Mea ohie anei ia faaroo i to oe na metua?— I te tahi taime, e ere iho â i te mea ohie. Ua ite anei oe e ua faaroo, aore ra auraro, Iesu ia Iehova e i to ˈna na metua?— E nehenehe to ˈna hiˈoraa e tauturu atu ia faaroo i to oe na metua noa ˈtu e e ere i te mea ohie. E hiˈo anaˈe e nafea.

Hou a haere mai ai i te fenua nei, i ora na Iesu i to ˈna Metua ra o Iehova i te raˈi. E metua atoa râ to ˈna i te fenua nei o Iosepha e Maria to raua iˈoa. Ua ite anei oe mea nafea raua i riro mai ai ei metua no ˈna?—

Ua rave Iehova i te ora o Iesu e ua tuu i te reira i roto ia Maria ia fanauhia e ia ora Iesu i te fenua nei. E semeio tera! Mai te tahi atu mau aiû i roto i te opu o to ratou mama, ua rahi atoa mai Iesu i roto i te opu o Maria. Fatata e iva avaˈe i muri aˈe, fanauhia mai nei oia. Mea na reira ïa Maria e ta ˈna tane Iosepha i riro mai ai ei metua no Iesu i te fenua nei.

E 12 matahiti to Iesu i rave ai oia i te tahi mea tei haapapu i to ˈna here rahi i to ˈna Metua ra o Iehova. Ua tupu te reira a tere ai o ˈna e to ˈna utuafare i Ierusalema no te oroa Pasa. I nia i te purumu no te hoˈi i te fare, ite aˈera Maria e Iosepha e aita Iesu ia ratou ra. Ua ite anei oe teihea o ˈna?—

Ua hoˈi oioi atura Iosepha e Maria i Ierusalema no te imi ia Iesu. Ua peapea roa raua, aita hoi oia i itehia mai. E toru mahana i muri aˈe, hitimahuta ˈtura raua i te iteraa ia ˈna i te hiero! I to oe manaˈo, no te aha o ˈna i haere ai i reira?— No te mea i tera vahi o ˈna e nehenehe ai e haapii no nia i to ˈna Metua ra o Iehova. Ua here oia ia Iehova e ua hinaaro e ite e nafea oia e auhia ˈi e te Atua. Ei tamarii aore ra ei taata paari, ua auraro noa Iesu ia Iehova. Ua na reira atoa noa ˈtu e e mea fifi e e titauhia ia mauiui o ˈna. Ua faaroo atoa anei Iesu ia Iosepha e Maria?— Te parau ra te Bibilia e e.

Eaha te haapii mai i te hiˈoraa o Iesu?— Noa ˈtu e mea fifi, e titauhia ia faaroo i to oe na metua. E na reira anei oe?—