HAAPIIRAA 37
Eaha ta te Bibilia e parau ra no nia i te ohipa e te moni?
Ua haapeapea ê na anei oe no nia i te ohipa aore ra te moni? Mea papu e ere i te mea ohie no te haapao i te mau mea hinaarohia e tatou e oia atoa no te horoa na Iehova te haamoriraa e titauhia. E horoa mai te Bibilia i te mau aˈoraa maitai no te tauturu ia tatou.
1. Eaha ta te Bibilia e parau ra no nia i te ohipa?
Te hinaaro ra te Atua ia oaoa tatou i ta tatou ohipa. Te parau ra te Bibilia “aita ˈtu e mea maitai aˈe no te hoê taata i . . . te oaoaraa no ta ˈna ohipa rohirohi.” (Koheleta 2:24) E Atua ohipa roa o Iehova. Ia pee tatou i to ˈna hiˈoraa ma te rave maitai i ta tatou ohipa, e faaoaoa tatou ia ˈna e e oaoa atoa tatou.
Mea faufaa te ohipa. Eiaha roa râ tatou e haafaufaa ˈtu â i te reira i ta tatou haamoriraa ia Iehova. (Ioane 6:27) Ua fafau oia e ia haafaufaa ˈtu â tatou i ta tatou taviniraa ia Iehova i roto i to tatou oraraa, e horoa mai oia i te mau mea e hinaarohia e tatou no te ora.
2. Eaha te manaˈo au noa no nia i te moni?
Noa ˈtu ua parau te Bibilia e parururaa te moni, ua faaara atoa râ te reira eita te moni e faaoaoa ia tatou. (Koheleta 7:12) Te faaitoitohia ra tatou eiaha e nounou i te moni “ia mauruuru râ i ta [tatou] mau mea e vai nei.” (A taio i te Hebera 13:5.) Ia mauruuru tatou i te mau mea e vai nei ia tatou ra, eita tatou e manaˈo e te ere ra tatou i te tahi mea. Ia haapae ïa tatou i te mau tarahu faufaa ore. (Maseli 22:7) E ia ape i te mau hauti pere e te mau opuaraa no te riro oioi mai ei taata moni.
3. E nafea tatou e faaohipa ˈi i te moni ma te aau horoa noa?
E Atua aau horoa noa o Iehova, e nehenehe tatou e pee i to ˈna hiˈoraa. E nafea ïa? “Ia horoa noa e ia tufa ˈtu ma te aau tae.” (Timoteo 1, 6:18) E nehenehe tatou ma te aau horoa noa e faaohipa i ta tatou moni no te turu i te amuiraa, no te tauturu ia vetahi ê i roto i te fifi, te mau hoa Kerisetiano iho â râ. Eita o Iehova e hiˈo ehia moni ta tatou e horoa, oia râ, eaha tei turai ia tatou ia horoa. Ia horoa tatou ma te aau taatoa, e oaoa tatou e e faaoaoa tatou ia Iehova.—A taio i te Ohipa 20:35.
A FAAHOHONU ATU Â
A hiˈo eaha te maitai ia tuu i te ohipa i to ˈna iho vairaa e ia mauruuru i te mau mea e vai nei ia tatou ra.
4. A faahanahana ia Iehova na roto i ta oe ohipa
E ohipa to tatou auhoaraa e o Iehova i to tatou haerea i te ohipa. A pata i te VIDEO, e a aparau i te mau uiraa i muri nei.
-
I roto i te video, eaha ta oe i au roa no nia i to Jason huru e haerea i ta ˈna vahi raveraa ohipa?
-
Eaha ta ˈna i rave no te tuu i ta ˈna ohipa i to ˈna iho vairaa?
A taio i te Kolosa 3:23, 24, e a aparau i teie uiraa:
-
No te aha mea faufaa to tatou haerea no nia i te ohipa?
Mea faufaa te ohipa. Eiaha râ tatou e haafaufaa ˈtu â i te reira i ta tatou haamoriraa ia Iehova
5. E faufaahia tatou ia faaite tatou i te mauruuru
E rave rahi taata o te haaputu rahi nei i te moni. Tera râ, te horoa mai ra te Bibilia i te mau aˈoraa taa ê. A taio i te Timoteo 1, 6:6-8, e a aparau i teie uiraa:
-
Eaha ta te Bibilia e faaitoito ra ia tatou ia rave?
Noa ˈtu mea iti roa ta tatou, e oaoa iho â tatou. A pata i te VIDEO, e a aparau i te uiraa i muri nei.
-
Noa ˈtu mea iti roa te moni, eaha tei faaoaoa i teie mau utuafare?
Tera râ, eaha te tupu mai te peu mea rahi ta tatou moni e te hinaaro ra tatou hau atu â? Ua horoa Iesu i te hoê faahohoˈaraa o te faaite ra no te aha mea atâta te reira. A taio i te Luka 12:15-21, e a aparau i teie uiraa:
-
Eaha ta oe i haapii mai i te faahohoˈaraa a Iesu?—A hiˈo i te irava 15.
A taio e a faaau i te Maseli 10:22 e te Timoteo 1, 6:10. E a aparau i teie mau uiraa:
-
No oe, eaha te mea faufaa roa ˈtu â? Te hoê auhoaraa e o Iehova aore ra ia rahi ta oe moni? No te aha?
-
Eaha te mau fifi ia hinaaro oe ia rahi ta oe moni?
6. E haapao Iehova i te mau mea hinaarohia e tatou
Nehenehe te mau fifi o te ohipa e te moni e tamata i to tatou faaroo ia Iehova. A pata i te VIDEO no te ite eaha te nehenehe e rave ia farerei tatou i teie mau fifi e a aparau i te mau uiraa i muri nei.
-
I roto i te video, eaha te mau fifi ta te hoê taeae i farerei?
-
Eaha ta ˈna i rave ia manuïa mai oia i mua i teie mau fifi?
A taio i te Mataio 6:25-34, e a aparau i teie uiraa:
-
Eaha ta Iehova i fafau no te feia o tei tuu ia ˈna na mua roa i roto i to ratou oraraa?
TE MANAˈO O VETAHI: “Mea ohipa roa vau no te aupuru i to ˈu utuafare. Eita ta ˈu e nehenehe e haere i te mau putuputuraa i te mau hebedoma atoa.”
-
Eaha te irava o te haapapu ia oe e faaotiraa maitai roa ia tuu oe i ta oe haamoriraa ia Iehova na mua roa?
HAAPOTORAA
Mea faufaa te ohipa e te moni, eiaha râ e vaiiho i te reira ia haafifi i ta tatou taviniraa ia Iehova.
Haamanaˈoraa
-
Eaha te nehenehe e tauturu ia oe ia tapea i te hoê manaˈo au noa no nia i te ohipa?
-
E nafea oe e faufaahia ˈi i te faaiteraa i te mauruuru?
-
E nafea oe e nehenehe ai e faaite i to oe tiaturiraa i ta Iehova i fafau no te aupuru i to ˈna nunaa?
HIˈOPOA
A hiˈo mai te peu te parau ra te Bibilia e mea ino te moni.
“O te moni anei te tumu o te mau ino atoa nei?” (Tumu parau natirara)
A haapii e nafea tatou e faaohipa ˈi i ta tatou moni no te faaoaoa i te Atua.
“Eaha ta te Bibilia e parau ra no nia i te mau ô horoa noa?” (Tumu parau natirara)
Mea ino anei te hauti pere?
A hiˈo eaha tei turai i te hoê taata hauti pere e taata eiâ atoa ia taui i to ˈna oraraa.
“Mea au roa na ˈu te mau hororaa puaahorofenua” (Tumu parau o Te Pare Tiairaa)
E au atoa outou . . .
UIRAA A TE TAATA
Eaha te ravehia i te hoê haapiiraa Bibilia pûpûhia na te mau Ite no Iehova?
Maoti teie aparauraa Bibilia tamoni ore pûpûhia na te mau Ite no Iehova, nehenehe outou e faaohipa i ta outou iho Bibilia. A titau atoa mai i to outou utuafare aore ra hoa.
