E toru hoa piri to Iesu tei ora i Betania. O Lazaro ïa e to ˈna na tuahine, o Maria raua Mareta. I te hoê mahana, tei te tahi atu pae o Ioridana o Iesu e ua faatae o Maria raua Mareta ia ˈna i te hoê poroi ru: ‘Ua maˈi-roa-hia o Lazaro. A haere oioi mai na!’ Aita râ o Iesu i haere oioi atu. Ua tiai oia e piti mahana i te maoro e i muri iho ua parau oia i ta ˈna mau pǐpǐ: ‘E haere anaˈe i Betania. Te taoto ra o Lazaro e te haere atu nei au no te faaara ia ˈna.’ Ua na ô atura te mau aposetolo: ‘Ia taoto o Lazaro, e maitai mai ïa oia.’ No reira Iesu i haapapu roa ˈi: ‘Ua pohe o Lazaro.’

I to Iesu taeraa ˈtu i Betania, a maha mahana ˈtura hoi o Lazaro i te hunaraahia. Ua haere mai e rave rahi taata no te tamahanahana ia Mareta raua Maria. I to Mareta faarooraa e ua tae mai o Iesu, ua horo oia no te farerei ia ˈna. Ua na ô oia: “Fatu, ahani oe i ǒ nei, e ore ïa to ˈu taeae e pohe.” Ua parau atura o Iesu: ‘E ora faahou mai to oe taeae. Te tiaturi anei ra oe i te reira, e Mareta e?’ Ua pahono oia: ‘Te tiaturi nei au e ora faahou mai to ˈu taeae i te mahana e tupu ai te tia-faahou-raa.’ Ua parau atura o Iesu ia ˈna: “O vau te tia-faahou-raa e te ora.”

I muri iho, ua haere o Mareta ia Maria ra e ua parau atura oia: ‘Ua tae mai o Iesu.’ Ua horo atura o Maria ia Iesu ra e ua apee mai te hoê nahoa taata. Ua tipapa ˈtura o Maria i te pae avae o Iesu e ua taˈi noa oia. Ua parau oia: ‘E te Fatu e, ahani oe i ǒ nei, e ora noa mai ïa to ˈu taeae!’ Ua ite Iesu e ua mauiui roa o Maria. Ua haamata atoa o Iesu i te taˈi. I to te nahoa taata iteraa i to Iesu mau roimata, ua na ô ratou: ‘A hiˈo na, mea here mau â na Iesu ia Lazaro.’ Ua uiui râ vetahi: ‘No te aha aita oia i faaora i to ˈna hoa?’ Eaha ta Iesu i rave i muri iho?

Ua haere o Iesu i te menema tei opanihia i te hoê ofai rarahi. Ua faaue o Iesu: ‘A turai i te ofai.’ Ua parau atura o Mareta: ‘A maha ˈtura hoi mahana i teie nei! E hauˈa ino te tino pohe.’ Noa ˈtu râ, ua turai ratou i te ofai e ua pure o Iesu: ‘E to ˈu Metua e, mauruuru i te faarooraa mai ia ˈu. Ua ite au e e faaroo noa mai oe ia ˈu. Tera râ, te pure nei au ma te reo puai ia nehenehe teie mau taata e ite e na oe i tono mai ia ˈu.’ I muri iho, ua tuô oia: “Lazaro, haere mai i rapae!” Ua tupu atura te hoê ohipa maere mau: ua haere mai o Lazaro i rapae i te menema, ua vehî-noa-hia to ˈna na avae  e na rima e te tahi mau ahu. Ua parau o Iesu: “A tatara i te ahu i vehîhia ˈi oia e a tuu ia ˈna ia haere.”

I to ratou iteraa i te reira, e rave rahi tei faatupu i te faaroo ia Iesu. Te vai ra râ o tei haere e farerei i te mau Pharisea no te faaite atu eaha tei tupu. Mai reira mai, ua hinaaro te mau Pharisea e haapohe ia Lazaro e ia Iesu. Ua haere o Iuda Isakariota, hoê o na aposetolo 12, e farerei huna i te mau Pharisea e ua ani atu oia: ‘Mai te peu e tauturu vau ia outou ia ite teihea ra o Iesu, ehia moni ta outou e aufau mai?’ Ua farii ratou i te aufau atu e 30 moni ario. Ua imi atura o Iuda i te ravea ia nehenehe te mau Pharisea e haru ia Iesu.