No te aha ïa Satani e ta ˈna mau demoni e haa rahi ai no te haavare i te taata? No te mea te hinaaro nei ratou ia apiti tatou i roto i ta ratou orureraa hau. Te hinaaro ra ratou ia haamori tatou ia ratou. Te hinaaro ra ratou ia tiaturi tatou i ta ratou mau haavare e ia rave tatou i te mau mea ta Iehova e ore e au nei, mai e rave rahi peu no nia i te pohe.

Mea mauiui mau â ia pohe tei herehia e e ere i te mea tano ore ia faaite i to tatou oto. I muri aˈe i te poheraa o to Iesu hoa, o Lazaro, ua “taˈi ihora” Iesu.—Ioane 11:35.

E rave rahi peu no nia i te pohe e e taui te reira ia au i te fenua. E rave rahi o te ore e patoi ra i te mau faaueraa tumu Bibilia. Tera râ, ua niuhia vetahi mau peu i nia i teie manaˈo: te ora noa ra te feia pohe e e nehenehe ratou e ite i te feia ora. E faatupuhia ra te mau peu araraa i te po, te oto mâha ore e te mau hunaraa maˈi rahi roa ia ore te varua o te feia pohe e riri. “Aita râ a te feia i pohe ra e parau itea.” (Koheleta 9:5) No reira, te turu nei te feia e rave ra i teie mau peu i te haavare a Satani.

No roto mai te tahi atu mau peu aore ra mau oroa i te tiaturiraa e  te hinaaro ra te feia pohe i te tauturu a te feia ora e e haamauiui ratou i te feia ora mai te peu aita ratou e haamâhahia. I roto i te tahi mau fenua, e faatupuhia te tahi mau oroa e tusia e 40 mahana aore ra hoê matahiti i muri aˈe i te poheraa o te hoê taata. Te manaˈo ra ratou e nehenehe te reira e tauturu i te taata pohe ia haere i te ao varua. Te tahi atu peu matauhia, o te pûpûraa ïa i te maa e te inu na te feia pohe.

Mea hape mau teie mau ohipa no te mea te turu nei te reira i te mau haavare a Satani no nia i te pohe. E farii anei Iehova ia faatupu tatou i te mau peu niuhia i nia i te haapiiraa a te mau demoni? Eita roa ˈtu!—Korinetia 2, 6:14-18.

Eita roa ˈtu te mau tavini a te Atua mau e apiti atu i roto i te mau peu e turu ra i te mau haavare a Satani. Ma te here, e tutava râ ratou i te tauturu i te feia e ora nei e i te tamahanahana ia ratou. Ua ite ratou e ia pohe te hoê taata, o Iehova anaˈe te nehenehe e tauturu ia ˈna.—Ioba 14:14, 15.

Te peu tahutahu, o te apiti-roa-raa ˈtu ïa te hoê taata i te demoni aore ra na roto i te arai o te hoê taata hiˈohiˈo. E mau peu tahutahu anaˈe te ohipa vaudou, manamana, hiˈohiˈo e te uiuiraa i te feia pohe.

Te patoi ra te Bibilia i teie mau peu, a na ô ai e: “Eiaha roa te hoê i roto ia outou . . . ei pifao, e te hiˈo ata, e tei imi i te tapao, e te hiˈohiˈo, e te hebere, e te feia imi i te varua ino, e te taura, e te feia uiui i tei pohe ra. O te feia atoa hoi i rave i te reira ra mau peu, e feia faufau ïa na Iehova, e no te reira ra mau mea faufau i tiavaru ai to Atua ra o Iehova ia ratou i mua ia oe ra.”—Deuteronomi 18:10-12.

No te aha Iehova e faaara uˈana mai ai ia tatou eiaha roa ˈtu e rave i teie mau peu?

No to tatou maitai, te faaara mai ra Iehova eiaha tatou e rave i te mau huru peu tahutahu atoa.  Mea here e mea aupuru oia i te taata. Ua ite atoa oia e e mauiui te feia e apiti i te mau demoni.

O ta Nilda ïa i faaruru. E vahine hiˈohiˈo oia i Beresilia. Ua haafifi te mau demoni i to ˈna oraraa. Teie ta ˈna e faatia ra: “Ua uruhia vau . . . e te mau varua, na ratou e faatere mai ia ˈu. I te tahi taime, ua ite au eaha te tupu ra e i te tahi atu taime, aita ïa. Ua afaihia vau i te fare maˈi no te feia e fifi ra i te pae feruriraa. No te hamani ino rahi a te mau demoni i hepohepo rahi roa ˈi au. Ua rave atura vau i te mau raau faataoto e ua haamata aˈera vau i te inu tamau i te ava e i te puhipuhi rahi i te avaava. Ua fifihia vau e rave rahi matahiti i te maoro.”

I muri aˈe, maoti te tauturu a Iehova e a ta ˈna mau Ite i nia i te fenua nei, ua tiamâ maira o Nilda i te mana o te mau demoni. I teie nei, te ora nei oia i te hoê oraraa oaoa e te maitai. Te na ô ra o ˈna e: “Te faaitoito nei au i te taatoaraa ia ore roa ˈtu ratou, i te hoê noa ˈˈe taime, e apiti i te mau varua [iino].”