Ua ora o Lota e to ˈna fetii, o Aberahama, i te fenua o Kanaana. E rave rahi roa animara to Aberahama e to Lota i muri iho. Aita ïa te fenua i navai no tera mau animara atoa. Ua parau atura Aberahama ia Lota: ‘Aita tatou pauroa e nehenehe faahou e ora i te hoê â vahi. A maiti na ihea oe e hinaaro ai e haere. E haere ïa vau i te tahi atu pae.’ Mea miimii ore o Aberahama, e ere anei?

Ua ite Lota i te hoê tuhaa fenua nehenehe mau, i pihai iho i te oire o Sodoma. Te vai ra te pape e mea rahi te aihere. Ua maiti ïa oia i tera vahi e ua haere to ˈna utuafare i reira.

Mea ino roa te feia no Sodoma e no Gomora, te oire i pihai iho. No to ratou ino rahi, ua faaoti Iehova ia haamou i tera mau oire. Ua hinaaro râ te Atua e faaora ia Lota e i to ˈna utuafare. Ua tono ïa oia i e piti melahi no te faaara ia ratou: ‘Haaviti! A faarue i tera oire! Fatata Iehova i te haamou i te reira!’

Aita Lota i faarue oioi i te oire. Ua haataere râ oia. Ua aratai ïa te mau melahi ia Lota, ta ˈna vahine e ta ˈna na tamahine e piti ma te tapea i to ratou rima. Ua haavitiviti te mau melahi i te afai ia ratou i rapae i te oire e ua parau atu: ‘A horo! A horo no to outou ora e eiaha roa e hiˈo i muri. Ia hiˈo outou i muri, e pohe outou!’

I to ratou taeraa ˈtu i te oire o Zoara, ua faatopa Iehova i te auahi mai te raˈi mai no te haamou roa ia Sodoma e Gomora. Aita te vahine a Lota i  faaroo ia Iehova e ua hiˈo oia i muri. Riro atura oia ei pou miti! Ua ora râ Lota e ta ˈna na tamahine no te mea ua faaroo ratou ia Iehova. Ua mauiui roa ratou no te mea aita te vahine a Lota i faaroo. Ua oaoa râ ratou no te mea ua pee ratou i ta Iehova mau faaueraa.