HAAPIIRAA 13
Mea nafea te haapaoraa hape i te haavareraa no nia i te Atua?
E here te Atua. Tera râ, te faahua parau nei e te ohipa nei te haapaoraa hape no te iˈoa o te Atua. Mea nafea râ te haapaoraa hape i te haavareraa no nia i te Atua? Eaha to Iehova manaˈo no nia i te reira e eaha ta ˈna e rave?
1. Mea nafea te haapaoraa hape i te haavareraa no nia i te Atua na roto i ta ratou mau haapiiraa?
Te parauhia ra no nia i te haapaoraa hape, “ua maiti ratou e tiaturi i te haavare eiaha râ i te parau mau a te Atua.” (Roma 1:25) Aita te mau haapaoraa e haapii ra i to ˈna mau taata i te iˈoa o te Atua. Te faaite ra râ te Bibilia, mea faufaa ia faaohipahia te iˈoa o te Atua. (Roma 10:13, 14) Te haavare atoa ra te mau tia haapaoraa e ia tupu te ati, no ratou, tera te hinaaro o te Atua. E haavare râ te reira. E ere roa ˈtu te Atua te tumu o te ino. (A taio i te Iakobo 1:13.) No tera mau haapiiraa haavare, ua turai te mau haapaoraa i te taata ia atea ê i te Atua.
2. Mea nafea te haapaoraa hape i te haavareraa no nia i te Atua na roto i ta ratou e rave ra?
Mea papu aita te haapaoraa hape e tâuˈa ra i te taata mai ia Iehova e na reira. No te aha? No te mea te na ô ra te Bibilia “ua pue hoi ta ˈna mau hara e ua tae roa i te raˈi.” (Apokalupo 18:5) Eaha te itehia i teie mahana? Ua hanere matahiti, ua faaô te mau haapaoraa i roto i te mau ohipa poritita, ua turu i te mau tamaˈi o tei haapohe e rave rahi taata. Aita noa i navai i reira, te hinaaro atoa ra te mau tia haapaoraa ia onahia ratou, e ani ïa ratou i te moni i to ratou mau taata roto i te faaroo. Te haapapu ra teie mau ohipa e aita roa ˈtu ratou e ite o vai te Atua e aita atoa ratou e ohipa ra no te Atua.—A taio i te Ioane 1, 4:8.
3. Eaha to Iehova manaˈo no nia i te haapaoraa hape?
Mai te peu mea riri na oe i ta te haapaoraa hape e rave ra, eaha atu â no Iehova. Mea here na Iehova i te taata, area râ te mau tia haapaoraa o te haavare ra e o te ore ra e tâuˈa i to ratou mau taata, mea riri roa na Iehova. Ua fafau ra Iehova e haamou i te haapaoraa hape e “eita oia e ite-faahou-hia.” (Apokalupo 18:21) Fatata roa te Atua i te haamou pauroa te mau haapaoraa hape.—Apokalupo 18:8.
A FAAHOHONU ATU Â
A haapii hau atu â no to te Atua manaˈo no nia i te haapaoraa hape, oia atoa no ta te haapaoraa hape i rave, e no te aha eiaha oe e vaiiho i te reira ia tapea ia oe ia ite o vai Iehova.
4. Aita te Atua e farii i te mau haapaoraa atoa
Te tiaturi nei te mau taata e te aratai ra te mau haapaoraa atoa i te Atua ra. Tera iho â anei? A taio i te Mataio 7:13, 14, e a aparau i teie uiraa:
-
Nafea te Bibilia e faataa ˈi i te eˈa e aratai ra i te ora?
A pata i te VIDEO, e a aparau i te uiraa i muri nei.
-
Te parau ra anei te Bibilia e e rave rahi haapaoraa ta te Atua e farii?
5. Aita te haapaoraa hape e faaite ra i te here o te Atua
Ua haavare te mau haapaoraa hape no nia i te Atua ma te ravea huru rau. Hoê ohipa ino mau, o to ratou ïa tururaa i te tamaˈi. No te ite i te reira, a pata i te VIDEO. E a aparau i te mau uiraa i muri nei.
-
Eaha te tiaraa o te mau haapaoraa e rave rahi i te roaraa o te Piti o te tamaˈi rahi?
-
Eaha to oe manaˈo no te tiaraa ta ratou i rave?
A taio i te Ioane 13:34, 35 e te 17:16. E a aparau i teie mau uiraa:
-
Eaha to Iehova manaˈo ia turu te mau haapaoraa i te tamaˈi?
-
O te haapaoraa hape te tumu o te mau ohipa ino e rave rahi. I roto i teihea tupuraa ta oe i ite, aita te mau haapaoraa i faaite i te here o te Atua?
6. Te hinaaro ra te Atua ia tiamâ mai te taata i te haapaoraa hape
A taio i te Apokalupo 18:4, a e a aparau i teie uiraa:
-
Eaha to oe huru ia ite oe e te hinaaro ra te Atua e faaora i te mau taata o tei haavarehia e te haapaoraa hape?
7. A tamau i te haapii no nia i te Atua mau
E vaiiho anei tatou i te haapaoraa hape ia haafifi i to tatou feruriraa no nia i te Atua? A feruri na i te hoê tamaiti o te ore e faaroo i te aratairaa paari a to ˈna metua tane. Ua faarue oia i te fare e ua rave i te ohipa tia ore. E faahapa anei oe i te metua tane no te oraraa o te tamaiti orure hau?
-
E faahapa anei oe ia Iehova ma te faaea i te haapii no nia ia ˈna no ta te haapaoraa hape i rave?
TE MANAˈO O VETAHI: “Eiaha e paraparau mai no nia i te haapaoraa, mea haavare roa te mau haapaoraa atoa.”
-
Tera anei to oe manaˈo?
-
E vaiiho anei tatou i ta te haapaoraa hape e rave ra ia haafifi i to tatou feruriraa no nia ia Iehova?
HAAPOTORAA
Ua haavare te haapaoraa hape no nia i te Atua na roto i ta ratou mau haapiiraa hape e te mau ohipa ino mau. E haamou te Atua i te haapaoraa hape.
Haamanaˈoraa
-
Eaha to oe manaˈo no ta te haapaoraa hape i haapii e i rave?
-
Eaha to Iehova huru no nia i te haapaoraa hape?
-
Eaha ta te Atua e rave no te haapaoraa hape?
HIˈOPOA
A haapii no nia e piti ohipa ta te haapaoraa e rave ra o ta te Atua e ore e farii.
“Te tauturu mai ra anei te mau haapaoraa atoa ia faafatata ˈtu i te Atua?” (Tumu parau natirara)
No te aha Iehova e hinaaro ai ia haamori tatou e o vetahi ia ˈna?
“Mea faufaa anei ia riro ei mero o te hoê haapaoraa faanahohia?” (Tumu parau natirara)
Ua feaa te feruriraa o te hoê perepitero i ta ˈna haapaoraa. Aita râ te reira i tapea ia ˈna ia haapii i te parau mau no nia i te Atua.
“Ua taui te tahi perepitero i ta ˈna haapaoraa” (A ara mai na! Mati 2015)
A hanere matahiti, ua haavare noa te mau haapaoraa no nia i te Atua, ia tiaturi te taata e aita oia e tâuˈa ra ia ratou e e Atua ino oia. A haapii i te parau mau no nia i na haavare e toru.
“Parau haavare no nia i te Atua” (Te Pare Tiairaa Tenuare 2014)
a No te ite no te aha te buka Apokalupo e faataa ˈi i te haapaoraa hape mai te hoê vahine o tei piihia te Babulonia rahi, a hiˈo i te faataaraa hau 1.