1-3. (1) Eaha tei faatupu i te mârôraa i roto i te amuiraa? (2) E nafea tatou e faufaahia ˈi i teie aamu i roto i te buka Ohipa?

 OAOA rahi to Paulo raua Baranaba, no hoˈi noa mai ra raua i Anetiohia no Suria i to raua tere mitionare matamua. Ua oaoa raua e ua iriti Iehova “i te uputa o te faaroo i te mau nunaa ěê.” (Ohi. 14:26, 27) Oia mau, te oaoa ra to Anetiohia i te parau apî oaoa, “e mea rahi” o te nunaa ěê tei farii i te parau mau.—Ohi. 11:20-26.

² I to te mau Kerisetiano no Iudea faarooraa e te vai ra te mau pǐpǐ apî, aita roa ˈtu ratou i oaoa, ua manaˈo te tahi e titauhia i teie mau Kerisetiano ia peritome ia ratou, area râ te tahi atu aita ïa. Eaha tei tupu i rotopu i te mau ati Iuda e te nunaa ěê, titauhia anei i te nunaa ěê ia faatura i te Ture a Mose? Ua faatupu te reira i te mârôraa a haafifi atu ai i te hoêraa o teie mau Kerisetiano. Mea nafea te reira e faaafarohia ˈi?

³ A hiˈopoa ˈi tatou i teie aamu i roto i te buka Ohipa, e rave rahi haapiiraa ta tatou e ite mai. E tauturu mai te reira ia haa ma te paari ia tupu te fifi o te amahamaha ia tatou i teie mahana.

4. Eaha ta te tahi mau Kerisetiano ati Iuda i manaˈo noa e eaha te uiraa e hiti mai?

⁴ Ua papai Luka: “Pou maira te tahi mau tane i Anetiohia mai Iudea mai e haapii maira i te mau taeae: ‘Ia ore outou e peritomehia ia au i te ture a Mose, e ore outou e faaorahia.’” (Ohi. 15:1) Aita tatou i ite e Pharisea anei teie ‘mau tane no Iudea’ hou a riro ai ratou ei Kerisetiano. E au râ e, te manaˈo noa ra ratou mai te mau Pharisea o tei faaohipa etaeta i te Ture. E ua parau atoa ratou no ǒ mai i te mau aposetolo e te mau matahiapo no Ierusalema te mau mea ta ratou i haapii. (Ohi. 15:23, 24) No te aha ïa te manaˈo noa ra te mau Kerisetiano ati Iuda e mea faufaa te peritomeraa, noa ˈtu ua haapapu te Atua ia Petero e ua farii oia i te mau nunaa ěê i roto i te amuiraa Kerisetiano? a—Ohi. 10:24-29, 44-48.

5, 6. (1) No te aha i tiaturi noa ˈi te tahi mau Kerisetiano ati Iuda i te peritomeraa? (2) E tuhaa anei te faufaa no te peritomeraa i roto i te faufaa a Aberahama? A faataa. (A hiˈo i te nota.)

 ⁵ Ua rau te tumu. A tahi, na Iehova iho i haamau i te peritomeraa e e tapao te reira no te hoê auhoaraa taa ê e o ˈna. Ua faaue oia ia Aberahama e te taatoaraa o te mau tane tei ora ra ia ˈna ra ia peritomehia ratou e i muri iho ua horoa oia i teie faaueraa ia Iseraela. b (Lev. 12:2, 3) I raro aˈe i te Ture a Mose, titau-atoa-hia i te feia ê ia peritome ia ratou hou a apiti ai i te mau oroa mai te Pasa. (Exo. 12:43, 44, 48, 49) Oia mau, no te mau ati Iuda, ia ore te hoê tane e peritome ia ˈna mea viivii e aita o ˈna e nehenehe e tavini i te Atua.—Isa. 52:1.

⁶ No reira mea faufaa ia faatupu te ati Iuda i te faaroo e te haehaa no te faaau ohie i to ratou feruriraa i to Iehova. Na teie faufaa apî e mono i te faufaa o te Ture, no reira ia fanau mai hoê ati Iuda e ere te auraa e mero oia no te nunaa o te Atua. E no te mau Kerisetiano e ora ra e te mau ati Iuda, mai te mau Kerisetiano i Iudea, ia faˈi ratou ma te itoito i te Mesia e ia farii i te mau Kerisetiano nunaa ěê peritome-ore-hia.—Ier. 31:31-33; Luka 22:20.

7. Eaha ta ‘te mau tane no Iudea’ i ore i taa?

⁷ Papu maitai, aita te mau ture aveia a te Atua i taui. Ei haapapuraa, tei roto te mau faaueraa a te Ture a Mose i te faufaa apî. (Mat. 22:36-40) Ei hiˈoraa, no te peritomeraa ua papai Paulo i muri iho: “Te ati Iuda mau, tei te rotoraa ïa o te taata, e te peritomeraa mau, o ta te varua moˈa ïa i rave i nia i te aau, e ere na te ture.” (Roma 2:29; Deut. 10:16) Aita ‘te mau tane no Iudea’ i taa i te reira, ua onoono râ ratou e te titau noa ra Iehova i te peritomeraa no to ˈna nunaa. Ua ineine anei ratou i te faaau ohie i to ratou feruriraa?

8. No te aha ua tae te parau o te peritomeraa i te tino aratai i Ierusalema?

⁸ Ua papai faahou Luka: “Mârô e patoi atura Paulo raua Baranaba ia ratou [te tahi mau tane ‘tei pou mai Iudea mai’], e faanahohia ˈtura e ia pauma Paulo, Baranaba e te tahi mau taeae i Ierusalema e farerei i te mau aposetolo e te mau matahiapo no te faaite atu i taua fifi ra.” c (Ohi. 15:2) Ua mârô te mau taeae i Anetiohia e te tahi atu, e vai noa anei te  peritomeraa aore ra aita. Ua manaˈo ratou e ua tano ratou, aita râ i faaafarohia. No te tapea i te hau e te hoêraa, ua faaoti ïa te amuiraa e ani i te tino aratai, oia hoi “te mau aposetolo e te mau matahiapo,” i Ierusalema. Eaha ta tatou e haapii mai i te mau matahiapo no Anetiohia?

9, 10. Eaha te hiˈoraa maitai ta te mau taeae no Anetiohia, Paulo e Baranaba i vaiiho mai no tatou?

⁹ Hoê haapiiraa faufaa ta tatou e huti mai, ia tiaturi tatou i te faanahonahoraa a te Atua. A hiˈo na: Ua ite te mau taeae no Anetiohia e Kerisetiano ati Iuda te taatoaraa o te tino aratai. Ua tiaturi râ ratou e faaafaro teie pǔpǔ i te parau o te peritomeraa maoti te mau Papai. No te aha? Ua tiaturi te amuiraa e na Iehova e aratai i teie ohipa maoti to ˈna varua moˈa e te upoo o te amuiraa Kerisetiano, Iesu Mesia. (Mat. 28:18, 20; Eph. 1:22, 23) Ia fa mai te fifi i teie mahana, pee anaˈe ïa i te hiˈoraa maitai o te mau Kerisetiano no Anetiohia ma te tiaturi i te faanahonahoraa a te Atua e te Tino aratai tei faatavaihia.

¹⁰ E haamanaˈo atoa tatou i te faufaa o te haehaa e te faaoromai. Ua faatoroahia Paulo e Baranaba na te varua moˈa no te haere i te mau nunaa ěê, aita râ raua i manaˈo e mana to raua no te faaoti no nia i te peritomeraa i Anetiohia. (Ohi. 13:2, 3) Hau atu â ua papai Paulo i muri iho: “No te hoê heheuraa no te raˈi mai i pauma ˈi au i Ierusalema,” tapao faaite ïa na te varua moˈa i aratai ia ˈna. (Gal. 2:2) E tutava te mau matahiapo i teie mahana i te faatupu i te hoê â haehaa e faaoromai ia vai hau e hoê noa te amuiraa. E faaau ïa ratou i to ratou feruriraa i to Iehova maoti te mau Papai e te aratairaa horoahia na te tavini haapao maitai.—Phil. 2:2, 3.

11, 12. No te aha mea faufaa ia tiai tatou ia Iehova?

¹¹ I roto i te tahi mau tupuraa, mea tia ia tiai tatou na Iehova e tauturu mai ia taa i te tahi atu tumu parau. Ei hiˈoraa, i te tau a faatavaihia ˈi Korenelio, titauhia 13 matahiti hou Iehova a faataa ˈi aita e titau-faahou-hia te peritomeraa no te nunaa ěê. No te aha Iehova i tiai ai i tera  rahiraa matahiti? Peneiaˈe ua hinaaro te Atua e horoa i te taime no te Kerisetiano ati Iuda ia faatano i to ratou feruriraa i to Iehova. A 1 900 matahiti i teie nei ua vai noa te faufaa no te peritomeraa ta Iehova i faaau e o Aberahama, ta ratou i au e i faatura, e tauiraa faufaa mau ïa te reira!—Ioa. 16:12.

¹² E ô faahiahia mau te reira, te haapii e te tauturu mai ra Iehova ma te faaoromai e te mǎrû ia manaˈo mai ia ˈna! E te mau mea ta ˈna i haapii mai no to tatou ïa maitai. (Isa. 48:17, 18; 64:8) Eiaha roa ˈtu tatou e faateitei e onoono e ua tano to tatou manaˈo. Eiaha atoa tatou e faaino ia horoa mai te faanahonahoraa i te tahi mau faatanotanoraa no nia i te tahi mau irava. (Koh. 7:8) Ia haamata outou i te feruri mai tera, a haamanaˈo i ta outou e nehenehe e haapii mai i te Ohipa pene 15 e a ani ia Iehova ia tauturu mai no te faaohipa i te mau haapiiraa. d

13. Nafea tatou e pee ai i te faaoromai o Iehova i roto i ta tatou taviniraa?

¹³ Titauhia ia tatou ia pee i te faaoromai o Iehova mea fifi anaˈe no ta tatou mau piahi ia taui i te hoê tiaturiraa hape aore ra ia faaea i te rave i te tahi peu o ta ratou haapaoraa. I roto i teie tupuraa, titauhia te taime ia ohipa te varua moˈa i nia i te aau o te piahi. (Kor. 1, 3:6, 7) E hinaaro atoa tatou e pure no ratou. Mea papu, i te taime tano e tauturu mai te Atua ia tatou ia ite eaha te rave no te tauturu ia ratou.—Ioa. 1, 5:14.

14, 15. (1) Mea nafea te amuiraa no Anetiohia i te faaturaraa ia Paulo, Baranaba e tei apee mai ia raua? (2) Mea nafea Paulo e to ˈna nau hoa i te faaitoitoraa i te mau taeae ta ratou i farerei?

¹⁴ Ua papai atoa Luka: “I muri aˈe i to te amuiraa apeeraa ia ratou maa taime, haere atura ratou na Phenikia e na Samaria, a faatia maite ai mea nafea to te mau nunaa ěê fariuraa i te Atua no te haamori ia ˈna, a oaoa roa ˈtu ai te mau taeae atoa.” (Ohi. 15:3) Ua faaite te amuiraa i to ratou here e faatura ia Paulo, Baranaba e tei apee mai ia raua ma te apiti atu e o ratou i te tahi mau taime. Ua hinaaro ratou e turu atu e ia fanaˈo atu ratou i te haamaitairaa a te Atua. Teie te tahi hiˈoraa maitai o te mau taeae no Anetiohia no tatou! Te faatura anei ra outou i to outou mau taeae e tuahine, “ratou [te mau matahiapo] iho â râ e rohi ra i roto i te parau e te haapiiraa”?—Tim. 1, 5:17.

¹⁵ Na te purumu o Ierusalema, ua faaitoito Paulo e to ˈna nau hoa i to ratou mau taeae i Phenikia e Samaria ma te “faaite maite” atu no nia i te rahiraa o te mau Kerisetiano nunaa ěê. Peneiaˈe ei Kerisetiano ati  Iuda te tahi o te feia faaroo tei horo ê i tera mau tuhaa fenua i muri aˈe i to Setephano haapoheraahia no to ˈna faaroo. I teie atoa mahana, e itoitohia tatou ia faaroo i te mau tupuraa o to tatou mau taeae e tuahine o te faaruru ra i te ati e mea nafea Iehova i te haamaitairaa ia ratou. Te haafaufaa ra anei outou i te reira ma te apiti atu i te mau putuputuraa, tairururaa haaati e tairururaa e toru mahana e ma te taio atoa i to ratou aamu piahia i roto i ta tatou mau papai aore ra i nia jw.org?

16. No te aha ua riro te peritomeraa ei fifi?

¹⁶ I muri aˈe i te haereraa i nia 550 kilometera i te pae apatoa, ua tae te mau taeae i Anetiohia e ua papai Luka: “I to ratou taeraa ˈtu i Ierusalema, farii-maitai-hia maira ratou e te amuiraa e te mau aposetolo e te mau matahiapo, e faatia ˈtura ratou e rave rahi ohipa ta te Atua i rave na roto ia ratou. Teie râ, tia maira vetahi o te pǔpǔ faaroo amaha Pharisea tei tiaturi i te Mesia e na ô maira: ‘Ia peritomehia te mau taata o te mau nunaa ěê e tia ˈi e ia faauehia ratou ia haapao i te Ture a Mose.’” (Ohi. 15:4, 5) Papu maitai, ua riro te parau o te peritomeraa no te Kerisetiano nunaa ěê ei fifi tei titauhia ia faaafaro.

17. O vai te tino aratai i Ierusalema, e no te aha ua ohipa amui atoa “te mau matahiapo”?

¹⁷ Te parau ra te Maseli 13:10: “Tei te feia . . . e imi i te aˈoraa te paari.” E ua tuea tera manaˈo i teie faaueraa: “Putuputu aˈera . . . te mau aposetolo e te mau matahiapo no te hiˈopoa i [te parau o te peritomeraa].” (Ohi. 15:6) Mai ta “te mau aposetolo e te mau matahiapo” i rave, na te Tino aratai no teie mahana e rave i te mau faaotiraa no te taatoaraa o te mau amuiraa. No te aha “te mau matahiapo” i ohipa amui ai e te mau aposetolo? A haamanaˈo na i to te aposetolo Iakobo haapoheraahia e i to te aposetolo Petero tapearaahia tau taime. E nehenehe anei te reira e tupu no te tahi atu mau aposetolo? No reira mea faufaa ia ohipa amui atoa te tahi atu mau taeae faatavaihia no te aratai i te ohipa.

18, 19. Eaha ta Petero i parau, e eaha ta te feia i faaroo ia ˈna i faaoti?

 ¹⁸ Ua papai faahou Luka: “Tupu ihora te hoê aparauraa rahi, tia maira Petero e na ô atura: ‘Taeae ma, ua ite maitai outou e mai te omuaraa mai â, ua maiti te Atua ia ˈu i rotopu ia outou ia faaite au i te mau taata o te mau nunaa ěê i te parau apî oaoa e ia tiaturi ratou. E ua haapapu te Atua, tei ite eaha to roto i te aau, e ua farii oia ia ratou ma te horoa ˈtu i te varua moˈa, mai ta ˈna i na reira atoa ia tatou. Aita roa atoa oia i faataa ê ia tatou ia ratou, ua tamâ râ oia i to ratou aau no to ratou faaroo.’” (Ohi. 15:7-9) Ia au i te hoê buka, ua huri-atoa-hia te taˈo Heleni “aparauraa rahi” i te irava 7 “ei maimiraa e ei uiuiraa.” Noa ˈtu mea taa ê to ratou mau manaˈo, ua ineine râ ratou no te aparau e no te faaite i to ratou iho huru aau no nia i teie fifi.

¹⁹ Te nunaa ěê matamua peritome-ore-hia ta Petero i farerei, o Korenelio e to ˈna utuafare tei faatavaihia e te varua moˈa i 36 muri aˈe i te tau o Iesu. Mai te peu ua farii Iehova i te mau ati Iuda e te nunaa ěê, e tiaraa anei to te taata no te taui i te reira? Hau atu â, e ere na te Ture a Mose e faaite e taata parau-tia te tahi taata, na te faaroo râ i te Mesia.—Gal. 2:16.

20. Mea nafea te feia tei paraparau no te peritomeraa i te ‘mârôraa i te Atua’?

²⁰ Ia au i ta te Atua i haapapu, e nafea o ˈna i te faaohiparaa i to ˈna varua moˈa, ua faaoti Petero: “No te aha ïa outou e mârô ai i te Atua ma te faateimaha i te mau pǐpǐ i te hoê zugo aita i maraa i to tatou mau tupuna e ia tatou atoa nei ia amo? Area tatou, te tiaturi ra ïa e faaorahia tatou maoti te hamani maitai rahi o te Fatu ra o Iesu, ta ratou atoa ïa e tiaturi ra.” (Ohi. 15:10, 11) Ua parau Petero no te feia tei paraparau no te peritomeraa, te ‘mârô nei ratou i te Atua.’ Ua tamata ratou i te faateimaha i te nunaa ěê ia auraro i te Ture. Aita râ te mau ati Iuda i na reira, no reira ratou i faautuahia ˈi i te pohe. (Gal. 3:10) Ahani iho â ratou i faaite i te mauruuru no te aroha hamani maitai o te Atua maoti Iesu.

21. Eaha ta Baranaba e Paulo i parau no te tauturu i te mau taeae ia rave i te faaotiraa tano?

²¹ Papu maitai, ua haaferuri te mau parau a Petero i te feia e faaroo ra ia ˈna, no te mea “mamû aˈera ratou pauroa.” I muri iho, ua faatia Baranaba e Paulo: “E rave rahi semeio e ohipa faahiahia mau ta te Atua i rave na roto ia raua i rotopu i te mau nunaa ěê.” (Ohi. 15:12) I teie nei, ua nehenehe te mau aposetolo e te mau matahiapo e rave i te faaotiraa tano no nia i te peritomeraa ia au i to te Atua hinaaro.

22-24. (1) E nafea te Tino aratai no teie mahana e pee ai i te hiˈoraa o te tino aratai matamua? (2) Mea nafea te mau matahiapo e faaite ai i te faatura no ta Iehova i faanaho i roto i te amuiraa?

²² I teie atoa mahana, ia putuputu te mau mero o te Tino aratai, e vaiiho ratou i te Parau a te Atua no te aratai ia ratou e e pure ratou no te  ani i te varua moˈa. (Sal. 119:105; Mat. 7:7-11) No te na reira, e hiˈo atea te mero tataitahi o te Tino aratai i te hoê tapura ohipa, e nehenehe ïa ratou e feruri e e pure no nia i te mau tumu parau ta ratou e hiˈopoa. (Mas. 15:28) E ia putuputu ratou, e faaite teie mau taeae faatavaihia i to ratou manaˈo ma te faatura. E faaohipa pinepine ratou i te Bibilia i te roaraa o ta ratou aparauraa.

²³ Mea tia ia pee te mau matahiapo o te mau amuiraa i teie hiˈoraa. E ia aparau te mau matahiapo no nia i te hoê fifi, aita râ i afaro atura, e ani ïa ratou i te tauturu i te amaa aore ra i te mau tiaau haaati. E na te amaa e papai i te Tino aratai mai te peu e titauhia.

²⁴ Papu maitai, te haamaitai ra Iehova i te feia tei ineine i te pee i te aratairaa horoahia na te faanahonahoraa e i roto i te amuiraa. E haamaitai Iehova i tei faatupu i te haehaa, te taiva ore e te faaoromai. Mai ta tatou e ite i to muri nei pene, e horoa mai Iehova i te hau, te hoêraa e te haereraa i mua i te pae varua i roto i te amuiraa.