Ua hoˈi te rahiraa no Iseraela i Ierusalema a 70 matahiti i teie nei. Ua ora noa râ vetahi i te tahi mau tuhaa fenua o te Hau emepera Peresia. I rotopu ia ratou, i vai na te hoê tahuˈa, o Ezera to ˈna iˈoa. Ua haapii atu oia i te Ture a Iehova. Ua ite ia Ezera e aita te nunaa i Ierusalema i haapao faahou i te Ture e ua hinaaro oia e haere e tauturu ia ratou. Ua parau te arii Peresia, o Aretehasaseta, ia ˈna: ‘Maoti te Atua oe i î ai i te paari ia nehenehe oe e haapii atu i ta ˈna Ture. A haere e ia haere atoa te taata o te hinaaro e apiti ia oe.’ Ua farerei Ezera i te feia atoa tei hinaaro e hoˈi i Ierusalema. Na roto i te pure, ua ani ratou ia Iehova ia paruru ia ratou i te roaraa o te tere atea e ua haere atu ratou.

E maha avaˈe i muri iho, ua tae ratou i Ierusalema. I ǒ, ua parau te hui arii ia Ezera: ‘Ua faaroo ore to Iseraela ia Iehova e ua faaipoipo ratou i te mau vahine o te haamori ra i te mau atua hape.’ Eaha ta Ezera i rave? I mua i te nunaa, ua tipapa e ua pure oia: ‘E Iehova e, mea rahi ta oe i rave no matou. Ua hara râ matou i mua ia oe.’ Ua tatarahapa te nunaa. Tera râ, ua tamau ratou i te rave i te ohipa ino. Ua maiti Ezera i te mau matahiapo e tavana no te haapao i tera mau fifi. I te roaraa o to muri nei avaˈe e toru, ua tiahihia te feia o tei ore i haamori ia Iehova.

Hoê ahuru ma piti matahiti tei mairi. I roto i tera area taime, ua patu-faahou-hia te mau patu tei haaati ia Ierusalema. Ua haaputuputu atura Ezera i te nunaa i te hoê vahi o te oire no te taio atu i te Ture a te Atua. I te taime Ezera i tatara ˈi i te buka, ua tia te nunaa i nia. Ua arue Ezera ia Iehova e ua toro te nunaa i to ratou rima i nia no te faaite e ua farii ratou i te Ture. I muri iho, ua taio e ua faataa Ezera i te Ture e ua faaroo maitai te nunaa. Ua taa ˈtura ratou ua atea ê faahou â ratou ia Iehova. Ua taˈi atura ratou. I te mahana i muri iho, ua taio atu â Ezera i te Ture no ratou. Ua haapii mai te nunaa e fatata roa te Oroa patiaraa tiahapa e e mea tia ia faatupu i te reira. I taua iho â taime, ua haamata ratou i te faaineine i tera oroa.

 I te roaraa o na hitu mahana o te oroa, ua oaoa noa te nunaa e ua haamauruuru ratou ia Iehova no te ootiraa maitai. Aita ˈtu â Oroa patiaraa tiahapa mai teie, mai te tau o Iosua mai â. I muri aˈe i te oroa, ua putuputu te nunaa e ua pure ratou: ‘E Iehova e, ua faaora oe ia matou mai te faatîtîraa mai, ua faatamaa oe ia matou i roto i te medebara e ua horoa oe ia matou i teie fenua nehenehe mau. Tera râ, ua tamau noa matou i te faaroo ore ia oe. Ua tono oe i te mau peropheta no te faaara ia matou. Aita râ matou i faaroo atu. Ua faaite noa râ oe i te faaoromai ia matou nei. Ua tapea oe i ta oe i fafau ia Aberahama. I teie nei, te euhe nei matou e e faaroo matou ia oe.’ Ua papai roa ratou i ta ratou i euhe e ua tarima te hui arii, te ati Levi e te mau tahuˈa i te reira.