Tae maira te tahi mau tane no hitia o te râ mai. E feia hiˈo fetia, o te tuatapapa i te vairaa o te mau fetia, a nehenehe atu ai ratou, i ta ratou parauraa, e tatara i te auraa o te mau ohipa e tupu i roto i te oraraa o te taata. (Isaia 47:13) I hitia o te râ to ratou iteraa e peeraa i te hoê “fetia” hau atu i te hanere kilometera i te atea, e tae roa i Ierusalema eiaha râ i Betelehema.

I to ratou taeraa i reira, ui atura ratou: “Teihea roa te arii o te ati Iuda tei fanauhia mai nei? Ua ite hoi matou i to ˈna fetia i hitia o te râ e te haere mai nei matou e tahopu ia ˈna.”—Mataio 2:1, 2.

Faaroo ihora te arii Heroda no Ierusalema i te reira e horuhoru ihora. Titau atura oia i te mau tahuˈa tiaau e te tahi atu mau aratai haapaoraa ati Iuda e ui atura ihea te Mesia e fanauhia ˈi. Pahono maira ratou e “i Betelehema,” ia au i te mau Papai. (Mataio 2:5; Mika 5:2) Tii huna ˈtura Heroda i te feia hiˈo fetia e parau atura: “A haere a maimi i tera tamarii e ia ite outou ia ˈna, a hoˈi mai e faaite ia ˈu, ia haere atoa hoi au e tahopu ia ˈna.” (Mataio 2:8) Te hinaaro mau râ o Heroda, ia itehia mai taua tamarii ra no te haapohe ia ˈna!

I te revaraa te feia hiˈo fetia, tupu ihora te tahi ohipa maere. Te “fetia” ta ratou i ite na i hitia o te râ, tere ihora ïa na mua ia ratou. Papu maitai, e ere taua fetia ra mai te tahi atu mau fetia. Ua fa mai râ te reira no te aratai ia ratou. Ua pee te feia hiˈo fetia i taua fetia ra e tae roa i to ˈna mauraa i nia aˈe i te fare i reira Iosepha raua Maria e faaea ˈi e ta raua tamaiti.

Tomo aˈera te feia hiˈo fetia i roto i te fare e ite atura ia Maria e te hoê tamarii, o Iesu ïa. Tipapa ihora te feia hiˈo fetia i raro i mua ia Iesu, e pûpû maira na ˈna i te auro, te tapau libano e te tapau mura. I muri iho, a fatata ˈi ratou i te reva, faaarahia maira ratou e te Atua na roto i te moemoeâ eiaha e hoˈi ia Heroda ra. Reva ˈtura ïa ratou i to ratou fenua na te tahi atu eˈa.

I to oe manaˈo, na vai i rave ia fa mai te “fetia” tei aratai i te feia hiˈo fetia? A haamanaˈo, aita te fetia i aratai tia ˈtu ia ratou ia Iesu ra i Betelehema. Aita, ua arataihia ratou i Ierusalema, i reira to ratou farereiraa i te arii Heroda, tei hinaaro e haapohe ia Iesu. E na reira iho â o ˈna ahani aita te Atua i ohipa mai, a faaara ˈi i te feia hiˈo fetia eiaha e faaite ia Heroda teihea roa Iesu. Papu maitai, na te enemi o te Atua, o Satani tei hinaaro e haapohe ia Iesu, i rave ia fa mai tera fetia. Ua faaohipa oia i tera ravea ia tupu ta ˈna opuaraa.