1-3. (a) Te faahiti ra te Bibilia i teihea parau mau eita e tia ia ape? (b) E nafea e tia ˈi ia tatou ia maiti i te mau hoa o te turai ia tatou ia rave i te maitai?

 EI AURAA parau, e au te taata i te rimu. E apo mai ratou i te mau mea atoa e haaati ra ia ratou. Mea ohie roa ia farii, ma te opua ore atoa, i te mau peu, ture aveia e huru taata o te feia ta tatou e amuimui roa.

² Te faahiti ra te Bibilia i te hoê parau mau eita e tia ia ape: “O tei amui atoa to ˈna haerea i to te feia paari ra, e paari atoa ïa; o tei amui râ i te feia maamaa ra, e pohe ïa.” (Maseli 13:20) Aita teie maseli e faahiti ra i te tahi noa farereiraa. Te horoa ra te mau parau “amui atoa to ˈna haerea” i te manaˈo o te farereiraa tamau. a No nia i teie irava, te na ô ra te hoê papai Bibilia: “E titau te amuiraa to ˈna haerea i to te hoê taata i te here e te taairaa.” Aita anei oe e manaˈo atoa ra e e pee haere noa tatou i te feia ta tatou e here ra? Oia mau, no te mea e mea piri roa tatou i te feia ta tatou e here ra, e nehenehe ratou e ohipa puai i nia ia tatou, no te maitai aore ra no te ino.

³ Ia here noa te Atua ia tatou, mea faufaa roa ia imi tatou i te mau hoa o te turai ia tatou ia rave i te maitai. E nafea ïa? Ma te here noa ïa i te feia ta te Atua e here ra, ma te  faahoa i to ˈna mau hoa. A feruri na. O vai ïa hoa maitai aˈe ta tatou e nehenehe e maiti, e ere anei te feia e huru maitatai to ratou ta Iehova e tiai ra ia faahotu to ˈna mau hoa? No reira, e hiˈopoa anaˈe i te huru taata herehia e te Atua. Ia taa maitai ia tatou te manaˈo o Iehova, ua ineine maitai aˈe ïa tatou i te maiti i te mau hoa maitatai.

4. No te aha e tiaraa ˈi to Iehova e maiti maitai i to ˈna mau hoa, e no te aha Iehova i parau ai ia Aberahama “tau hoa”?

⁴ E maiti maitai Iehova i to ˈna mau hoa. Aita anei to ˈna e tiaraa e na reira? Oia, o ˈna hoi te Arii hau ê e Fatu o te ao taatoa. E fanaˈoraa rahi roa ia faahoa ia ˈna. O vai ïa ta ˈna e maiti ei hoa no ˈna? E haafatata Iehova i te feia e tiaturi ra ia ˈna e e tuu ra i to ratou faaroo taatoa ia ˈna. A rave na i te hiˈoraa o te patereareha Aberahama, te hoê taata tei matauhia no to ˈna faaroo iti rahi. Aita ˈtu e tamataraa rahi aˈe i te faaroo no te hoê metua tane maori râ ia anihia o ˈna ia pûpû i ta ˈna tamaiti ei tusia. b Ua tae roa “Aberahama i te pûpû ia Isaaka ei tusia,” ma te tiaturi papu e “e nehenehe ta te Atua e faatia mai i ta ˈna tamaiti mai te pohe mai.” (Hebera 11:17-19) No to Aberahama faaiteraa i tera huru faaroo e auraro, ua parau Iehova ia ˈna ma te here “tau hoa.”—Isaia 41:8; Iakobo 2:21-23.

5. Eaha to Iehova manaˈo i te feia e faaroo ra ia ˈna ma te taiva ore?

⁵ Mea faufaa roa no Iehova ia faaroo tatou ia ˈna ma te taiva ore. Te here ra oia i te feia i ineine i te tuu i te aroha, aore ra taiva ore, ia ˈna i nia ˈˈe i te tahi atu mau mea atoa. (A taio i te Samuela 2, 22:26.) Mai ta tatou i ite i te pene 1 o teie buka, e oaoa roa Iehova i te feia e maiti i te faaroo  ia ˈna ma te here. “Tei te feia parau-tia ra ta ˈna parau moe [aore ra to ˈna auhoaraa piri roa],” ia au i te Maseli 3:32. E fanaˈo te feia o te haapao maite ra i te mau titauraa a te Atua i te hoê titau-manihini-raa au maitai a Iehova: E nehenehe ratou e tiahapa i to ˈna “sekene,” oia hoi e farii-popou-hia no te haamori ia ˈna e no te pure ia ˈna i te mau taime atoa.—Salamo 15:1-5.

6. E nafea tatou e faaite ai e te here ra tatou ia Iesu, e eaha te huru aau o Iehova no te feia e here ra i ta ˈna Tamaiti?

⁶ Te here ra Iehova i te feia e here ra ia Iesu, ta ˈna Tamaiti otahi. Ua parau Iesu: “Ia here te hoê taata ia ˈu, e haapao ïa o ˈna i ta ˈu parau, e here to ˈu Metua ia ˈna e e haere atu mâua ia ˈna ra, a faaea roa ˈtu ai i ǒ ˈna.” (Ioane 14:23) E nafea ia faaite i to tatou here no Iesu? Ma te haapao iho â ïa i ta ˈna mau faaueraa, oia atoa te ohipa faauehia e poro i te parau apî oaoa e e faariro i te taata ei pǐpǐ. (Mataio 28:19, 20; Ioane 14:15, 21) E faaite atoa tatou i to tatou here no Iesu ia “pee maite [ta]tou i to ˈna mau taahiraa avae,” na roto i te pee-maite-raa i to ˈna hiˈoraa i roto i te parau e te ohipa ei taata tia ore. (Petero 1, 2:21) Te putapû ra te aau o Iehova i te mau tutavaraa a te feia, te turai ra to ratou here no ta ˈna Tamaiti ia ratou ia pee i te haerea o te Mesia.

7. No te aha e haerea paari ai ia faahoa i te mau hoa o Iehova?

⁷ Te faaroo, te taiva ore, te auraro e te here no Iesu e te hinaaro i ta ˈna mau ture aveia, o te tahi noa ïa huru maitatai teie ta Iehova e tiai ra ia faahotu to ˈna mau hoa. E mea maitai ia ui tatou ia tatou iho: ‘Te itehia ra anei tera mau huru maitatai e ture aveia i nia i to ˈu mau hoa rahi? Ua faariro anei au i to Iehova mau hoa ei hoa no ˈu?’ E haerea paari ia na reira. E nehenehe te feia o te atuatu ra i te mau huru maitatai o te Atua e o te poro ra i te parau apî oaoa o te Faatereraa arii ma te itoito rahi, e ohipa maitai i nia ia tatou, ma te turai ia tatou ia tapea i ta tatou faaotiraa  papu e faaoaoa i te Atua.—A hiˈo i te tumu parau “ O vai te hoa maitai?”

8. Eaha ta oe e faahiahia ra no nia i te taairaa i rotopu (a) ia Naomi e ia Ruta? (b) i na Hebera apî e toru? (c) ia Paulo e ia Timoteo?

⁸ I roto i te mau Papai, mea rahi te hiˈoraa o te feia tei maitai no to ratou maitiraa i te mau hoa maitatai. E nehenehe oe e taio i te taairaa i rotopu ia Naomi e ta ˈna hunoa vahine o Ruta, i rotopu i na Hebera apî e toru o ratou noa i Babulonia, e i rotopu ia Paulo e ia Timoteo. (Ruta 1:16; Daniela 3:17, 18; Korinetia 1, 4:17; Philipi 2:20-22) E hiˈopoa râ tatou i te tahi atu hiˈoraa faahiahia roa: te auhoaraa i rotopu ia Davida e ia Ionatana.

9, 10. Eaha te niu o te auhoaraa i rotopu ia Davida e ia Ionatana?

⁹ Te parau ra te Bibilia e i muri aˈe i to Davida haapoheraa ia Golia, ua ati roa te aau o Ionatana i te aau o Davida, e ua here atura Ionatana ia Davida mai ia ˈna iho. (Samuela 1, 18:1) I reira ïa te haamataraa te hoê auhoaraa mutu ore noa ˈtu te taa-ê-raa rahi o te faito matahiti, e tae noa ˈtu i te poheraa o Ionatana i te tahua aroraa. c (Samuela 2, 1:26) Eaha te niu o te taairaa puai i rotopu i teie nau hoa?

¹⁰ Mea piri roa Davida raua Ionatana no to raua here i te Atua e to raua hinaaro puai e tapea i to raua taiva ore ia ˈna. E taairaa pae varua to teie nau tane. Ua faaite raua tataitahi i te mau huru maitatai a here atu ai te tahi i te tahi. Eita e ore e ua maere Ionatana i te mǎtaˈu ore e te itoito rahi o te taurearea ra o tei paturu ma te riaria ore i te iˈoa o Iehova. Mea papu e ua faatura Davida i te taata paari ra o tei turu ma te taiva ore i te mau faanahoraa a Iehova,  e o tei haapao ma te miimii ore i te maitai o Davida na mua ˈˈe i to ˈna iho. A hiˈo na i te ohipa i tupu a toaruaru roa ˈi Davida, o te tapuni haere noa ra na te medebara no te maue ê i te riri rahi o te arii ino ra o Saula, te metua tane o Ionatana. I roto i te hoê faaiteraa faahiahia i te taiva ore, ua tia aˈera Ionatana e “haere atura ia Davida ra . . . e ua haamahanahana ˈtura ia ˈna ia tiaturi oia i te Atua.”  (Samuela 1, 23:16) A feruri na i te huru aau o Davida i te haereraa ˈtu to ˈna hoa here e tamahanahana e e faaitoito ia ˈna! d

11. Eaha ta te hiˈoraa o Ionatana raua Davida e haapii ra ia oe no nia i te auhoaraa?

¹¹ Eaha ta te hiˈoraa o Ionatana raua Davida e haapii mai ra? Na mua roa, te ite ra tatou e te mea faufaa roa ˈˈe, oia ïa hoê â aratairaa pae varua ta te mau hoa. Ia haafatata tatou i te feia hoê â tiaturiraa ta tatou, hoê â manaˈo no nia  i te maitai e te ino, e hinaaro atoa ra e tapea i te taiva ore i te Atua, e nehenehe tatou e tufa te tahi i te tahi i te mau manaˈo, huru aau e tupuraa o te faaitoito e o te patu ia tatou. (A taio i te Roma 1:11, 12.) E ite tatou i tera mau huru hoa maitai i te pae varua i rotopu i te feia haamori ia Iehova. Te auraa anei râ ïa e e hoa maitai te feia atoa e haere ra i te mau putuputuraa i te Piha a te Basileia? Eita.

12, 13. (a) No te aha e titauhia ˈi ia maiti maitai tatou i te mau hoa i rotopu atoa i te mau Kerisetiano? (b) Eaha te fifi i roto i te mau amuiraa i te senekele matamua, a horoa ˈtu ai Paulo i teihea mau faaararaa papu maitai?

¹² I roto atoa i te amuiraa, e titauhia ia maiti tatou i te mau hoa o te patu ia tatou i te pae varua. E maere anei tatou i te reira? Eiaha. Mea haere maine paha te tahi mau Kerisetiano i roto i te amuiraa i te titau i te paariraa pae varua, mai te tahi mau maa hotu o te hoê tumu raau o te ore e paari oioi. No reira, i roto i te mau amuiraa atoa, e ite tatou i te mau Kerisetiano e ere hoê â faito tupuraa pae varua to ratou. (Hebera 5:12–6:3) Parau mau, e faaite tatou i te faaoromai e te here i te feia tae apî mai aore ra paruparu aˈe, no te mea e hinaaro tatou e tauturu ia ratou ia paari i te pae varua.—Roma 14:1; 15:1.

¹³ I te tahi taime, e fa mai paha te hoê tupuraa i roto i te amuiraa o te titau ia tatou ia ara i ta tatou mau amuimuiraa. E pee paha te tahi mau mero i te hoê haerea tano ore. E faatupu paha te tahi atu i te hoê huru feruriraa amuamu aore ra inoino. Tera atoa tei tupu i roto i te mau amuiraa i te senekele matamua. Noa ˈtu e mea haapao maitai te rahiraa o te mau mero, e haerea tano ore to vetahi. Aita vetahi i roto i te amuiraa i Korinetia i turu i te tahi mau haapiiraa Kerisetiano, no reira te aposetolo Paulo i faaara ˈi i te amuiraa: “Eiaha outou ia vare. E ino te haerea maitai i te  amuimuiraa i te feia iino.” (Korinetia 1, 15:12, 33) Ua faaara Paulo ia Timoteo e i rotopu atoa i te mau hoa Kerisetiano, te vai ra vetahi o te ore e haa ma te afaro. Ua parauhia ia Timoteo e ape i tera mau huru taata, eiaha e faariro ia ratou ei hoa rahi no ˈna.—A taio i te Timoteo 2, 2:20-22.

14. E nafea ia faaohipa i te faaueraa tumu o te mau faaararaa a Paulo no nia i te mau amuimuiraa?

¹⁴ E nafea ia faaohipa i te faaueraa tumu o te mau faaararaa a Paulo? Ma te ape i te amuimui roa i te taata atoa, i rapae e i roto i te amuiraa, o te nehenehe e faaino ia tatou. (Tesalonia 2, 3:6, 7, 14) E titauhia ia paruru tatou i to tatou taairaa e o Iehova. A haamanaˈo e mai te hoê rimu, e apo mai tatou i te mau haerea e ture aveia a to tatou mau hoa rahi. Eita e tia ia tatou ia tutau i te hoê rimu i roto i te vinega a tiai atu ai ia î i te pape, eita atoa ïa e tia ia tatou ia amuimui i te feia e haerea ino to ratou a tiai atu ai i te apo mai i te mea maitai.—Korinetia 1, 5:6.

15. E nafea oe e ite ai i te mau hoa maitai i te pae varua i roto i te amuiraa?

¹⁵ Auaˈe e mea rahi roa te ravea e ite ai tatou i te mau hoa maitatai i rotopu i te feia haamori ia Iehova. (Salamo 133:1) E nafea oe e ite ai i te mau hoa maitai i te pae varua i roto i te amuiraa? A atuatu ai oe i te mau huru maitatai e te mau eˈa o Iehova, mea papu e e piri atu te feia hoê â huru feruriraa to outou ia oe. I te hoê â taime, e titauhia paha ia rave oe i te tahi mau taahiraa e au ia faaohipa no te imi i te mau hoa apî. (A hiˈo i te tumu parau “ Ta mâua i rave no te faahoa i te mau taata maitatai.”) A imi i te feia e faaite ra i te mau huru maitatai ta oe e hinaaro e faaite atoa. A pee i te aˈoraa Bibilia ia “haamahora . . . i to outou aau,” ma te faahoa i te mau Kerisetiano aita e hiˈoraa i to ratou iri, nunaa, aore ra taˈere. (Korinetia 2, 6:13; a taio i te Petero 1, 2:17.) Eiaha e amuimui noa i te feia hoê â faito matahiti to outou. A haamanaˈo e mea  paari aˈe Ionatana ia Davida. E nehenehe e rave rahi taata paari aˈe e haamaitai i te auhoaraa maoti to ratou aravihi e paari.

16, 17. Ia haamauiui mai te hoê hoa Kerisetiano, no te aha eiaha ˈi tatou e faarue i te amuiraa?

¹⁶ I te mea e ua rau te huru e te tupuraa o te taata i roto i te amuiraa, e nehenehe te mau fifi e tupu i te tahi taime. E parau aore ra e rave paha te hoê hoa Kerisetiano i te tahi mea o te haamauiui i to tatou aau. (Maseli 12:18) I te tahi taime, e rahi roa te mau fifi no te mau huru taata taa ê, te mau taa-ore-raa, aore ra te mau manaˈo taa ê. E turori anei ïa tatou, a faarue atu ai i te amuiraa? Eita, mai te peu e te here mau ra tatou ia Iehova e i te feia ta ˈna e here ra.

¹⁷ Ei Atua poiete e ei Tumu o to tatou ora, e au ia here e  ia haamori tatou ia Iehova anaˈe ra. (Apokalupo 4:11) Hau atu â, e au ia turu maite tatou i te amuiraa ta ˈna e oaoa ra i te faaohipa. (Hebera 13:17) No reira, ia haamauiui aore ra ia faainoino mai te hoê hoa Kerisetiano, eita tatou e faarue i te amuiraa no te faaite i to tatou mauruuru ore. Eiaha iho â tatou e na reira. E ere o Iehova tei faainoino ia tatou. No to tatou here ia Iehova, e ore roa ˈtu tatou e faarue ia ˈna e i to ˈna nunaa!—A taio i te Salamo 119:165.

18. (a) Eaha ta tatou e nehenehe e rave no te paturu i te hau i roto i te amuiraa? (b) Ia faaoti tatou e faaore i te hapa mai te peu e te vai ra te tumu papu, eaha te maitai e noaa mai?

¹⁸ E turai te here no te feia haamori ia Iehova ia tatou ia paturu i te hau i roto i te amuiraa. Aita Iehova e tiai ra i te tia-roa-raa o te feia ta ˈna e here ra, eiaha atoa ïa tatou. Maoti te here, e tapoˈi tatou i te mau hapa rii, ma te haamanaˈo e e taata tia ore anaˈe tatou e e hape tatou. (Maseli 17:9; Petero 1, 4:8) E tauturu te here ia tatou ia “faaore noa ˈtu” i te “hapa.” (Kolosa 3:13) E ere i te mea ohie noa ia faaohipa i teie aˈoraa. Mai te peu e e vaiiho tatou i te mau huru aau faatoaruaru ia faatere ia tatou, e riro paha tatou i te tapea i te inoino a manaˈo atu ai e te faautua nei to tatou riri i te taata hapa. I te tanoraa râ, mea ino te reira no tatou. Ia faaoti tatou e faaore i te hapa mai te peu e te vai ra te tumu papu, e maitai rahi ïa te noaa mai. (Luka 17:3, 4) E ite tatou i te hau o te feruriraa e o te aau, e hau noa te amuiraa e, te mea faufaa roa, e paruruhia to tatou taairaa e o Iehova.—Mataio 6:14, 15; Roma 14:19.

19. Eaha te mau tupuraa e nehenehe e fa mai a titauhia ˈtu ai ia faaea tatou i te amuimui i te hoê taata?

¹⁹ I te tahi taime, e anihia tatou ia faaea i te amuimui i te hoê taata e mero oia no te amuiraa na mua ˈˈe. E tupu te reira ia tiavaruhia te hoê taata o tei ofati ma te tatarahapa ore i te ture a te Atua aore ra ia faarue te hoê mero i  te faaroo ma te haapii atu i te mau tiaturiraa hape aore ra ma te iriti ia ˈna i te amuiraa. Te faaara maitai mai ra te Parau a te Atua ia “faaea i te amuimui atu” i tera mau taata. e (A taio i te Korinetia 1, 5:11-13; Ioane 2, 9-11) E nehenehe e riro ei fifi mau ia ape i te hoê taata e hoa paha tatou na mua ˈˈe aore ra e fetii no tatou. E rave anei tatou i te hoê tiaraa aueue ore, a faaite atu ai e te tuu ra tatou i te taiva ore ia Iehova e i ta ˈna mau ture parau-tia i nia ˈˈe i te tahi atu mau mea atoa? A haamanaˈo e mea faufaa roa no Iehova te taiva ore e te faarooraa.

20, 21. (a) No te aha e faanahoraa î i te here te tiavaruraa? (b) No te aha e mea faufaa roa ˈi ia maiti maitai tatou i to tatou mau hoa?

²⁰ E faanahoraa î i te here mau te tiavaruraa no ǒ mai ia Iehova ra. No te aha? E faaite te tiavaruraa i te hoê taata hara tatarahapa ore i te hinaaro no te iˈoa moˈa o Iehova e no te auraa o te reira. (Petero 1, 1:15, 16) E paruru te tiavaruraa i te amuiraa. E paruruhia te mau mero haapao maitai i te haerea ino o te feia rave hara opua mau, a nehenehe atu ai ratou e rave noa i ta ratou haamoriraa ma te ite e e haapuraa papu te amuiraa i roto i teie nei ao ino. (Korinetia 1, 5:7; Hebera 12:15, 16) Teie huru aˈo, e tapao o te here ïa no te taata rave hara. Tera paha te hinaarohia ia hoˈi mai to ˈna huru mau e ia rave oia i te mau taahiraa e titauhia no te hoˈi ia Iehova ra.—Hebera 12:11.

²¹ Te tupuraa mau, e nehenehe to tatou mau hoa rahi e ohipa roa i nia ia tatou. E mea faufaa roa ïa ia maiti maitai tatou i to tatou mau hoa. Ma te faahoa i te mau hoa o Iehova, ma te here i te feia ta te Atua e here ra, e haaatihia ïa tatou e te mau hoa maitai roa ˈˈe e vai ra. Maoti ta tatou e apo mai ia ratou, e nehenehe tatou e tapea i ta tatou faaotiraa papu e faaoaoa ia Iehova.