I te hoê mahana, ua paraparau te tahi ophi ia Eva. O Eva anaˈe ïa i taua taime ra. Ua na ô te ophi: ‘Mea papu anei e eita te Atua e vaiiho ia orua ia amu i te hotu o te mau tumu raau atoa?’ Ua pahono atu Eva: ‘E nehenehe mâua e amu i te hotu o te mau tumu raau atoa, eiaha râ i to te hoê tumu raau. Ia amu mâua, e pohe ïa mâua.’ Ua na ô râ te ophi: ‘Eita orua e pohe. Ia amu orua i to tera tumu raau, e riro orua mai te Atua ra te huru.’ E parau mau anei te reira? E ere. E parau haavare te reira. Ua tiaturi râ Eva i tera parau. Rahi atu â Eva i te hiˈo i te hotu opanihia, rahi atu â ïa to ˈna hinaaro e amu i te reira. Ua amu Eva i te hotu e ua horoa atoa oia i te tahi na Adamu. Ua ite hoi Adamu e ia ore raua e faaroo i te Atua, e pohe raua. Ua amu râ Adamu i te hotu.

I muri iho i taua mahana ra, ua paraparau Iehova ia Adamu raua Eva. Ua ani oia no te aha raua i ore ai i faaroo ia ˈna. Ua pari Eva i te ophi e ua pari Adamu ia Eva. Ua tiahi Iehova ia Adamu raua Eva i rapae i te ô no te mea aita raua i faaroo ia ˈna. No te haapapu e eita raua e tomo faahou i roto i te ô, ua tuu Iehova i te mau melahi e te hoê ˈoˈe ura no te tiai i te vahi tomoraa.

Ua faaite Iehova e e faautua oia i tei haavare ia Eva. E ere na te ophi i paraparau ia Eva. Aita hoi Iehova i poiete i te ophi ia nehenehe e paraparau. E melahi ino tei haaparaparau i te ophi. Ua na reira oia no te haavare ia Eva. O Satani te Diabolo te iˈoa o tera melahi. I a muri aˈe, e haapohe Iehova ia Satani. Eita ïa oia e haavare faahou i te mau taata e e turai ia ratou ia rave i te mau ohipa ino.