Ua haru te Hau emepera o Asura i te faatereraa arii o na opu ahuru o Iseraela. I muri iho, ua hinaaro Senakeriba, te arii o Asura, e haru i te faatereraa arii o na opu e piti o Iuda. Ua haamata oia i te haru mai i te oire taitahi o Iuda, hoê oire i muri aˈe i te tahi. Te oire râ ta ˈna i hinaaro rahi roa ˈˈe, o Ierusalema ïa. Aita Senakeriba i manaˈo aˈe e te paruru nei Iehova ia Ierusalema.

Ua aufau atu o Hezekia, te arii o Iuda, i e rave rahi moni ia Senakeriba ia ore oia e haru ia Ierusalema. Tera râ, noa ˈtu e ua fanaˈo Senakeriba i te moni, ua tono oia i ta ˈna nuu puai mau no te aro ia Ierusalema. Ua riaria roa te feia o tera oire no te mea te haafatata ˈtu â ra to Asura ia Ierusalema. Ua parau atura Hezekia ia ratou: ‘Eiaha e mǎtaˈu. Mea puai to Asura, mea puai aˈe râ tatou ia ratou maoti Iehova.’

Ua tono Senakeriba i ta ˈna vea, o Rabasake, i Ierusalema no te faaooo i te nunaa. Ua vai Rabasake i rapaeau i te oire e ua tuô oia: ‘Eita Iehova e nehenehe e tauturu ia outou. Eiaha e vaiiho ia Hezekia ia haavare ia outou. Eita hoê aˈe atua o te nehenehe e paruru ia outou i to matou rima.’

Ua ani atura Hezekia ia Iehova eaha te rave. Ua pahono Iehova: ‘Eiaha e mǎtaˈu no ta Rabasake i parau. Eita Senakeriba e haru ia Ierusalema.’ I muri iho, ua hapono Senakeriba i te tahi mau rata ia Hezekia. Ua papai oia: ‘Faaea i te patoi mai. Eita Iehova e nehenehe e faaora ia outou.’ Ua pure Hezekia: ‘E Iehova e, a faaora mai na ia matou, ia nehenehe te mau taata atoa e ite e o oe anaˈe te Atua mau.’ Ua parau atura Iehova ia ˈna: ‘Eita te arii no Asura e tomo i roto ia Ierusalema. E paruru vau i to ˈu oire.’

Ua papu ia Senakeriba e e haru oia ia Ierusalema. Tera râ, i taua po ra, ua tono Iehova i te hoê melahi i te vahi i rapaeau  i te oire, i reira te mau faehau i puhapa ˈi. Ua haapohe taua melahi ra e 185 000 faehau! Ua ere te arii Senakeriba i ta ˈna mau faehau puai roa ˈˈe. Aita e ravea faahou no ˈna. Ua hoˈi oia i to ˈna fenua inaha ua pau oia. Ua paruru Iehova ia Hezekia e ia Ierusalema, mai ta ˈna i fafau. Mai te peu e tei Ierusalema oe i taua tau ra, e tiaturi anei oe ia Iehova?