai. Ua faaau ohie ïa o ˈna i ta ˈna pororaa. A tahi, ua paraparau o ˈna no nia i te mau haapiiraa i roto i te Bibilia ma te ore e faahiti i te reira. A piti, ua taa ia ˈna to ratou huru aau, i parau ai oia “tatou.” E a toru, ua faahiti o ˈna i te mau papai Heleni, no te faaite atu no roto mai te tahi o te mau manaˈo ta ˈna i parau i ta ratou mau papai. E hiˈo mai tatou i ta Paulo i parau. Eaha te pue parau mau ta ˈna i haapii atu no nia i te Atua aita to Ateno i matau?

13. Eaha ta Paulo i faataa no nia i te ao taatoa, e ua papu ia ˈna i te aha?

¹³ Ua poiete te Atua i te ao taatoa. Ua parau Paulo: “Te Atua tei hamani i te ao e te mau mea atoa i roto, o ˈna hoi te Fatu o te raˈi e o te  fenua, e ore ïa e parahi i roto i te mau hiero hamanihia e te rima taata.” d (Ohi. 17:24) Aita te ao taatoa i fa noa mai tera. Na te Atua mau râ i hamani i te mau mea atoa. (Sal. 146:6) Taa ê atu ia Atena aore ra te tahi atu mau atua tei faahanahanahia i te mau hiero, te mau hiero nainai e te mau fata, aita te Arii hau ê e Fatu o te raˈi e o te fenua e nehenehe e parahi i roto i te mau hiero hamanihia e te rima taata. (Arii 1, 8:27) Mea papu ïa te mau parau a Paulo: Mea teitei aˈe te Atua mau i te tahi noa ˈˈe idolo tuuhia i roto i te hiero hamanihia e te taata.—Isa. 40:18-26.

14. Nafea Paulo i te faaiteraa aita te Atua e hinaaro i te tauturu a te taata?

¹⁴ Aita te Atua e hinaaro i te tauturu a te taata. Ua matau te feia haamori idolo i te faaunauna i ta ratou mau tii i te ahu, i te afai i te mau ô moni rahi aore ra i te maa e te inu: Ahani hoi e faufaahia teie mau idolo! I rotopu râ i te tahi o te mau philosopho Heleni, aita te hoê atua e titau i te tauturu a te taata. No reira ua farii ratou i ta Paulo i parau e aita te Atua “e tavinihia e te rima taata mai te mea ra e te ere ra oia i te tahi mea.” Papu maitai aita te taata e nehenehe e faahoˈi i ta te Atua poiete i horoa mai! Na ˈna râ e horoa i tei hinaarohia no te taata “te ora e te aho e te mau mea atoa,” oia hoi te mahana, te ûa e te maa. (Ohi. 17:25; Gen. 2:7) No reira aita te Atua o te horoa mai i te mau mea atoa e hinaaro i te tauturu a te taata.

15. Nafea Paulo i te faatanoraa i te huru feruriraa a to Ateno no te mau taata e ere i te Heleni e no te aha mea faufaa to ˈna hiˈoraa no tatou?

¹⁵ Ua hamani te Atua i te taata. Ua manaˈo to Ateno mea faahiahia aˈe ratou i te mau taata e ere i te Heleni. Te parau ra râ te Bibilia aita e tumu e faateitei ai tatou no to tatou anei nunaa aore ra iri. (Deut. 10:17) Ua faaite Paulo i teie parau mau ma te tura e te haapao maitai. I to ˈna parauraa “i te hoê noa taata, ua hamani [te Atua] i te mau nunaa atoa,”  eita e ore ua haaferuri te reira i te feia e faaroo ra ia ˈna. (Ohi. 17:26) Ua faahiti oia i te aamu o Adamu i te Genese, te tupuna o te huitaata. (Gen. 1:26-28) No te mea hoê â tupuna to te taata, aita te iri aore ra te nunaa i hau aˈe i te tahi atu. E ua taa i te feia e faaroo ra ia Paulo i ta ˈna i parau. Mea faufaa ïa to ˈna hiˈoraa no tatou. Noa ˈtu e hinaaro tatou e faaite i te tura e te manaˈo au noa i roto i ta tatou taviniraa, eiaha roa tatou e taui i te pue parau mau Bibilia ia farii mai te tahi atu i te reira.

16. Eaha te opuaraa a te Atua poiete no te taata?

¹⁶ Ua hinaaro te Atua ia faafatata mai te taata ia ˈna. Noa ˈtu ua paraparau noa te mau philosopho o tei faaroo ia Paulo no nia i te tumu o te ora, aita roa ˈtu ratou i tae i te hoê faataaraa au noa. Ua faaite papu râ Paulo i te opuaraa a te Atua poiete no te taata, oia hoi “ia imi ratou i te Atua, noa ˈtu e mea perehahu a itehia ˈtu ai oia, aita hoi oia i atea ia tatou tataitahi.” (Ohi. 17:27) Mea papu e nehenehe e ite o vai te Atua aita to Ateno i matau. Aita hoi oia i atea i te feia e hinaaro mau ra e ite ia ˈna e e haapii no nia ia ˈna. (Sal. 145:18) A tapao na ua faaohipa Paulo i te taˈo “tatou,” te auraa e titau-atoa-hia ia ˈna ia “imi” i te Atua e o vetahi “noa ˈtu e mea perehahu.”

17, 18. No te aha e titauhia i te taata ia faafatata ˈtu i te Atua e eaha ta tatou e haapii mai i ta Paulo i rave ia anaanatae mai te feia e faaroo ra ia ˈna?

¹⁷ Titauhia i te taata ia faafatata ˈtu i te Atua. Maoti te Atua, ua parau Paulo: “E ora ˈi, e hahaere ai e e vai mai ai tatou.” Te parau ra te tahi mau aivanaa e ua faahiti Paulo i te parau a Épiménide te rohipehe  Kereta o te onoraa o te senekele hou te tau o Iesu e “e mea faufaa o ˈna i roto i te peu tumu a to Ateno.” Ua horoa Paulo i te tahi atu tumu e faafatata ˈi te taata i te Atua: “Mai ta vetahi o ta outou mau rohipehe i parau: ‘E tamarii atoa hoi tatou na ˈna.’” (Ohi. 17:28) E titauhia i te taata ia faafatata ˈtu i te Atua, e Metua hoi oia no te taata matamua te tupuna o te huitaata. Ia anaanatae te feia e faaroo ra ia ˈna, ua faahiti Paulo i te mau papai Heleni o ta ratou i faatura. e Mai ia Paulo, nehenehe tatou e faahiti ma te tano noa i te tahi mau parau no roto mai i ta te taata i papai, te mau buka ite rahi aore ra te tahi atu mau buka. Ei hiˈoraa, e tauturu paha te tahi parau no roto mai i te hoê buka faaturahia i te hoê taata e ere i te hoê Ite no Iehova ia taa te tumu o te mau peu a te haapaoraa hape.

¹⁸ Tae roa mai i te taime o ta ˈna aparauraa ua faahiti Paulo i te mau pue parau mau faufaa no nia i te Atua ma te faaau ohie i ta ˈna parau i te feia e faaroo ra ia ˈna. Eaha ta te aposetolo i hinaaro ia rave to Ateno i teie haapapuraa? Ua faataa oioi o ˈna ia ratou i roto i ta ˈna aparauraa.

19, 20. (1) Nafea Paulo i te faaiteraa e ere i te mea tano ia haamori i te mau idolo hamanihia e te taata? (2) Eaha te titauhia ia rave te feia e faaroo ra ia Paulo?

¹⁹ Ua ineine Paulo no te faaitoito i te feia e faaroo ra ia ˈna ia haa. Ma te faahiti faahou i te mau papai Heleni ua parau oia: “No reira, i te mea e e tamarii tatou na te Atua, eiaha ïa tatou e manaˈo e e mai te auro, te ario aore ra te ofai te Atua, mai te tahi mea i manaˈohia e i hamanihia e te taata.” (Ohi. 17:29) Oia mau, mai te peu na te Atua i hamani i te taata, nafea te Atua e nehenehe ai e riro ei idolo hamanihia e te taata? Ua faaite te mau parau a Paulo e ere i te mea tano ia haamori i te mau idolo hamanihia e te taata. (Sal. 115:4-8; Isa. 44:9-20) Ma te parau “eiaha ïa tatou” ua ohie no te feia i faaroo ia Paulo ia farii i ta ˈna aˈoraa.

²⁰ Ua haapapu te aposetolo e titauhia ia ratou ia haa: “Aita . . . te Atua i haapao i taua mau anotau ra i ore ai te taata i ite o vai o ˈna [te manaˈoraa e nehenehe te Atua e farii i te taata o te haamori ra i te idolo]. I teie nei râ, te faaite nei oia i te taata atoa i te mau vahi atoa ia tatarahapa ratou.” (Ohi. 17:30) Ua maere roa te tahi o te feia e faaroo ra ia Paulo i ta ˈna i parau ia tatarahapa ratou. Ua faaite râ ta ˈna aparauraa maoti te Atua i ora ˈi ratou, ia haafaufaa ïa ratou i te reira. Titauhia ia ratou ia imi i te Atua, ia haapii no nia ia ˈna e ia ora ia au i te hinaaro o te Atua. Te auraa, ia taa to Ateno e hara te haamoriraa idolo e ia faaea i te rave i te reira.

21, 22. Mea nafea Paulo i te faaotiraa i ta ˈna aparauraa, e no te aha mea faufaa te reira no tatou?

 ²¹ Ua faaoti Paulo i ta ˈna aparauraa ma teie mau parau: ‘Ua faataa te Atua i te hoê mahana e haava ˈi oia i to te fenua atoa ma te parau-tia na roto i te hoê taata ta ˈna i maiti, e ua horoa i te haapapuraa i te taata atoa ma te faatia mai ia ˈna mai te pohe mai.’ (Ohi. 17:31) I teie nei, ua ite ratou fatata te Mahana Haavaraa a te Atua i te tae mai e tumu ïa no ratou ia imi e ia ite o vai te Atua mau! Aita Paulo i faaite o vai te haava maitihia, ua parau râ o ˈna i te tahi ohipa no nia i teie haava: Ua ora oia ei taata, ua pohe e ua faatia-faahou-hia oia na te Atua!

²² Mea faufaa te reira no tatou i teie mahana. Ua ite tatou te haava maitihia na te Atua o Iesu Mesia tei faahoˈihia mai i te ora. (Ioa. 5:22) Ua ite atoa tatou tausani matahiti te maoro o te Mahana Haavaraa e e fatata te reira i te piri mai. (Apo. 20:4, 6) Eiaha tatou e mǎtaˈu, no te mea e hopoi mai te reira e rave rahi haamaitairaa no te feia taiva ore tei haavahia. Ua haapapuhia te tupuraa no to tatou tiaturiraa i te hoê a muri aˈe faahiahia maoti te hoê semeio rahi mau: Te tia-faahou-raa o Iesu Mesia!

23. Eaha te huru o te feia no ta Paulo i parau?

²³ Ua rau te huru o te feia no ta Paulo i parau. “Faaooo maira vetahi” i to ratou faarooraa no te tia-faahou-raa. Aita atoa te tahi atu i tatarahapa e i tiaturi ia Iesu e ua parau: “I te tahi atu mahana e faaroo ai matou ia oe no nia i tena parau.” (Ohi. 17:32) Mea iti râ tei faaroo: “Amui atura . . . te tahi mau taata ia ˈna e tiaturi aˈera ia Iesu. O Dionusio te tahi, haava o te Areopago, te hoê vahine o Damarisi te iˈoa e te tahi atu mau taata.” (Ohi. 17:34) Mai tera atoa te huru o te taata i roto i ta tatou taviniraa. E faaooo te tahi mau taata ia tatou, te tahi atu e faatura mai ma te ore e tâuˈa mai. E oaoa râ tatou ia farii mai hoê i te poroi o te Faatereraa arii e ia riro mai ratou e Kerisetiano.

24. Eaha ta tatou e haapii mai i ta Paulo i parau i te Areopago?

²⁴ Ia feruri tatou i ta Paulo i parau, nehenehe tatou e haapii hau atu â e nafea e faataa i te tahi manaˈo ia anaanatae te taata e ia papu ia ratou e mea mau ta tatou haapiiraa. E haapii atoa tatou e e titauhia te faaoromai e te tura no te feia aau tae o te tiaturi ra i te mau haapiiraa hape. E haamanaˈo atoa tatou i teie haapiiraa faufaa: Eiaha roa ˈtu tatou e taui i te parau mau Bibilia ia mǎrû mai te feia e faaroo ia tatou. Ma te pee râ i to te aposetolo Paulo hiˈoraa e aravihi atu â tatou ei taata haapii i roto i te taviniraa. E nehenehe te mau tiaau e aravihi atu â ei taata haapii i roto i te amuiraa. E ineine ïa tatou no te tauturu i te tahi atu ‘ia imi i te Atua, a itehia ˈtu ai oia.’—Ohi. 17:27.