O Iehova to tatou Atua poiete. Ua poiete oia i te mau mea atoa: te mau mea ta tatou e ite mata nei e te mau mea ta tatou e ore e ite mata nei. Hou a poiete ai oia i ta tatou e ite mata nei, ua poiete oia i e rave rahi roa melahi. Ua ite anei oe mai te aha te huru o te mau melahi? Hoê â huru to ratou e to Iehova. Eita tatou e nehenehe e ite mata ia ratou e ia Iehova. Ua riro te melahi matamua ta Iehova i poiete ei tauturu na ˈNa. Ua tauturu teie melahi ia Iehova a poiete ai Oia i te mau fetia, te mau paraneta e hau atu â. Hoê o te mau paraneta tei poietehia, o te fenua ïa, to tatou nohoraa nehenehe mau.

I muri iho, ua faaineine Iehova i te fenua ia nehenehe te mau animara e te mau taata e ora i nia i te reira. Ua faaohipa oia i te maramarama o te mahana no te turama i te fenua. Ua poiete Iehova i te mau mouˈa, te moana e te mau anavai.

Eaha tei tupu i muri iho? Ua parau Iehova: ‘E poiete au i te matie, te mau raau tanu e te mau tumu raau.’ Ua tupu e rave rau maa hotu, maa tanu e tiare. I muri iho, ua poiete Iehova i te mau animara atoa. E nehenehe te tahi mau animara e rere, e ǎu aore ra e nee. Ua poiete Iehova i te mau animara nainai mai te rapiti e i te mau animara rarahi, mai te elefani. Eaha te animara ta oe e au roa ˈˈe?

I muri aˈe, ua parau Iehova i te melahi matamua: ‘E poiete tâua i te taata.’ E mea taa ê te taata i te animara. E nehenehe te taata e hamani i te tahi mea apî, e paraparau, e ata e e pure. Ua poietehia te taata no te  haapao maitai i te fenua e i te mau animara. Ua ite anei oe o vai te taata matamua? Ta tâua ïa e ite i muri iho.