Ua faatia o Dauda: “Ua paari au i roto i te hoê oire iti i te mataeinaa i te pae apatoerau no Sierra Leone. I te hoê mahana, e tamariirii noa â vau i tera taime, ua tupu te hoê peapea i rotopu i to ˈu utuafare e te tahi atu utuafare, e hara fenua te tumu. Te titau ra na utuafare e piti hoê â fenua. No te faatitiaifaro i taua fifi ra, ua titauhia te tauturu a te hoê tahuˈa. Ua horoa ˈtura oia i te hoê hiˈo i te tahi taata, e ua tapoˈi aˈera oia ia ˈna i te hoê ahu uouo. E inaha, aita i maoro roa ua ruru noa aˈera te taata i raro aˈe i taua ahu ra e ua î roa oia i te hou. A hiˈo noa ˈtu ai oia i te hiˈo, ua na ô aˈera oia: ‘Te ite ra vau i te hoê taata ruau e haere mai ra! E ahu uouo to ˈna. E taata roa oia e te ruau. E rouru hinahina to ˈna. Te haere mǎrû noa mai ra o ˈna ma te piˈo i raro.’

E au ra e o papa ruau ta ˈna i ite! I muri iho, mai te maamaa ra te huru, ua tuô aˈera oia: ‘Mai te peu e eita outou e tiaturi mai ta ˈu e parau atu, haere mai ïa e hiˈo!’ Papu maitai e aita hoê noa ˈˈe o matou i hinaaro e na reira! Ua tamǎrû atura te tahuˈa ia ˈna ma te pîpî i nia ia ˈna i te tahi raau tahutahu, oia hoi e rauere anoihia i te pape, o ta ˈna i tuu i roto i te hoê farii.

Ma te faaohipa i te taata i roto i te hiˈo, ua na ô maira o ‘Papa ruau’ e no to matou fetii te fenua. Ua parau mai hoi oia i to ˈu mama ruau e e nehenehe ta ˈna e faaohipa i te fenua ma te haapeapea ore. Ua farii maira te tahi atu utuafare i taua faaotiraa ra. Ua faatitiaifarohia te peapea.”

 E mau ohipa matauhia teie i Afirika Tooa o te râ. I ǒ nei, mai te tahi atu mau vahi o te ao nei, e rave rahi mirioni taata o te tiaturi nei e e ora ˈtu te feia pohe i roto i te ao varua, i reira ratou e hiˈopoa mai ai e e faatere mai ai i te oraraa o te taata i nia i te fenua nei. Mea mau anei taua tiaturiraa ra? Te ora mau ra anei te feia pohe? Mai te peu e aita, o vai ïa tera mau varua o te parau ra e o ratou te feia herehia tei pohe? Mea faufaa roa hoi ia ite tatou i te mau pahonoraa tano i teie nei mau uiraa. Mea faufaa roa no to tatou ora.