Mea huru maoro to Iesu raveraa i ta ˈna taviniraa i Galilea, mea farii aˈe te taata i reira i to Iudea. A vai atoa ˈi oia i Ierusalema e i to ˈna faaoraraa i te maˈi o te hoê tane i te Sabati, “rahi roa ˈtura to te ati Iuda imiraa i te ravea no te haapohe ia ˈna.”—Ioane 5:18; 7:1.

E Tetepa aore ra Atopa taua avaˈe ra i 32, e te fatata mai ra te Oroa patiaraa tiahapa e hitu mahana, e te hoê oroa moˈa i te vaˈu o te mahana. Na teie oroa e opani i te matahiti o te tarena faaapu. E taime oaoaraa rahi e te haamauruururaa.

Parau onoono maira to Iesu mau teina, Iakobo, Simona, Iosepha e Iuda, ia ˈna: “A faarue i teie vahi e a haere i Iudea.” O Ierusalema te pu o te haamoriraa i Iudea. Mea taata na reira i na oroa matahiti e toru. Na ô maira to Iesu mau teina: “Aore roa hoi e taata e rave huna i te tahi mea ia hinaaro oia ia itehia o ˈna e te taata. Te rave ra oe i teie mau mea, a rave ïa i mua i te taata.”—Ioane 7:3, 4.

“Aita” hoi teie na teina “e faatupu ra i te faaroo ia ˈna,” te Mesia. To ratou hinaaro, ia ite te feia i ruru mai no te oroa ia ˈna ia faatupu i te tahi mau ohipa mana. Mea atâta hoi te reira, ta Iesu ïa i taa a parau atu ai: “Aita e tumu e hae ai teie nei ao ia outou, te hae nei râ ia ˈu no te mea te faaite nei au e mea ino ta ratou mau ohipa. A pauma outou i te oroa. Eita vau e haere i taua oroa ra i teie nei, no te mea aita â to ˈu taime i tae maira.”—Ioane 7:5-8.

Tau mahana i muri iho i to Iesu mau teina revaraa e te tahi atu mau ratere, reva huna ˈtura Iesu e ta ˈna mau pǐpǐ, ma te ore e itehia mai e te taata. Ua pou tia ˈtu ratou na Samaria, eiaha râ na te hiti anavai Ioridana tei matauhia aˈe. Ia noaa mai te nohoraa e te maa i Samaria no Iesu e ta ˈna mau pǐpǐ, tono ihora oia i te tahi mau vea na mua ia ratou i te hoê oire no te faaineine i te mau mea. No te mea te haere ra Iesu i Ierusalema no te oroa a te ati Iuda, aita to reira mau taata i farii ia ratou, a ore atu ai ratou e nehenehe e faaea i ǒ. Ui maira Iakobo raua Ioane ma te riri: “E te Fatu, hinaaro anei oe ia faaue mâua i te auahi ia mairi mai te raˈi mai ia mou ratou?” (Luka 9:54) Tamaˈi ihora Iesu ia raua no to raua manaˈoraa i te reira, e reva ˈtura ratou.

A haere noa ˈi ratou, na ô maira te hoê papai parau ia Iesu: “Orometua, e pee au ia oe i te mau vahi atoa ta oe e haere.” Parau atura Iesu: “E apoo to te urî oviri e e ofaaraa to te manu o te reva. Te Tamaiti râ a te taata nei, aita ïa to ˈna e vahi taotoraa.” (Mataio 8:19, 20) Te faaite  ra oia i te papai parau e e faaruru oia i te fifi ia riro mai oia ei pǐpǐ na Iesu. E au ra mea teoteo roa te papai parau no te farii i teie huru oraraa. E o tatou, ua ineine anei tatou i te pee ia Iesu?

Na ô atura Iesu i te tahi atu taata: “A pee mai ia ˈu.” Parau maira taua taata ra: “E te Fatu, a tuu na oe ia ˈu ia haere na mua e huna i to ˈu metua tane.” Ua ite râ Iesu i to ˈna tupuraa, e na ô atura: “A vaiiho na tei pohe e huna i tei pohe. O oe râ, a haere e faaite na te mau vahi atoa i te Faatereraa arii a te Atua.” (Luka 9:59, 60) Aita â te metua tane i pohe atura. Ahiri oia, aita ïa ta ˈna tamaiti ia Iesu ra e paraparau ra ia ˈna. Aita teie tamaiti i ineine i te tuu i te Faatereraa arii a te Atua i te parahiraa matamua o to ˈna oraraa.

A pou ai ratou na te eˈa e tae atu ai i Ierusalema, na ô maira te tahi atu taata ia Iesu: “E te Fatu, e pee au ia oe, na mua râ vaiiho na oe ia ˈu ia haere e aroha i to ˈu utuafare.” Na ô atura Iesu: “Te taata e tuu i to ˈna rima i nia iho i te arote, a hiˈo ai i muri, e ore ïa e tano ia ˈna ia ô i roto i te Faatereraa arii a te Atua.”—Luka 9:61, 62.

Mea titauhia ia tiatonu te feia e hinaaro e riro ei pǐpǐ mau na Iesu i te taviniraa no te Faatereraa arii. Ia ore te taata arote e hiˈo noa i mua, e fefe ïa ta ˈna reni aroteraa. Ia faaea oia i te arote no te hiˈo eaha to muri, e taere te ohipa. Oia atoa no te taata e hiˈo i muri i teie faanahoraa tahito o te ao nei, e hahi ê oia i te eˈa e tae atu ai i te ora mure ore.