Ua faatupu te ati Iuda i te oroa Pasa i te matahiti taitahi i te 14 no te avaˈe Nisana. E haamanaˈo ïa ratou e nafea Iehova i faaora ˈi ia ratou i te faatîtîraa i Aiphiti e e nafea oia i aratai ai ia ratou i te Fenua tǎpǔhia. I te matahiti 33, ua faatupu o Iesu e ta ˈna mau aposetolo i te oroa Pasa i Ierusalema i te hoê piha i nia. A oti ai te reira, ua parau o Iesu: ‘Te vai ra hoê o outou o te taiva ia ˈu.’ Ua huru ê roa te mau aposetolo e ua ani ratou ia Iesu: ‘O vai tera taata?’ Ua pahono atura Iesu: ‘O te taata ta ˈu e horoa ˈtu i tera pane.’ Ua horoa ˈtura o Iesu i te pane ia Iuda Isakariota. Oioi o Iuda i te tia e i te faarue i te piha.

I muri iho, ua pure o Iesu, ua ofatifati oia i te pane e ua toro oia i te reira i te mau aposetolo tei faaea ia ˈna ra. Ua parau oia: ‘A amu i tera pane. E faahohoˈaraa te reira i to ˈu tino ta ˈu e horoa ˈtu na outou.’ I muri iho, ua pure oia no te tahi auˈa uaina e ua horoa oia i te reira i ta ˈna mau aposetolo. Ua parau oia: ‘A inu i tera uaina. E faahohoˈaraa te reira i to ˈu toto ta ˈu e horoa ˈtu no te faaore i te mau hara. Te fafau atu nei au e e apiti outou ia ˈu ei arii i te raˈi. A faatupu i te reira i te matahiti taitahi no te haamanaˈo ia ˈu.’ Te na reira noa ra te mau pǐpǐ a Iesu hoê taime i te matahiti taitahi i te ahiahi. Teie putuputuraa, o te Amuraa maa ïa a te Fatu.

 I muri iho i te amuraa maa, ua aimârô atura te mau aposetolo no te ite o vai te mea rahi aˈe i rotopu ia ratou. Ua parau râ Iesu ia ratou: ‘Ia riro te taata rahi aˈe i rotopu ia outou mai te tamarii hopea e mai te taata haihai aˈe.

‘O outou to ˈu mau hoa. Te faaite atu nei au i te mau mea atoa ta to ˈu Metua e hinaaro ra ia faaite atu vau. Fatata roa vau i te hoˈi atu i te raˈi i to ˈu Metua ra. E vai outou i ǒ nei. E ite te mau taata e pǐpǐ outou na ˈu maoti to outou here te tahi i te tahi. E mea tia ia here outou te tahi i te tahi mai ia ˈu i here ia outou.’

I te pae hopea, ua pure o Iesu no te ani ia Iehova ia paruru i ta ˈna mau pǐpǐ atoa. Ua ani oia ia Iehova ia tauturu ia ratou ia ohipa amui i roto i te hau. Ua pure oia ia moˈa to Iehova iˈoa. I muri iho, ua himene o Iesu e ta ˈna mau aposetolo i te mau himene no te arue ia Iehova e ua haere ratou i rapae. Fatata te taime e tapeahia ˈi o Iesu.