HAAPIIRAA 47
Ua ineine anei oe no te bapetizoraa?
Ua haapii oe e rave rahi ohipa no nia ia Iehova na roto i ta oe haapiiraa Bibilia. Mea papu ua rave oe i te tahi mau tauiraa no te faaohipa i ta oe i haapii. Te vai ra paha te tahi ohipa o te tapea ra ia oe ia pûpû ia oe iho no Iehova e ia bapetizohia oe. E faaite teie haapiiraa i te tahi mau fifi matauhia o te bapetizoraa e e nafea oe e nehenehe ai e faaruru i te reira.
1. E titauhia anei ia oe ia ite pauroa hou oe a bapetizohia ˈi?
No te bapetizo ia oe, e titauhia ia oe ia “ite papu i te parau mau.” (Timoteo 1, 2:4) E ere ïa te auraa ia ite pauroa oe i te pahonoraa o te uiraa tataitahi o te Bibilia hou oe a bapetizohia ˈi. Te tamau ra hoi te mau Kerisetiano bapetizohia i te haapii i te Bibilia. (Kolosa 1:9, 10) E titauhia râ ia faahohonu atu â i to oe ite i te mau haapiiraa Bibilia. E tauturu te mau matahiapo o te amuiraa ia ite e ua ineine anei oe no te bapetizoraa.
2. Eaha te mau taahiraa e titauhia ia oe ia rave hou oe a bapetizohia ˈi?
Hou oe a bapetizohia ˈi, mea tia ia oe ia “tatarahapa e [ia] fariu mai.” (A taio i te Ohipa 3:19.) Te auraa ia tatarahapa mau oe no te mau hara atoa ta oe i rave e ia ani ia Iehova ia faaore mai i te reira. E ia haapae atoa oe i te hoê haerea ino e ia faaoti papu oe i te pee i te hoê eˈa o ta Iehova e farii. Hau atu â, e haamata oe i te apiti i te mau putuputuraa e i te poro e te amuiraa mai te hoê taata poro bapetizo-ore-hia.
3. No te aha eiaha oe e vaiiho i te mǎtaˈu ia tapea ia oe?
E mǎtaˈu vetahi eita e haere ia ratou ia rave i ta ratou i euhe ia Iehova. Parau mau, i te tahi mau taime e hape oe mai te mau tane e vahine taiva ore i faahitihia i roto i te Bibilia. Ua ite Iehova mea tia ore ta ˈna mau tavini. (A taio i te Salamo 103:13, 14.) E oaoa oia ia rave oe i te maraa ia oe! E tauturu oia ia oe. Te haapapu ra Iehova ia tatou e ore roa ˈtu te tahi atu mea “e faataa ê ia tatou i [to ˈna] here.”—A taio i te Roma 8:38, 39.
A FAAHOHONU ATU Â
A hiˈo e nafea oe e nehenehe ai e faaruru i te tahi mau fifi o te bapetizoraa ma te haapii hau atu â no nia ia Iehova e ma te farii i ta ˈna tauturu.
4. A haapii hau atu â no nia ia Iehova
Ua ite maitai anei oe o vai Iehova hou oe a bapetizohia ˈi? E titauhia ia oe ia ite maitai o vai o ˈna, ia here oe ia ˈna e ia faaoaoa oe ia ˈna. A pata i te VIDEO no te ite e nafea te mau piahi Bibilia na te ao nei i te na reiraraa. E a aparau i te uiraa i muri nei.
-
I roto i te video, eaha tei tauturu i te tahi mau taata ia faaineine no te bapetizoraa?
A taio i te Roma 12:2, e a aparau i teie mau uiraa:
-
No oe, te vai ra anei te tahi mau feaaraa no nia i ta te Bibilia e haapii ra aore ra tei te mau Ite no Iehova anei te parau mau?
-
Mai te peu tera iho â, eaha ta oe e nehenehe e rave?
5. A faaruru i te mau fifi no te bapetizoraa
Ia faaoti tatou e pûpû ia tatou iho no Iehova e ia bapetizohia, e faaruru tatou i te mau fifi. No te ite i te hoê hiˈoraa, a pata i te VIDEO, e a aparau i te mau uiraa i muri nei.
-
I roto i te video, eaha ta Narangerel i rave no te faaruru i te mau fifi no te tavini ia Iehova?
-
E nafea te here no Iehova i tauturu ai ia ˈna ia manuïa i mua i teie mau fifi?
A taio i te Maseli 29:25 e te Timoteo 2, 1:7, e a aparau i teie uiraa:
-
Eaha te horoa mai i te itoito ia faaruru tatou i te mau fifi?
6. A tiaturi i ta Iehova tauturu
E tauturu Iehova ia oe ia faaoaoa ia ˈna. A pata i te VIDEO, e a aparau i te mau uiraa i muri nei.
-
I roto i te video, eaha tei tapea i te hoê piahi Bibilia ia bapetizo ia ˈna?
-
Eaha ta ˈna i haapii tei tauturu ia ˈna ia haapuai i to ˈna tiaturiraa ia Iehova?
A taio i te Isaia 41:10, 13, e a aparau i teie uiraa:
-
No te aha e nehenehe oe e tiaturi e tapea i te euhe ta oe i rave i to oe pûpûraa?
7. A faaite i to oe mauruuru rahi no to Iehova here
Hau atu â oe i te feruri i te here o Iehova no oe, hau atu â oe i te mauruuru e i te hinaaro e tavini ia ˈna e a muri noa ˈtu. A taio i te Salamo 40:5, e a aparau i teie uiraa:
-
Eaha te mau haamaitairaa no ǒ mai ia Iehova ra ta oe i mauruuru roa?
Ua here te peropheta Ieremia ia Iehova e i ta ˈna parau, e ua mauruuru rahi roa oia i te haamaitairaa e amo i te iˈoa o Iehova. Ua na ô oia: “Ua riro ta oe parau ei popouraa e ei oaoaraa no to ˈu aau, ua topahia hoi au i to oe iˈoa, e Iehova te Atua.” (Ieremia 15:16) A pahono i teie mau uiraa:
-
No te aha e haamaitairaa taa ê te riroraa mai ei Ite no Iehova?
-
E hinaaro anei oe ia bapetizohia oe mai te hoê o te mau Ite no Iehova?
-
Te vai ra anei te tahi ohipa e tapea ra ia oe ia na reira?
-
No oe, eaha te titauhia ia oe ia rave ia naea te fa o te bapetizoraa?
TE MANAˈO O VETAHI: “Te mǎtaˈu nei au eita e haere ia ˈu ia rave i ta ˈu e euhe ia bapetizohia vau.”
-
Tera anei to oe manaˈo?
HAAPOTORAA
Maoti ta Iehova tauturu, e nehenehe oe e faaruru i te mau fifi atoa o te bapetizoraa.
Haamanaˈoraa
-
Titauhia anei ia oe ia ite pauroa te Bibilia hou oe a bapetizohia ˈi?
-
Eaha te mau tauiraa e titauhia ia oe ia rave hou oe a bapetizohia ˈi?
-
No te aha eiaha e vaiiho i te mǎtaˈu ia tapea ia oe?
HIˈOPOA
A feruri eaha te tumu e faaoti ai oe e bapetizo ia oe?
“Ua ineine anei outou no te bapetizoraa?” (Te Pare Tiairaa Mati 2020)
A haapii e nafea ia faaruru i te mau fifi taa ê o te nehenehe e tapea ia oe.
“Eaha te tapea ra ia ˈu ia ore ia bapetizohia?” (Te Pare Tiairaa Mati 2019)
A hiˈo e nafea te hoê taata i manuïa ˈi i mua i te tahi mau fifi rahi no te bapetizo ia ˈna.
I te haamataraa, ua taiâ te hoê taata o Ataa te iˈoa i te bapetizo ia ˈna. A hiˈo eaha tei tauturu ia ˈna ia rave i teie faaotiraa faufaa roa.
E au atoa outou . . .
UIRAA A TE TAATA
Eaha te ravehia i te hoê haapiiraa Bibilia pûpûhia na te mau Ite no Iehova?
Maoti teie aparauraa Bibilia tamoni ore pûpûhia na te mau Ite no Iehova, nehenehe outou e faaohipa i ta outou iho Bibilia. A titau atoa mai i to outou utuafare aore ra hoa.
