PENE 15
“Aroha ihora”
“E te Fatu, ia araara to mâua mata”
1-3. (1) Eaha ta Iesu e rave ia taparu e piti matapo ani moni ia ˈna ia tauturu ia raua? (2) Eaha te auraa o te parau “aroha ihora”? (A hiˈo i te nota.)
E PITI matapo te parahi ra i te hiti purumu, i rapaeau noa mai ia Ieriko. E haere raua i reira pauroa te mahana e imi i te hoê vahi e na reira ˈtu te nahoa taata i te haere, a taparu atu ai i te moni. I teie râ mahana, e ite raua i te tahi mea o te taui roa i to raua oraraa.
2 E faaroo taue na feia taparu i te maniania. No te ite ore i te ohipa e tupu ra, e ui te hoê o raua eaha tera, e e parauhia ˈtu e: “O Iesu no Nazareta teie e haere nei!” Te haere ra Iesu i Ierusalema no te taime hopea. E ere râ o ˈna anaˈe, e nahoa taata rahi te apee ra ia ˈna. I to raua faarooraa o vai tera e haere ra, e maniania na feia taparu ma te pii: “E te Fatu, aroha mai ia mâua, Tamaiti a Davida.” No to ratou riri, e haamamû te nahoa taata ia raua, te hepohepo râ raua. Eita raua e mamû.
3 E faaroo Iesu i ta raua pii tei puai aˈe i te maniania a te nahoa. Eaha ta ˈna e rave? Mea rahi te mea e faateimaha ra i to ˈna feruriraa e aau. Te haamata ra oia i te hebedoma hopea o to ˈna oraraa i nia i te fenua. Ua ite oia e o te mauiui e te pohe aroha ore te tiai mai ra ia ˈna i Ierusalema. Teie râ, eita o ˈna e tâuˈa ore i te mau pii tuutuu ore. E faaea oia e e ani ia arataihia na taata e pii ra ia ˈna ra. “E te Fatu, ia araara to mâua mata,” ta raua ïa e taparu. “Aroha ihora” Iesu, tapea ˈtura i to raua mata, araara aˈera to raua mata. a I reira noa, e pee raua ia Iesu.—Luka 18:35-43; Mataio 20:29-34.
4. Mea nafea to Iesu faatupuraa i te parau tohu e “e aroha oia i te taata haihai”?
4 E ere teie i te tupuraa otahi. E rave rahi taime e i roto e rave rahi tupuraa, ua turai-roa-hia Iesu ia faaite i te aumihi. Ua faaite atea te parau tohu Bibilia e “e aroha oia i te taata haihai.” (Salamo 72:13) Ia au i teie mau parau, ua tâuˈa mau â Iesu i te mau huru aau o vetahi ê. Ua tauturu mau â oia i te taata. E turai to ˈna aumihi i roto i ta ˈna pororaa. E hiˈo anaˈe e nafea te mau Evanelia e faaite ai i te aumihi î i te here o te mau parau e ohipa a Iesu e e hiˈopoa anaˈe e nafea ia faaite i te hoê â aumihi.
Tâuˈaraa i te mau huru aau o vetahi ê
5, 6. Eaha te mau hiˈoraa e faaite ra e e taata aumauiui Iesu?
5 E taata aumauiui roa Iesu. Ua taa ia ˈna te mau huru aau o te feia e mauiui ra e ua tufa oia i te reira. Noa ˈtu e aita oia i ora i to ratou mau tupuraa atoa, ua ite mau râ oia i to ratou mauiui i roto i to ˈna aau. (Hebera 4:15) I to ˈna faaoraraa i te hoê vahine 12 matahiti to ˈna poheraa i te tapahi, ua faataa oia i to ˈna maˈi mai te hoê “maˈi ino,” o te faaite ra i to ˈna ahoaho e mauiui rahi no te reira. (Mareko 5:25-34) I to ˈna iteraa ia Maria e te feia i pihai iho ia ˈna e oto ra no te poheraa o Lazaro, ua putapû roa oia i to ratou peapea e ua horuhoru oia. Ua ite oia e e haere oia e faatia mai ia Lazaro, ua aroha roa râ Iesu e ua î to ˈna mata i te roimata.—Ioane 11:33, 35.
6 I te tahi atu taime, ua tapiri atu te hoê lepera ia Iesu e ua taparuparu e: “Ia tia ia oe, e nehenehe oe e tamâ ia ˈu.” Ua aha Iesu, te hoê taata tia roa aita i maˈihia aˈenei? Ua mauiui to ˈna aau no te lepera. Oia mau, “aroha ihora Iesu ia ˈna.” (Mareko 1:40-42) I muri iho, ua rave oia i te hoê ohipa maere roa. Ua ite maitai oia e mea viivii te mau lepera ia au i te Ture e eiaha ratou e amui atu ia vetahi ê. (Levitiko 13:45, 46) E nehenehe iho â ta Iesu e faaora i teie taata ma te ore e tapea roa ˈtu ia ˈna. (Mataio 8:5-13) Ua faaoti râ oia i te faatoro i to ˈna rima e i te tapea i te lepera, a parau atu ai e: “E tia ia ˈu! Ia mâ oe.” I reira noa, pee atura te maˈi lepera. Auê ïa aumauiui î i te here o Iesu e!
A faaite i “te aumauiui”
7. Eaha te nehenehe e tauturu ia tatou ia atuatu i te aumauiui, e e nafea teie huru maitai e faaitehia ˈi?
7 Ei Kerisetiano, te titauhia ra ia pee tatou ia Iesu i roto i te faaiteraa i te aumauiui. Te aˈo mai ra te Bibilia ia faaite i “te aumauiui.” b (Petero 1, 3:8) E ere i te mea ohie ia taa i te mau huru aau o te feia e maˈi tamau to ratou aore ra e hepohepo rahi ra, mai te peu iho â râ e aita to tatou taua mau maˈi ra. A haamanaˈo râ, aita e titauhia ia faaruru i te hoê â tupuraa no te faaite i te aumauiui. Ua aumauiui Iesu i te feia maˈi noa ˈtu e aita oia i maˈihia aˈenei. E nafea ïa tatou e nehenehe ai e atuatu i te aumauiui? Na roto ïa i te faarooraa ma te faaoromai i te feia e mauiui ra ia hohora mai i to ratou aau e ia faatia mai i to ratou mau huru aau. E nehenehe tatou e ui ia tatou iho: ‘Ahani o vau tera, eaha ïa to ˈu huru?’ (Korinetia 1, 12:26) Ia tâuˈa mau â tatou i te mau huru aau o vetahi ê, e nehenehe atu â tatou e ‘paraparau ma te mahanahana i te feia e hepohepo ra.’ (Tesalonia 1, 5:14) I te tahi taime, e faaitehia te aumauiui eiaha noa na roto i te mau parau, te roimata atoa râ. “A taˈi e te feia e taˈi ra,” ta te Roma 12:15 ïa e parau ra.
8, 9. Mea nafea to Iesu tâuˈaraa i te mau huru aau o vetahi ê?
8 Mea tâuˈa roa Iesu ia vetahi ê, e ua haa oia ma te haapao i to ratou mau huru aau. A haamanaˈo na i te aratairaahia te hoê taata turi e te vava ia Iesu ra. E au ra e ua ite Iesu e te haama rii ra tera taata, ua rave hoi oia i te tahi mea aita o ˈna e na reira na ia faaora oia i te taata: “Aratai ihora Iesu ia ˈna i te hiti.” O raua anaˈe aita hoi e taata e hiˈo atura, e ua faaora o ˈna i te taata.—Mareko 7:31-35.
9 Ua tâuˈa â Iesu ia vetahi ê i to te taata aratairaa ia ˈna ra i te hoê matapo e aniraa ia faaorahia oia. “Rave maira Iesu i te rima o te matapo e aratai ihora ia ˈna i rapaeau mai i te oire.” Ua faaora riirii atura oia i te taata. Maoti te reira i nehenehe ai te taata e haamatau riirii i te mau mea anaana e te mau mea atoa ta ˈna e ite ra no te taime matamua. (Mareko 8:22-26) Ua tâuˈa mau â Iesu ia vetahi ê!
10. E nafea tatou e nehenehe ai e tâuˈa i te mau huru aau o vetahi ê?
10 Ei pǐpǐ a Iesu, e titauhia ia tâuˈa tatou i te mau huru aau o vetahi ê. E haapao maitai ïa tatou i ta tatou parau, ma te haamanaˈo e e nehenehe te faaohiparaa i te arero ma te feruri ore e haamauiui i te aau o vetahi ê. (Maseli 12:18; 18:21) Ei pǐpǐ a Iesu e tâuˈa tatou i te tahi atu ma te ore roa e faaohipa i te mau taˈo etaeta, parau faaino, e parau faaooo patiatia. (Ephesia 4:31) E te mau matahiapo, e nafea outou e nehenehe ai e tâuˈa i te mau huru aau o vetahi ê? Ia aˈo outou, a tamiti i ta outou mau taˈo i te hamani maitai, ia nehenehe te taata e faaroo mai ra e tapea noa i to ˈna tura. (Galatia 6:1) E te mau metua, e nafea outou e nehenehe ai e tâuˈa i te mau huru aau o ta outou mau tamarii? Ia aˈo outou, a tutava i te na reira ma te ore e faahaama faufaa ore ia ratou.—Kolosa 3:21.
A ohipa no te tauturu ia vetahi ê
11, 12. Eaha te mau faatiaraa Bibilia e faaite ra e aita i anihia ia Iesu ia faaite i te aumihi ia vetahi ê?
11 Aita Iesu i faaite i te aumihi no te mea noa ua anihia ˈtu. Inaha, e turai te aumihi i te hoê taata ia ohipa no te tahi atu o te hinaaro ra i te tauturu. No reira, na te aumihi î i te here i turai ia Iesu ia tauturu ia vetahi ê. Ei hiˈoraa, a parahi ai te hoê nahoa i pihai iho ia Iesu e toru mahana, aita hoi ta ratou e maa, aita e taata i parau ia ˈna e te poia ra te taata aore ra i ani atu e rave i te tahi mea. Te na ô ra te faatiaraa e: “Pii ihora râ Iesu i ta ˈna mau pǐpǐ ia haere mai e na ô atura: ‘Ua aroha roa vau i teie nahoa taata, a toru atura hoi mahana to ratou faaearaa ia ˈu nei e aita ta ratou e maa. Eita vau e hinaaro e tuu ia ratou ia hoˈi ma te poia, aˈunei ratou e matapoirihia ˈi i nia i te purumu.’” I muri iho, na nia noa i to ˈna iho hinaaro, ua faatamaa semeio oia i te nahoa taata.—Mataio 15:32-38.
12 A hiˈo na i te tahi atu faatiaraa. I 31, a fatata ˈi Iesu i te oire o Naina, e farerei oia i te hoê tupuraa peapea. Te faarue ra te tahi mau taata i te oire no te haere e huna i te “tamaiti fanau tahi a te hoê vahine ivi,” peneiaˈe i te mau menema tapiri i nia i te aivi. E nehenehe anei e feruri i te mauiui i roto i te aau o taua metua vahine ra? Te haere ra oia e huna i ta ˈna tamaiti otahi, e aita ta ˈna e tane no te oto e o ˈna. I rotopu i te feia atoa e haere ra i te hunaraa, ua “ite” atu Iesu i te vahine ivi tamarii ore. Ua putapû oia i ta ˈna i ite, oia, “aroha ihora” oia ia ˈna. Aita e taata i ani atu ia ˈna. Ua turai te aumihi i roto i to ˈna aau ia ˈna ia haa. “Tapiri atura Iesu, tapea ˈtura i te roˈi,” e faaora ˈtura i te taata apî ra. Eaha tei tupu i muri iho? Aita Iesu i parau i te taata apî ia apiti atu i te nahoa e ratere ra e o ˈna. Teie râ, ua “tuu atura Iesu ia ˈna i to ˈna metua vahine,” ia hoê faahou raua ei utuafare e ia nehenehe te vahine ivi e aupuruhia.—Luka 7:11-15.
E turai te aumihi ia ohipa no te tahi atu o te hinaaro ra i te tauturu
13. E nafea tatou e nehenehe ai e pee ia Iesu ma te tauturu i te feia e hinaaro ra i te reira?
13 E nafea tatou e nehenehe ai e pee i te hiˈoraa o Iesu? Parau mau, eita e haere ia tatou ia faatamaa semeio i te taata aore ra ia faahoˈi mai i tei pohe i te ora. E nehenehe râ ta tatou e pee ia Iesu ma te tauturu i te feia e hinaaro ra i te reira. E nehenehe te hoê hoa Kerisetiano e fifi roa i te pae faanavairaa faufaa aore ra e ere i ta ˈna ohipa. (Ioane 1, 3:17) Mea hinaarohia paha ia tataî-ru-hia te fare o te hoê vahine ivi. (Iakobo 1:27) Ua matau paha tatou i te hoê utuafare ua pohe te hoê mero, o te hinaaro ra i te tamahanahanaraa aore ra te tahi tauturu. (Tesalonia 1, 5:11) Ia hinaaro-mau-hia, eiaha tatou e tiai ia anihia mai no te tauturu atu. (Maseli 3:27) E turai te aumihi ia tatou ia tauturu, ia au i to tatou tupuraa. Eiaha roa ˈtu e haamoˈe e e nehenehe te tahi noa ohipa hamani maitai aore ra te tahi noa parau tamahanahana no roto mai i te aau, e riro ei faaiteraa puai i te aumihi.—Kolosa 3:12.
Ua turai te aumihi ia Iesu ia poro
14. No te aha Iesu i rave ai na mua roa i te ohipa pororaa i te parau apî oaoa?
14 Mai ta tatou i ite i te tuhaa 2 o teie buka, ua horoa Iesu i te hoê hiˈoraa faahiahia i roto i te pororaa i te parau apî oaoa. Ua na ô oia e: “Ia faaite atoa vau i te parau apî oaoa o te Faatereraa arii a te Atua i te tahi atu mau oire e tia ˈi, no reira hoi au i tonohia mai ai.” (Luka 4:43) No te aha oia i rave ai na mua roa i teie ohipa? No to ˈna ïa here i te Atua. Te vai râ te tahi ohipa o tei turai ia ˈna ia poro. O te aumihi ïa no vetahi ê. Mai ta tatou i ite, ua faaite Iesu i te aumihi i roto e rave rahi tupuraa, te ohipa faufaa râ ta ˈna i rave o te tautururaa te taata ia haapii no nia i to ˈna Metua. E hiˈopoa mai tatou e piti ohipa i tupu, o te faaite ra eaha to ˈna manaˈo i te feia ta ˈna i poro. Maoti te reira e nehenehe ai tatou e hiˈopoa i to tatou iho mau manaˈo turai e apiti ai tatou i te taviniraa.
15, 16. A faataa e piti ohipa i tupu e faaite ra i to Iesu manaˈo i te feia ta ˈna i poro.
15 I 31, i muri aˈe fatata e piti matahiti haaraa ma te itoito rahi i roto i te taviniraa, ua tutava ˈtu â Iesu i te “haere . . . na roto i te mau oire rahi e oire rii” o Galilea. Ua putapû to ˈna aau i ta ˈna i ite. Te faatia ra te aposetolo Mataio e: “I to ˈna iteraa i te nahoa taata, aroha roa ihora oia ia ratou, no te mea ua rave-ino-hia ratou e aita i tâuˈahia mai te mau mamoe aita e tiai.” (Mataio 9:36) Ua aumauiui Iesu i te feia riirii. Ua ite oia e ua hinaaro ratou e faatupu i te hoê auhoaraa e te Atua, aita râ ratou i ite maitai o vai oia. Ua ite oia e te rave-ino-hia ra ratou e te tâuˈa-ore-roa-hia ra e te mau aratai haapaoraa. No to ˈna aumihi hohonu, ua haa maite Iesu i te faaite ia ratou i te hoê poroi o te tiaturiraa. Aita ˈtu e mea ta ratou e hinaaro roa maori râ te parau apî oaoa o te Faatereraa arii a te Atua.
16 Ua tupu te hoê ohipa mai tera tau avaˈe i muri aˈe, piri atu i te oroa Pasa i 32. I taua taime ra, tei nia Iesu e ta ˈna mau aposetolo i te hoê poti e te haere ra na te miti o Galilea e imi i te hoê vahi faafaaearaa. Teie râ, ua horo te hoê nahoa na tatahi e ua tae i te tahi atu pae na mua ˈˈe i te poti. Eaha to Iesu huru? “I to Iesu pouraa na nia mai i te poti, ite ihora oia i te hoê nahoa rahi e aroha roa ˈtura ia ratou, no te mea e au ratou i te mau mamoe aita e tiai. Haapii atura oia ia ratou e rave rahi parau mau.” (Mareko 6:31-34) Ua “aroha roa ˈtura” Iesu, ua ite hoi oia te hinaaro mau ra te taata ia ite o vai te Atua. Mai “te mau mamoe aita e tiai,” aita ratou i haapiihia no nia ia Iehova e ua haapao noa ratou ia ratou iho. Na te aumihi i turai ia Iesu ia poro, eiaha râ no te mea noa e hopoia na ˈna tera.
A poro ma te aumihi
17, 18. (1) Eaha te turai ra ia tatou ia apiti i te taviniraa? (2) E nafea tatou e nehenehe ai e atuatu i te aumihi ia vetahi ê?
17 Eaha te turai ra ia tatou, ei pǐpǐ a Iesu, ia apiti i te taviniraa? Mai ta tatou i ite i te pene 9 o teie buka, e ohipa faauehia, e hopoia, ta tatou e poro e e faariro i te taata ei pǐpǐ. (Mataio 28:19, 20; Korinetia 1, 9:16) Eiaha râ tatou e rave i teie ohipa no te mea noa e e hopoia te reira. Te mea faufaa roa ˈˈe, na to tatou here ia Iehova e turai ra ia tatou ia poro i te parau apî oaoa o ta ˈna Faatereraa arii. Te poro atoa ra tatou no to tatou aumihi i te feia e ere hoê â tiaturiraa ta tatou. (Mareko 12:28-31) E nafea ïa tatou e nehenehe ai e atuatu i te aumihi ia vetahi ê?
18 Mea titauhia ia hiˈo tatou mai ia Iesu i hiˈo ia ratou, “ua rave-ino-hia ratou e aita i tâuˈahia mai te mau mamoe aita e tiai.” A feruri na e ua itea mai ia oe te hoê pinia mamoe tei moˈe. Ua poia e poihâ te animara iti, aita hoi e tiai no te aratai ia ˈna i te vahi aihere e pape. Eita anei to oe aau e aroha i taua pinia mamoe ra? Eita anei oe e tutava roa i te horoa ˈtu i te maa e te pape? E au taua pinia mamoe ra i e rave rahi taata aitâ i ite atura i te parau apî oaoa. Aita te mau aratai haapaoraa i haapii ia ratou i te parau mau no nia i te Atua, no reira e tiaturiraa to ratou no a muri aˈe. Te fanaˈo nei tatou i ta ratou e hinaaro ra, te maa maitai i te pae varua e te pape haumǎrû o te parau mau i roto i te Parau a te Atua. (Isaia 55:1, 2) Ia feruri tatou e mea faufaa ia ite te taata no nia i te Atua, e faaite tatou i te aumihi ia ratou. Mai te peu e mai ia Iesu e aroha roa tatou i te taata, e rave tatou i ta tatou e nehenehe no te faaite ia ratou i te tiaturiraa o te Faatereraa arii.
19. Eaha ta tatou e nehenehe e rave no te turai i te hoê piahi Bibilia o te faaî ra i te mau titauraa no te apiti i te taviniraa?
19 E nafea tatou e nehenehe ai e tauturu ia vetahi ê ia pee i te hiˈoraa o Iesu? A feruri na e te hinaaro ra tatou e faaitoito i te hoê piahi Bibilia ia faaî i te mau titauraa no te apiti i te pororaa. Aore ra te hinaaro ra paha tatou e tauturu i te hoê mero aita e poro faahou ra. E nafea tatou e nehenehe ai e tauturu atu? E haaferuri atu tatou no nia i te faufaaraa ia tauturu i te taata ia ite no nia i te Atua. A haamanaˈo, ua “aroha roa ˈtura” na mua Iesu i te taata, e ua haapii atura ia ratou. (Mareko 6:34) No reira, ia tauturu tatou i te hoê piahi Bibilia aore ra i te hoê mero aita e poro faahou ra ia faatupu i te aumihi, e turai to ratou aau ia faaite i te parau apî oaoa ia vetahi ê mai ia Iesu. E nehenehe tatou e ui ia ratou: “Mea nafea te fariiraa i te poroi o te Faatereraa arii i te haamaitairaa i to oe oraraa? E te feia ïa aitâ i ite atura i teie poroi, aita anei ratou e hinaaro atoa ra i te parau apî oaoa? Eaha ta oe e nehenehe e rave no te tauturu ia ratou?” Parau mau, te manaˈo turai puai roa ˈˈe e apiti ai i te taviniraa, o te here ïa i te Atua e te hinaaro e tavini ia ˈna.
20. (1) Eaha te auraa e riro ei pǐpǐ na Iesu? (2) Eaha te hiˈopoahia i te pene i muri nei?
20 Te riroraa ei pǐpǐ na Iesu, e ere noa ïa te faahiti-faahou-noa-raa i ta ˈna mau parau e te rave-faahou-raa i ta ˈna mau ohipa. E titauhia ia atuatu tatou i to ˈna “huru feruriraa.” (Philipi 2:5) No reira, e nehenehe tatou e mauruuru e te faaite mai ra te Bibilia i te mau manaˈo e huru aau e itehia ra i roto i ta Iesu mau parau e ohipa! Ma te ite atu â i “te manaˈo o te Mesia,” e ineine atu â tatou i te atuatu i te huru tâuˈa e te aumihi haavare ore e i te haa i nia ia vetahi ê mai ia Iesu i haa i nia i te rahiraa o te taata. (Korinetia 1, 2:16) I te pene i muri nei, e hiˈopoa mai tatou e rave rau ravea i faaite ai Iesu i te here i ta ˈna mau pǐpǐ iho â râ.
a Ua parauhia te taˈo Heleni tei hurihia ei “aroha ihora” ei hoê o te mau taˈo puai roa ˈˈe o te reo Heleni no te faataa i te huru aau aumihi. Ia au i te hoê buka, te faaite ra teie taˈo “eiaha noa i te aumihi i [te] iteraa i te mauiui, i te hoê hinaaro puai atoa râ e tamǎrû e e faaore i te mauiui.”
b E “mauiui e o” te auraa mau o te taˈo Heleni tei hurihia ei “aumauiui.”
