E niuhia te auhoaraa i nia i te here. Hau atu oe i te haapii no nia ia Iehova, e rahi atu â to oe here ia ˈna. A rahi noa ˈi to oe here no te Atua, e rahi atoa mai ïa to oe hinaaro e tavini ia ˈna. E turai te reira ia oe ia riro ei pǐpǐ a Iesu Mesia. (Mataio 28:19) I te amuiraa ˈtu i te fetii oaoa o te mau Ite no Iehova, e ite ai oe i te auhoaraa e te Atua e a muri noa ˈtu. Eaha te tia ia oe ia rave?

E tia ia oe ia faaite i to oe here i te Atua ma te auraro i ta ˈna mau ture. “Teie hoi te here i te Atua, ia haapao tatou i ta ˈna mau faaueraa. E ere ta ˈna mau faaueraa i te mea teimaha.”—Ioane 1, 5:3.

A faaohipa i ta oe e haapii ra. Ua faatia Iesu i te hoê aamu e faahohoˈa ra i te reira. Ua patu te hoê taata paari i to ˈna fare i nia i te pǎpǎ. Ua patu te hoê taata maamaa i to ˈna fare i nia i te one. I te tupuraa te hoê vero rahi, aita te fare i patuhia i nia i te pǎpǎ i parari, tera râ, ua mairi e ua parari roa te fare i patuhia i nia i te one. Ua parau Iesu e e au te feia e faaroo ra i ta ˈna mau haapiiraa e te pee ra i te reira i te taata paari tei patu i nia i te pǎpǎ. Area te feia e faaroo ra i ta ˈna mau haapiiraa ma te ore e pee i te reira, e au ïa i te taata maamaa tei patu i nia i te one. E hinaaro oe e riro mai teihea taata?—Mataio 7:24-27.

 Te pûpûraa ia ˈna iho. Teie ïa te auraa, e haafatata ˈtu oe ia Iehova na roto i te pure ma te parau atu e te hinaaro nei oe e rave i to ˈna hinaaro e a muri noa ˈtu. Te faaite ra oe na roto i to oe raveraa i te hinaaro o te Atua e e pǐpǐ oe na Iesu Mesia.—Mataio 11:29.

Te bapetizoraa. “Ia bapetizohia oe e ia mâ oe i ta oe mau hara ma te tiaoro i to ˈna iˈoa.”—Ohipa 22:16.

A tavini atu i te Atua ma te aau atoa. “Te mau mea atoa ta outou e rave, a rave ma to outou aau e puai atoa mai te mea ra e no Iehova, eiaha râ no te taata.”—Kolosa 3:23.