A FAARIRO EI PǏPǏ
HAAPIIRAA 10
A faaoti papu
Faaueraa tumu: “Ua faaoti papu matou e faaite atu i te parau apî oaoa a te Atua e e horoa atoa i to matou ora no te tauturu atu, no te mea ua here roa matou ia outou.”—Tes. 1, 2:8.
Eaha ta Iesu i rave?
1. A hiˈo i te VIDEO aore ra a taio i te Ioane 3:1, 2. E a aparau i teie mau uiraa:
-
No te aha Nikodemo i haere ai e farerei ia Iesu i te po?—A hiˈo i te Ioane 12:42, 43.
-
Ma te aparau e o Nikodemo, eaha ta Iesu i faaoti papu no te faariro i te taata ei pǐpǐ?
Eaha te haapii mai i to Iesu hiˈoraa?
2. E faaite tatou i te here i te taata ma te faaoti papu e faariro ia ratou ei pǐpǐ.
A pee i to Iesu hiˈoraa
3. A haapii i te Bibilia i te taime e te vahi tano no te piahi. Mea au aˈe na ˈna hoê mahana i te hebedoma aore ra i te hoê hora taa maitai. Mea au aˈe anei na ˈna e haapii i ta ˈna vahi raveraa ohipa, i to ˈna fare aore ra i te vahi taata? Mai te peu e nehenehe, a taui i te hora e te vahi tano no te piahi.
4. A tamau i te haapiiraa. Aita anaˈe oe e vata, eiaha e faaore i te haapiiraa. A ui râ:
-
E nehenehe anei oe e faatere i te haapiiraa i te tahi atu taime o te hebedoma?
-
E nehenehe anei oe e faatere i te haapiiraa na roto i te niuniu aore ra te roro uira?
-
E nehenehe anei oe e ani i te tahi atu taata poro ia faatere i te haapiiraa?
5. A pure no te faaite i te hoê feruriraa maitai. A ani i te tauturu a Iehova eiaha oe e tuu, noa ˈtu mea fifi no te piahi ia tamau i ta ˈna haapiiraa aore ra ia faaohipa i te mau aratairaa Bibilia. (Phil. 2:13) Mea papu, e rave rahi huru maitatai to te piahi, a pure ïa no te tiatonu i nia i te reira.
