HAAPIIRAA 53
A maiti i te faaanaanataeraa o te faaoaoa ia Iehova
E “Atua oaoa” o Iehova. (Timoteo 1, 1:11) Te hinaaro ra o ˈna ia oaoa tatou e ia oaoa tatou i te oraraa. E oaoa o ˈna ia rave tatou i te taime no te tamǎrû i muri mai i tatou ohipa. I roto i teie haapiiraa, e ite mai tatou e nafea ia faaohipa i to tatou taime faafaaearaa ma te oaoa e te au maitai, e ia oaoa atoa Iehova.
1. Eaha ta tatou e haamanaˈo ia maiti tatou i te hoê faaanaanataeraa?
Eaha ta oe e au ia rave no te tamǎrû ia oe? Mea au na vetahi e rave i to ratou taime faafaaearaa i te fare: mai te taioraa i te hoê buka, faarooraa i te upaupa, mataitairaa i te hohoˈa teata aore ra haereraa i nia i te natirara. Mea au na te tahi atu e rave i te tahi mau ohipa e to ratou mau hoa: mai te haereraa na nia i te mouˈa, ˈauraa aore ra hautiraa i te hauti video. Noa ˈtu eaha ta tatou e maiti, ia papu ia tatou e faaanaanataeraa te reira o “ta te Fatu e farii.” (Ephesia 5:10) Mea faufaa ia taa ia tatou i te reira, no te mea mea rahi te mau faaanaanataeraa ta Iehova e ore e au, mai te hamani-ino-raa, te peu taotoraa tia ore aore ra te peu tahutahu. (A taio i te Salamo 11:5.) Eaha te tauturu ia tatou ia maiti ma te paari i ta tatou mau faaanaanataeraa?
Ia maiti tatou te mau hoa tei here ia Iehova, e ohipa maitai ratou i nia ia tatou e i ta tatou mau faaanaanataeraa. Mai ta tatou i haapii mai i roto i te haapiiraa na mua ˈtu, “te taata e haere ra e te feia paari, e paari ïa.” I te tahi râ pae, ia amui pinepine tatou e te feia aita e haafaufaa ra i te mau ture aveia a te Atua, “e fifi ïa” tatou.—Maseli 13:20.
2. No te aha mea faufaa ia haapao i te taime o ta tatou faaanaanataeraa?
Noa ˈtu mea maitai te faaanaanataeraa ta tatou e maiti, ia haapao maitai râ tatou eiaha ia rahi roa te taime e horoa no te reira. Ia ore anaˈe, eita e rahi faahou te taime no te mau ohipa faufaa. Te faaitoito mai ra te Bibilia ia “faaohipa maitai i to [tatou] taime.”—A taio i te Ephesia 5:15, 16.
A FAAHOHONU ATU Â
A haapii e nafea ia rave i te mau faaotiraa maitai no nia i ta oe mau faaanaanataeraa.
3. A patoi i te mau faaanaanataeraa ino
No te aha ia maiti maitai tatou i ta tatou mau faaanaanataeraa? A pata i te VIDEO, e a aparau i te mau uiraa i muri nei.
-
Eaha te tuatiraa e vai ra i te mau hauti tahito i Roma e te tahi o te mau faaanaanataeraa i teie mahana?
-
I roto i te video, eaha ta Danny i haapii no nia i te mau faaanaanataeraa?
A taio i te Roma 12:9, e a aparau i teie uiraa:
-
E nafea teie irava e ohipa ˈi i nia i ta oe maitiraa i te faaanaanataeraa?
Eaha te tahi mau ohipa ta Iehova e au ore roa? A taio i te Maseli 6:16, 17 e te Galatia 5:19-21. Ia oti te mau irava i te taiohia, a aparau i teie uiraa:
-
Eaha te tahi o te mau mea i faahitihia i roto i teie mau irava te itehia i roto i te mau faaanaanataeraa i teie mahana?
Nafea oe e maiti ai i ta oe mau faaanaanataeraa ma te paari?
A feruri i te mau uiraa i muri nei:
-
Eaha? Te vai ra anei te tahi ohipa i roto i teie faaanaanataeraa ta Iehova e ore roa e au?
-
Afea? E haafifi anei te reira i te mau ohipa faufaa roa ˈˈe?
-
O vai? E turai anei te reira ia ˈu ia piri atu â aore ra ia tamau i te haamatau i te mau taata aita e here ra ia Iehova?
Mea maitai aˈe ia atea ê mai i teie mau ohipa atâta. No reira, mea tia ia faaatea ê mai tatou i te mau faaanaanataeraa atoa ta tatou e manaˈo e ere i te mea maitai no tatou
4. A faaohipa i to oe taime ma te paari
A pata i te VIDEO, e a aparau i te uiraa i muri nei.
-
Noa ˈtu aita te taeae i roto i te video e mataitai ra i te tahi mea ino, mea nafea ra te taime faafaaearaa ta ˈna i maiti e ohipa ˈi i nia ia ˈna?
A taio i te Philipi 1:10, e a aparau i teie uiraa:
-
E nafea teie irava e tauturu ai ia tatou ia faaoti ehia taime ta tatou e horoa no te mau faaanaanataeraa?
5. A maiti i te mau faaanaanataeraa maitai
Noa ˈtu te vai ra te tahi mau faaanaanataeraa ta Iehova e ore e au, te vai ra râ e rave rahi mau faaanaanataeraa maitai. A taio i te Koheleta 8:15 e te Philipi 4:8, e a aparau i teie uiraa:
-
Eaha te mau faaanaanataeraa maitai ta oe e au?
E nehenehe oe e oaoa i te faaanaanataeraa maitai
TE MANAˈO O VETAHI: “Aita e ino i roto i te mau faaanaanataeraa te vai ra te hamani-ino-raa, te peu taotoraa tia ore aore ra te peu tahutahu, mai te peu aita vau e rave ra i te reira mau ohipa.”
-
Eaha ta oe e pahono?
HAAPOTORAA
Te hinaaro ra Iehova ia oaoa e ia maiti tatou i te mau faaanaanataeraa maitai.
Haamanaˈoraa
-
Eaha te mau faaanaanataeraa ta te mau Kerisetiano e patoi?
-
No te aha ia haapao maitai tatou i te rahiraa taime ta tatou e horoa no te mau faaanaanataeraa?
-
No te aha oe e hinaaro ai e maiti i te mau faaanaanataeraa o te faaoaoa ia Iehova?
HIˈOPOA
A feruri o vai te amo i te hopoia ia maiti tatou i te mau faaanaanataeraa.
A hiˈo e nafea ia rave i te mau faaotiraa maitai ia au i te mau faaanaanataeraa.
“E faaanaanataeraa maitai anei ta oe?” (Te Pare Tiairaa 1 no Atopa 2011)
I roto i te aamu “Ua faaruru vau i to ˈu mau manaˈo tano ore” a hiˈo no te aha te hoê taata i taui ai i ta ˈna faaotiraa no te mau faaanaanataeraa.
“Ua taui te Bibilia i to ˈu oraraa” (Tumu parau o Te Pare Tiairaa)
A hiˈo nafea te hoê metua vahine i te raveraa i te hoê faaotiraa paari ia au i te mau faaanaanataeraa o te faaite ra i te mau aamu no nia i te peu tahutahu.
A patoi i te mau faaanaanataeraa e vai ra te peu tahutahu (2:02)
E au atoa outou . . .
UIRAA A TE TAATA
Eaha te ravehia i te hoê haapiiraa Bibilia pûpûhia na te mau Ite no Iehova?
Maoti teie aparauraa Bibilia tamoni ore pûpûhia na te mau Ite no Iehova, nehenehe outou e faaohipa i ta outou iho Bibilia. A titau atoa mai i to outou utuafare aore ra hoa.
