I te tahi atu Sabati, haere atura Iesu i te hoê sunago, eita e ore i Galilea. Ite ihora oia i te hoê tane ua mǎrô te rima atau. (Luka 6:6) Te hiˈopoa mai ra te mau papai parau e te mau Pharisea ia Iesu. No te aha? Faaite maira ratou i to ratou iho manaˈo a ui mai ai: “Mea tano anei ia au i te ture ia faaora i te maˈi i te Sabati?”—Mataio 12:10.

I tiaturi na te mau aratai haapaoraa ati Iuda e mea tano ia au i te ture ia faaora i te maˈi o te hoê taata i te Sabati mai te peu noa e e pohe oia. Eita ïa e tano ia au i te ture ia faahoˈi i te hoê ivi tei taa aore ra ia taamu i te hoê maoi i te Sabati, eita hoi te taata e pohe i te reira. E ere ïa no to ratou haapeapea no teie tane rima mǎrô, mea aroha roa hoi, i ui ai te mau papai parau e te mau Pharisea ia Iesu, ua imi râ ratou i te hoê tumu no te faautua ia ˈna.

Ua ite râ Iesu i to ratou feruriraa piˈo. Ua taa ia ˈna e manaˈo etaeta roa to ratou aita e tuati ra e te mau Papai no nia i te ofatiraa i te ture e opani ra ia rave i te ohipa i te Sabati. (Exodo 20:8-10) Ua faahapa-aˈena-hia oia ma te tano ore i to ˈna raveraa i te mau ohipa maitatai. Faaineine atura râ Iesu i te haapapu maitai i te mau aratai haapaoraa ati Iuda e aita to ratou manaˈo e tano ra a na ô ai oia i te tane rima mǎrô: “A tia mai e a haere mai i ropu.”—Mareko 3:3.

Fariu atura Iesu i te mau papai parau e te mau Pharisea, e na ô atura: “O vai ïa taata i rotopu ia outou hoê anaˈe mamoe ta ˈna o te topa i roto i te hoê apoo i te Sabati, e ore e tii e huti mai i ta ˈna mamoe i rapae?” (Mataio 12:11) E moni no ratou te hoê mamoe, eita ïa ratou e vaiiho ia ˈna i roto i te apoo e ananahi atu, e nehenehe hoi e pohe a ere atu ai ratou i te moni. Te na ô atoa ra hoi te mau Papai: “E haapao â te taata parau-tia ra i ta ˈna ra puaa [aore ra animara].”—Maseli 12:10.

Horoa ˈtura Iesu i te hoê faaauraa au noa a na ô ai: “Mea faufaa aˈe hoi te taata i te mamoe! No reira, mea tano ia au i te ture ia rave i te mea maitai i te Sabati.” (Mataio 12:12) No reira, aita Iesu i ofati i te Sabati ia ˈna i faaora i te rima mǎrô o taua tane ra. Aita ˈtura i nehenehe i te mau aratai haapaoraa e patoi i teie haaferuriraa tano maitai e te î i te aumihi. Mamû noa ˈtura ratou.

Hiˈo ihora Iesu ia ratou ma te riri e te peapea no to ratou manaˈo tano ore. Parau atura oia i te tane: “A toro mai na i to rima.” (Mataio 12:13) A toro mai ai te tane i to ˈna rima mǎrô, ora ihora to ˈna maˈi, e oaoa ihora oia. E te feia i tamata i te râmâ ia Iesu?

Aita te mau Pharisea i oaoa i te oraraa te rima mǎrô o te tane, haere atura râ ratou i rapae e apoo ihora “e te feia o te pǔpǔ a Heroda no te feruri i te hoê ravea no te haapohe ia Iesu.” (Mareko 3:6) Papu i roto i taua pǔpǔ poritita ra, te vai atoa ra te Sadukea, te hoê pǔpǔ faaroo. Aita hoi te Sadukea e te Pharisea i afaro na, i tera râ taime, ua tahoê ratou no te patoi ia Iesu.