Te riroraa ei hoa no te Atua, o te ohipa maitai roa ˈˈe ïa no oe. E haapii mai te Atua e nafea oe e oaoa ˈi e e faaea hau ai, e faatiamâ oia ia oe i te mau tiaturiraa hape e i te mau peu iino e rave rahi. E faaroo oia i ta oe mau pure. E tauturu oia ia oe ia fanaˈo i te hau o roto e ia tiaturi oe ia oe iho. (Salamo 71:5; 73:28) E turu te Atua ia oe i te tau ati. (Salamo 18:18) E te pûpû nei te Atua i te ora mure ore ei ô no oe.—Roma 6:23.

Ia haafatata ˈtu oe i te Atua, e haafatata ˈtu ïa oe i te tahi atu mau hoa o te Atua. E riro atoa mai ratou ei hoa no oe. Inaha, e riro mai ratou ei taeae e ei tuahine no oe. E oaoa ratou i te haapii atu ia oe no nia i te Atua e i te tauturu atu e i te faaitoito atu ia oe.

Aita tatou i aifaito i te Atua. A imi ai oe i te auhoaraa e te Atua, ia taa maitai ia oe i te hoê mea faufaa. E ere te auhoaraa e te Atua i te hoê auhoaraa e te hoê taata mai ia tatou. Mea maoro aˈe e mea paari aˈe te Atua ia tatou iho, e ua hau aˈe to ˈna puai i to tatou. E tiaraa to ˈna no te faatere ia tatou. No reira, ia hinaaro tatou e riro ei hoa no ˈna, e tia ia tatou ia faaroo ia ˈna e ia rave i ta ˈna e ani mai ra. E riro noa te reira ei maitai no tatou.—Isaia 48:18.