A tamaa ˈi Iesu i te fare o te Pharisea, e tausani taata tei ruru i rapaeau mai a tiai noa ˈi ia ˈna. Ua ruru atoa te nahoa a vai ai oia i Galilea. (Mareko 1:33; 2:2; 3:9) I Iudea nei, mea rahi tei hinaaro e ite e e faaroo ia ˈna. E ere ïa ratou mai te mau Pharisea i tamaa e o Iesu.

Mea faufaa roa no ta Iesu mau pǐpǐ ta ˈna i parau na mua: “A ara i te hopue a te mau Pharisea, oia hoi te haavarevare.” Ua horoa aˈena Iesu i teie faaararaa, no ta ˈna râ i ite i te tamaaraa, mea ru mau â ia horoa i teie aˈoraa. (Luka 12:1; Mareko 8:15) Ua tamata paha te mau Pharisea i te huna i to ratou ino ma te faahua haamori i te Atua. E fifi râ te taata ia ratou e mea titauhia ia faaite-roa-hia te reira. Faataa ˈtura Iesu: “Aita . . . e mea i tapoˈi-maitai-hia e ore e faaitehia, e aita e mea huna e ore e itehia.”—Luka 12:2.

No Iudea paha e rave rahi tei ruru ati aˈe ia Iesu e aita ratou i faaroo aˈenei ia ˈna ia haapii i te taata i Galilea. Faahiti faahou atura ïa Iesu i te mau manaˈo faufaa roa ta ˈna i parau na mua ˈtu. Aˈo atura oia i te feia atoa e faaroo ra: “Eiaha e mǎtaˈu i te feia e haapohe ia outou. Ia pohe hoi outou, aita ˈtu â ta ratou e nehenehe e rave i nia ia outou.” (Luka 12:4) Mai ta ˈna i rave na mua ˈˈe, ua haapapu oia e ia tiaturi ta ˈna mau pǐpǐ e e aupuru te Atua ia ratou, ia farii atoa i te Tamaiti a te taata e ia taa e e tauturu te Atua ia ratou.—Mataio 10:19, 20, 26-33; 12:31, 32.

Faaite maira te hoê tane i rotopu i te nahoa i te mea e haapeapea ra ia ˈna: “Orometua, parau na oe i to ˈu tuaana ia tufa oia i ta to mâua metua tane i vaiiho mai na mâua.” (Luka 12:13) Ia au i te ture a Mose, e fanaˈo te tamaiti matahiapo e piti tuhaa o te faufaa, eita ïa te peapea e tupu. (Deuteronomi 21:17) E au ra râ te hinaaro ra teie tane hau aˈe i tei horoahia na ˈna. Ma te paari, aita Iesu i faaô atu ia ˈna i roto. Ui atura oia: “Na vai i faatoroa ia ˈu ei haava ia orua aore ra ei arai i rotopu ia orua?”—Luka 12:14.

Horoa ˈtura Iesu i teie aˈoraa ia ratou pauroa: “A ara e eiaha e nounou i ta vetahi ê taoˈa, no te mea noa ˈtu e mea rahi te taoˈa a te hoê taata, eita oia e ora i te reira.” (Luka 12:15) Noa ˈtu te rahi o te faufaa a te hoê taata, eita anei oia e pohe i te hoê mahana, a vaiiho mai ai i ta ˈna faufaa atoa? Haapapu atura Iesu i taua parau ra ma te hoê faahohoˈaraa eita e moˈehia o te faaite atoa ra e mea faufaa te iˈoa maitai no te Atua:

“Ua tupu maitai te faaapu a te hoê taata taoˈa rahi. Feruri ihora ïa oia: ‘E nafea râ vau, ua apǐ pauroa hoi ta ˈu mau fare haapueraa maa?’ Na ô aˈera oia: ‘Teie ta ˈu e rave: E vavahi au i ta ˈu mau fare vairaa maa, a hamani atu ai i te mau fare rahi aˈe, i reira hoi au e haapue ai i ta ˈu mau sitona atoa e ta ˈu mau taoˈa atoa, a na ô atu ai au ia ˈu iho: “Mea rahi ta ˈu taoˈa i haapue no te matahiti e rave rahi. E faafaaea ïa vau, e tamaa, e inu, a oaoa ˈi.”’ Na ô atura râ te Atua ia ˈna: ‘Neneva, i teie po e ravehia ˈi to oe ora. Tena mau taoˈa ta oe i haapue, e riro ïa ia vai?’ Tera ïa te tupu i nia i te taata o te haapue i te taoˈa na ˈna iho, mea veve râ oia i te aro o te Atua.”—Luka 12:16-21.

E nehenehe te mau pǐpǐ a Iesu e te tahi atu e faaroo ra ia ˈna e topa i roto i te marei e haapue i te faufaa. E nehenehe atoa te mau haapeapearaa o te oraraa e haafifi i ta ratou taviniraa ia Iehova. Faahiti faahou atura ïa Iesu i teie aˈoraa maitai roa ta ˈna i horoa i roto i te Aˈoraa i nia i te mouˈa piri i te hoê matahiti e te afa na mua ˈtu:

“A faaea i te haapeapea no to outou ora eaha ta outou e amu, aore ra no to outou tino eaha ta outou e oomo. . . . A hiˈo na i te oreba. Eita  teie mau manu e ueue i te huero, e ooti e aita ta ratou e fare vairaa maa. Teie râ, te faaamu ra te Atua ia ratou. E ere anei mea faufaa aˈe outou i tera mau manu? . . . A hiˈo i te mau lili: Eita teie mau tiare e rave i te ohipa, eita atoa e hamani i te ahu. Te parau atu nei râ vau e aita te ahu o te arii Solomona, noa ˈtu to ˈna unauna rahi, i hau aˈe i te nehenehe i to te hoê o teie mau tiare. . . . A faaea ïa i te haapeapea no ta outou e amu e no ta outou e inu e a faaea i te ahoaho . . . Ua ite . . . to outou Metua e e hinaaro iho â outou i teie mau mea. . . . A tamau i te imi i ta ˈna Faatereraa arii, e e horoahia mai teie mau mea na outou.”—Luka 12:22-31; Mataio 6:25-33.

O vai ma te imi i te Faatereraa arii a te Atua? Ua faaite Iesu e mea iti te taata haapao maitai te na reira, e “nǎnǎ iti” ratou. Ua faaitehia to ratou numera i muri aˈe, 144 000 noa. Eaha te tiai mai ra ia ratou? Ua haapapu atu Iesu: “Ua faaoti hoi to outou Metua i te horoa ˈtu i te Faatereraa arii na outou.” Aita to ratou feruriraa i nia i te haapueraa i te taoˈa rahi i te fenua nei, e nehenehe e eiâhia. To nia râ to ratou aau i te taoˈa pau ore i te raˈi, i reira ratou e faatere ai e te Mesia.—Luka 12:32-34.