Eita o Satani e ta ˈna mau demoni e haavare maoro atu â i te huitaata. Ua huri ê na Iehova ia ratou mai te raˈi mai. (Apokalupo 12:9) Fatata roa te taime e tairi faahou ai te Atua ia Satani e ta ˈna mau demoni. I roto i te hoê orama no ǒ mai i te Atua, ua parau te aposetolo Ioane: “Ite atura vau i te hoê melahi i te pouraa mai te raˈi mai, e fifi auri rahi e te taviri o te abuso tei to ˈna rima. Haru ihora oia i te teni, te ophi i tahito ra, oia hoi te Diabolo ra o Satani, e taamu ihora ia ˈna i te fifi 1 000 matahiti. Huri atura oia ia ˈna i roto i te abuso e opani atura e tamau ihora i te reira i te tapao taati, ia ore o ˈna ia haavare faahou i te mau nunaa e ia hope roa ˈtu na 1 000 matahiti.” (Apokalupo 20:1-3) I muri aˈe, e haamou-roa-hia te Diabolo e ta ˈna mau demoni.—Apokalupo 20:10.

E na reira-atoa-hia i nia i te mau taata iino i nia i te fenua.—Salamo 37:9, 10; Luka 13:5.

Fatata roa te tau eita faahou o Satani e ta ˈna mau demoni e ohipa mai. I muri aˈe, e faatupu Iehova i e rave rahi mau haamaitairaa i nia i te huitaata. E haamanaˈo outou e aita e ora to te feia pohe. Ua faaau Iesu i te pohe i te taoto, i te hoê taoto hohonu aita e moemoeâ. (Ioane 11:11-14) Ua na reira o ˈna no te mea ua ite o ˈna e e tae i te hoê tau, e ara mai te feia o te taoto ra i roto i te pohe. Ua parau oia: “Ua fatata te hora . . . te feia atoa i roto i te menema . . . [i te] haere mai ai i rapae.”—Ioane 5:28, 29; a hiˈo i te Ohipa 24:15.

E faatia-faahou-hia mai ratou i ǒ nei i nia i te fenua nei. Aita faahou e parau faaara e ua pohe te tahi, e mau parau oaoa noa râ no te faaite e ua faatiahia mai te tahi! Auê ïa oaoa e i te fariiraa i tei herehia tei faatia-faahou-hia mai!