Ua ite ia Iezebela eaha tei tupu i nia i te mau peropheta a Baala e ua riri roa oia. Ua faatae oia i te hoê poroi ia Elia: ‘Ananahi, e pohe oe mai te mau peropheta a Baala.’ Ua riaria roa o Elia e ua horo ê oia no te haere i te medebara. Ua pure oia: ‘E Iehova e, ua oti roa vau. Ia pohe au!’ No to ˈna rohirohi, ua taoto Elia i raro aˈe i te hoê tumu raau.

Ua faaara ˈtu te hoê melahi ia ˈna e ua parau oia ma te mǎrû: ‘A tia e a tamaa.’ Ua ite Elia i te hoê pane iti tunuhia i nia i te arahu e i te hoê farii pape. Ua amu e ua inu oia i te reira. Ia oti, ua haere atura oia e taoto. Ua faaara faahou te melahi ia ˈna e ua parau atu: ‘A tamaa. Ia puaihia oe no to oe tere.’ Ua tamaa faahou Elia. I muri iho, ua tere oia e 40 ao e e 40 po no te haere i te mouˈa Horeba. I to ˈna tapaeraa i reira, ua haere Elia e taoto i roto i te hoê ana. Ua paraparau râ Iehova ia ˈna, a na ô ai: ‘Eaha ta oe e rave ra i ǒ nei, Elia?’ Ua pahono atura Elia: ‘Aita to Iseraela i tapea i ta ratou i euhe ia oe. Ua haaparari ratou i ta oe mau fata e ua haapohe ratou i ta oe mau peropheta. I teie nei, te tamata nei ratou i te haapohe ia ˈu.’

Ua parau atura Iehova ia ˈna: ‘A haere e a tia i nia i te mouˈa.’ I te omuaraa, ua puhipuhi puai te mataˈi i rapaeau i te ana. I muri iho, ua aueue te fenua e ua itehia te auahi. I te pae hopea, ua faaroo Elia i te hoê reo iti haihai. Ua faaohipa oia i to ˈna ahu no te paruru i to ˈna na mata e ua vai oia i rapaeau i te ana. Ua ani atura Iehova ia ˈna e no te aha oia i horo ê ai. Ua pahono Elia: ‘O vau anaˈe te toe ra.’ Tera râ ua parau Iehova ia ˈna: ‘E ere roa ˈtu o oe anaˈe. E 7 000 taata i Iseraela o te haamori noâ nei ia ˈu. A haere ia Elisaia ra e a faatoroa ia ˈna ei peropheta no te mono ia oe.’ Ua haere oioi Elia e rave i ta Iehova i parau ia ˈna. A feruri na: Mai te peu e rave oe i ta Iehova e hinaaro ra, e tauturu atoa anei oia ia oe? Papu maitai e, e. E hiˈo anaˈe tâua eaha tei tupu i te tau paˈurâ.