HAAPIIRAA 7
Eaha te Basileia o te Atua?
1. Eaha te Basileia o te Atua?
No te aha mea tano roa e o Iesu te Arii?—MAREKO 1:40-42.
Te Basileia o te Atua, o te faatereraa arii ïa a te Atua i te raˈi. E haamou te reira i te tahi atu mau faatereraa atoa, a tupu atu ai te hinaaro o te Atua i te raˈi e i nia i te fenua. E parau apî oaoa teie. Ua hinaaro noa na hoi te taata i te hoê faatereraa maitai mai tera te huru. E tahoê te reira i te taata atoa i te fenua.—A taio i te Daniela 2:44; Mataio 6:9, 10; 24:14.
Ua faatoroa Iehova i ta ˈna Tamaiti Iesu Mesia ei Arii o ta ˈNa Faatereraa arii.—A taio i te Apokalupo 11:15.
A hiˈo i te video Eaha te Basileia o te Atua?
2. No te aha mea tano roa e o Iesu te Arii?
Mea tano roa e o te Tamaiti a te Atua te Arii, mea hamani maitai hoi oia e mea au roa na ˈna te parau-tia. (Mataio 11:28-30) E mana atoa to ˈna no te tauturu i te taata no te mea na ˈna e faatere i te fenua mai te raˈi mai. I muri aˈe i to ˈna tia-faahou-raa, ua haere oia i nia i te raˈi e ua parahi i te rima atau o Iehova a tiai noa ˈi. (Hebera 10:12, 13) I te pae hopea, ua horoa te Atua ia Iesu i te mana no te faatere.—A taio i te Daniela 7:13, 14.
3. O vai ma te faatere e o Iesu?
O te hoê pǔpǔ parauhia “te feia moˈa” te faatere e o Iesu i te raˈi. (Daniela 7:27) Te feia moˈa i maitihia na mua, o te mau aposetolo taiva ore ïa a Iesu. Ua maiti â Iehova i te tahi mau tane e vahine taiva ore e tae roa mai i teie mahana. Mai ia Iesu, e faatiahia mai ratou ei varua.—A taio i te Ioane 14:1-3; Korinetia 1, 15:42-44.
Ehia te haere i te raˈi? Ua parau Iesu ia ratou e “nǎnǎ iti.” (Luka 12:32) To ratou numera, 144 000 ïa. E faatere ratou i te fenua na muri ia Iesu.—A taio i te Apokalupo 14:1.
4. Eaha tei tupu i to Iesu haamataraa i te faatere?
Ua haamata te Faatereraa arii a te Atua i te faatere i te matahiti 1914. a Te ohipa matamua ta Iesu i rave ei Arii, o te huriraa mai ïa ia Satani e ta ˈna mau demoni i raro nei i te fenua. Ua riri roa Satani e ua haamata ˈtura i te faatupu i te ati na te ao nei. (Apokalupo 12:7-10, 12) Mai reira mai, ua rahi noa ˈtu â te ati o te huitaata. Te tamaˈi, te oˈe, te maˈi pee e te aueueraa fenua, e tuhaa anaˈe te reira o te “tapao” e faaite ra fatata te Faatereraa arii i te faaafaro i te mau fifi atoa i nia i te fenua.—A taio i te Luka 21:7, 10, 11, 31.
5. Eaha te ohipa ta te Faatereraa arii a te Atua e rave ra?
Maoti te ohipa pororaa na te ao nei, te haaputuputu ra te Faatereraa arii a te Atua i te hoê nahoa rahi taata no te mau nunaa atoa. E mirioni taata mǎrû te auraro nei i te Arii Iesu. E paruru te Faatereraa arii a te Atua ia ratou ia haamouhia te faanahoraa ino o te ao nei. Te feia atoa e hinaaro e fanaˈo i te mau haamaitairaa a te Faatereraa arii a te Atua, ia haapii ïa i te auraro i te Arii Iesu.—A taio i te Apokalupo 7:9, 14, 16, 17.
I te roaraa o na 1 000 matahiti e faatere ai te Faatereraa arii, e tupu te opuaraa matamua a te Atua no te huitaata. E riro te fenua taatoa ei paradaiso. I te hopea, e faahoˈi Iesu i te Faatereraa arii i to ˈna Metua. (Korinetia 1, 15:24-26) Ua matau anei oe i te tahi taata ta oe e hinaaro e faaite atu i te poroi o te Faatereraa arii a te Atua?—A taio i te Salamo 37:10, 11, 29.
a No te ite atu â no te aha e matahiti faufaa 1914 ia au i te parau tohu Bibilia, a hiˈo i te faataaraa hau 22 i te pae hopea o te buka Eaha ta te Bibilia e haapii mai?
