HAAPIIRAA 54
Te tiaraa o “te tavini haapao maitai e te paari”
O Iesu te upoo o te amuiraa Kerisetiano. (Ephesia 5:23) I teie mahana, mai te raˈi mai, te aratai ra Iesu i ta ˈna mau tavini i te fenua nei na roto i te “tavini haapao maitai e te paari.” (A taio i te Mataio 24:45.) Na Iesu i faatoroa ia ratou, te vai ra i te “tavini” te tahi mana, tera râ, e vai noa ratou ei tavini no te Mesia e e tavini ratou i te mau taeae o te Mesia. O vai teie tavini? E nafea teie tavini e haapao maitai ai ia tatou?
1. O vai “te tavini haapao maitai e te paari”?
Ua faaohipa noa Iehova i te hoê taata aore ra hoê pǔpǔ iti taata no te horoa i te aratairaa i to ˈna nunaa. (Malaki 2:7; Hebera 1:1) I muri aˈe i to Iesu poheraa, na te mau aposetolo e te mau matahiapo no Ierusalema i rave i teie hopoia. (Ohipa 15:2) Ma te pee i teie faanahoraa, te horoa ra te hoê pǔpǔ iti matahiapo parauhia te Tino aratai a te mau Ite no Iehova i teie mahana i te maa pae varua e te mau aratairaa no te ohipa pororaa. Teie pǔpǔ o “te tavini haapao maitai e te paari ta [Iesu] . . . i faatoroa.” (Mataio 24:45a) E mau Kerisetiano faatavaihia te mau mero atoa o te Tino aratai o te apiti atu e te Mesia i roto i ta ˈna Faatereraa arii i te raˈi ia pohe ratou i nia i te fenua nei.
2. Eaha te maa pae varua ta te tavini haapao maitai e horoa mai?
Ua parau Iesu e na te tavini haapao maitai e “horoa ˈtu [i te mau Kerisetiano] i ta ratou maa i te taime tano.” (Mataio 24:45b) Mai te maa ta tatou e amu o te tauturu i to tatou tino ia vai pautuutu noa, e horoa atoa mai te maa pae varua, i te mau aratairaa no roto mai i te Parau a te Atua, i te puai ta tatou e hinaaro ia vai taiva ore noa ia Iehova e ia rave tatou i te ohipa ta Iesu i horoa mai. (Timoteo 1, 4:6) E fanaˈo tatou i teie maa pae varua i ta tatou mau putuputuraa, te mau tairururaa haaati, te mau tairururaa e toru mahana, te mau papai e te mau video o te tauturu ia tatou ia taa i to te Atua hinaaro e ia puai to tatou auhoaraa e o ˈna.
A FAAHOHONU ATU Â
A hiˈo no te aha tatou e hinaaro ai i “te tavini haapao maitai e te paari,” te Tino aratai.
Te horoa mai ra te Tino aratai i te maa pae varua, te aratairaa e te tauturu e hinaarohia na te mau Ite no Iehova ati aˈe te ao nei
3. Mea titauhia ia naho te nunaa o Iehova
I raro aˈe i te aratairaa a Iesu, e faanaho te Tino aratai i te ohipa a te mau Ite no Iehova. Mai te reira atoa te faanahoraa i vai na i rotopu i te mau Kerisetiano matamua. A pata i te VIDEO.
A taio i te Korinetia 1, 14:33, 40, e a aparau i teie uiraa:
-
E nafea teie mau irava e faaite mai ai e te hinaaro ra Iehova ia naho to ˈna mau Ite?
4. Na te tavini haapao maitai e faanaho i ta tatou ohipa pororaa
Ua riro te pororaa ei ohipa faufaa roa no te mau Kerisetiano matamua. A taio i te Ohipa 8:14, 25, e a aparau i teie mau uiraa:
-
I rotopu i te mau Kerisetiano matamua, na vai i aratai i te ohipa pororaa?
-
Mea nafea Petero raua Ioane i te pahonoraa i te aratairaa a te tahi atu mau aposetolo?
Te pororaa o te ohipa faufaa roa ˈˈe o tei faanahohia e te Tino aratai. A pata i te VIDEO.
Ua faaite Iesu i te faufaaraa o te pororaa. A taio i te Mareko 13:10, e a aparau i teie mau uiraa:
-
No te aha mea faufaa no te Tino aratai te ohipa pororaa?
-
No te aha tatou e hinaaro ai na “te tavini haapao maitai e te paari” e faanaho i teie ohipa na te ao nei?
5. E horoa te tavini haapao maitai i te aratairaa
Na te Tino aratai e horoa i te aratairaa na te mau Kerisetiano na te ao nei. E nafea ratou ia faaoti eaha te aratairaa e horoa? A hiˈo mea nafea te tino aratai o te mau Kerisetiano matamua i te na reiraraa. A taio i te Ohipa 15:1, 2, e a aparau i teie mau uiraa:
-
Eaha te tupuraa tei faatupu i te aimârôraa i rotopu i te tahi mau Kerisetiano matamua?
-
Eaha ta Paulo, Baranaba e te tahi atu i rave no te faaafaro i teie fifi?
A taio i te Ohipa 15:12-18, 23-29, e a aparau i teie uiraa:
-
Hou a rave ai i te faaotiraa, eaha ta te tino aratai matamua i feruri a imi ai ratou i te aratairaa a te Atua no teie tupuraa?—A hiˈo i te mau irava 12, 15 e 28.
A taio i te Ohipa 15:30, 31 e te 16:4, 5, e a aparau i teie mau uiraa:
-
Eaha te huru o te mau Kerisetiano matamua i te aratairaa ta te tino aratai i horoa ˈtu?
-
Mea nafea Iehova i te haamaitairaa i to ratou auraroraa?
A taio i te Timoteo 2, 3:16 e te Iakobo 1:5, e a aparau i teie uiraa:
-
Ihea te Tino aratai e ite ai i te aratairaa ia rave ratou i te mau faaotiraa i teie mahana?
TE MANAˈO O VETAHI: “Ia faaroo outou i te Tino aratai, te pee noa ra outou i te taata.”
-
Eaha te haapapu ra ia outou na Iesu e aratai ra i te Tino aratai?
HAAPOTORAA
Na Iesu i faatoroa i te Tino aratai oia hoi “te tavini haapao maitai e te paari.” Te horoa ra ratou i te aratairaa e te maa pae varua no te mau Kerisetiano na te ao nei.
Haamanaˈoraa
-
Na vai i faatoroa i “te tavini haapao maitai e te paari”?
-
Nafea te Tino aratai e haapao ai ia tatou?
-
Te tiaturi ra anei oe o te Tino aratai “te tavini haapao maitai e te paari”?
HIˈOPOA
A hiˈo nafea te Tino aratai i te faanahoraahia no te rave i ta ˈna ohipa.
“Eaha te Tino aratai a te mau Ite no Iehova?” (Tumu parau natirara)
A haapii nafea te Tino aratai e haapapu mai ai e te fanaˈo ra tatou i te maa pae varua i te taime tano.
Eaha te huru o te mau mero o te Tino aratai no nia i te ohipa ta Iesu i horoa ia rave ratou?
Na te aha e haapapu ia tatou na Iehova e aratai ra i te Tino aratai no ta tatou mau putuputuraa e tairururaa e toru mahana?
E au atoa outou . . .
UIRAA A TE TAATA
Eaha te ravehia i te hoê haapiiraa Bibilia pûpûhia na te mau Ite no Iehova?
Maoti teie aparauraa Bibilia tamoni ore pûpûhia na te mau Ite no Iehova, nehenehe outou e faaohipa i ta outou iho Bibilia. A titau atoa mai i to outou utuafare aore ra hoa.
