I to Iesu tapearaahia i te ô i Getesemane, ua horo te mau aposetolo no te riaria. E piti râ tei faaea i te horo, o Petero “e te tahi atu pǐpǐ,” papu roa te aposetolo Ioane. (Ioane 18:15; 19:35; 21:24) Ua ite atu paha raua ia Iesu i te afairaahia i ǒ Ana. I to Ana faaueraa e afai ia Iesu i te tahuˈa rahi o Kaiapha, pee maira Petero raua Ioane na te atea ê. Eita e ore e te haapeapea ra raua no raua iho e no to raua Fatu.

Ua nehenehe Ioane, tei matauhia e te tahuˈa rahi, e tomo i roto i te aua o te fare o Kaiapha. Faaea noa ihora Petero i rapaeau e hoˈi noa mai ai Ioane e ani i te tavini vahine tiai opani ia faatomo mai ia Petero.

No te toˈetoˈe i taua po ra, tahu aˈera te feia i roto i te aua i te auahi. Parahi atoa maira Petero no te tamahanahana ia ˈna a tiai ai i “te ite i te ohipa e tupu” no Iesu. (Mataio 26:58) Ite maitai atura te tiai opani tei faatomo mai ia Petero ia ˈna no te maramarama. Ui atura oia: “E ere oe i te pǐpǐ atoa na tera taata?” (Ioane 18:17) E ere o ˈna anaˈe tei ite ia ˈna, a parau ai e na muri atoa na oia ia Iesu.—Mataio 26:69, 71-73; Mareko 14:70.

Aita Petero i taa faahou e nafea râ. Te imi noa ra hoi oia i te haamoˈe ia ˈna, a haere atoa ˈi i te opani ra. Parau maira oia: “Aita vau i ite ia ˈna e aita atoa vau e taa ra eaha ta oe e parau ra.” (Mareko 14:67, 68) Horeo atoa ihora oia e ia faautua te Atua ia ˈna ia haavare o ˈna.—Mataio 26:74.

I taua area taime ra te haavahia ra Iesu, eita e ore i roto i te hoê piha o te fare o Kaiapha i nia ˈˈe i te aua. Ua ite paha Petero e te tahi atu e tiai ra i raro mai ia haere mai e ia haere atu e rave rau ite tei titauhia i te haavaraa.

Na te taˈiraa reo Galilea o Petero i faaite e ua ite o ˈna ia Iesu. To reira atoa hoi te hoê fetii o Malako ta Petero i tâpû i te tariˈa. Na ô atura oia: “Ua ite au ia oe i roto i te aua e o ˈna, aita?” Parau maira Petero aita, te toru ïa o te taime. Totereo ihora te hoê moa, mai tei tohuhia.—Ioane 13:38; 18:26, 27.

I taua taime ra, e au ra e tei te taupee Iesu i nia ˈˈe i te aua. Fariu e hiˈo tia ˈtura te Fatu ia Petero. Eita e ore e ua oti roa Petero. Haamanaˈo atura oia i ta Iesu i parau atu tau hora noa na mua ˈtu i te piha rahi i nia. Eaha paha oia i te tatarahapa i te taaraa ia ˈna ta ˈna i rave iho nei! Haere ihora oia i rapaeau e taˈi ihora no te peapea rahi.—Luka 22:61, 62.

Eaha hoi Petero i parau ai aita o ˈna i ite i to ˈna Fatu, o ˈna tei tiaturi papu e mea puai oia i te pae varua no te tapea i to ˈna taiva ore? Ua tavirihia ta Iesu mau parau e ua parihia o ˈna i te rave i te ohipa ino. E nehenehe ta Petero e turu i teie taata aita ta ˈna e hara, ua huri tua râ oia ia ˈna tei ia ˈna ra hoi “te mau parau o te ora mure ore.”—Ioane 6:68.

Te faaite ra teie tupuraa peapea mau e e nehenehe te hoê tavini haapao maitai a Iehova e tutaperepere i mua i te tamataraa aore ra faahemaraa manaˈo-ore-hia, aita anaˈe oia i ineine maitai. E faaararaa ïa ta Petero i faaruru no te mau tavini atoa a te Atua!