1, 2. Eaha ta te aposetolo Ioane i faaite no nia i te po hopea o te mau aposetolo e o Iesu?

 E TUU te hoê ruhiruhia i ta ˈna peni i roto i te inita, mea rahi hoi te mea ta ˈna e haamanaˈo ra. O Ioane to ˈna iˈoa, hoê o te mau aposetolo hopea e ora ra a Iesu Mesia. I teie nei, 100 matahiti to ˈna, ua papai oia no nia i te hoê po eita roa e moˈe ia ˈna. Te po hopea teie, e faaea ˈi o ˈna e te tahi atu mau aposetolo e o Iesu hou to ˈna poheraa. Arataihia e te varua moˈa o te Atua, e nehenehe ta Ioane e haamanaˈo e e papai i te mau mea i tupu i roto i te mau tuhaa rii atoa.

² I taua po ra, ua parau maitai Iesu e ua fatata oia i te haapohehia. O Ioane anaˈe te faaite no te aha Iesu i parau ai e e ite oia i taua pohe mauiui roa ra: “Ia ite to te ao e mea here na ˈu te Metua, te rave nei au i ta te Metua i faaue mai. A tia, mai, haere anaˈe.”—Ioane 14:31.

3. Mea nafea to Iesu faaiteraa e mea here na ˈna to ˈna Metua?

³ “Mea here na ˈu te Metua.” Aita ˈtu e mea faufaa aˈe no Iesu. Aita oia i faahiti tamau noa i tera parau. Inaha, i roto noa i te faatiaraa Bibilia, o te Ioane 14:31 te faaite mai ra i to Iesu faahiti-roa-raa i to ˈna here i to ˈna Metua. Teie râ, ua ora Iesu ia au i taua mau parau ra. Ua itehia to ˈna here ia Iehova i te mau mahana atoa. To Iesu itoito, auraro, e faaoromai tamau, e haapapuraa anaˈe ïa i to ˈna here i te Atua. Mea turaihia ta ˈna taviniraa taatoa e teie here.

4, 5. Te faaitoito ra te Bibilia i teihea huru here, e eaha te nehenehe e parau no nia i te here o Iesu ia Iehova?

⁴ I teie mahana, ia manaˈo te taata i te here, pinepine ratou i te faaau i te reira i te here i rotopu i te hoê tane e vahine, o te niuhia i nia i te huru aau. Ua faahiti-pinepine-hia teie huru here i roto i te pehepehe e himene. Te faataa ra iho â te Bibilia i te here o te hoê tane e te hoê vahine, ma  te tura ˈtu â râ i tei matauhia i teie tau. (Maseli 5:15-21) Teie râ, te faataa ˈtu â ra te Parau a te Atua i te tahi atu here. Aita teie here i niu-noa-hia i nia i te huru aau, o te puai e o te iti atoa mai. Aita atoa te reira i niu-noa-hia i nia i te mau manaˈo, o te faatia ture noa. E titauhia râ tera e piti, te aau e te feruriraa. No roto roa mai taua here ra i te aau, arataihia ia au i te mau faaueraa tumu teitei, e e faaitehia na roto i te mau ohipa maitatai. E vai noa taua here ra e a muri noa ˈtu. Mai ta te Bibilia e parau ra: “Eita roa te here e mure.”—Korinetia 1, 13:8.

⁵ I rotopu i te mau taata atoa i ora aˈenei, o Iesu tei here roa ˈˈe ia Iehova. Aita e taata i na nia ˈˈe ia Iesu i roto i te faatupuraa i ta ˈna iho i parau mai te faaueraa rahi roa ˈˈe o te mau faaueraa atoa a te Atua: “Ia here oe ia Iehova to oe Atua ma to oe aau atoa, ma to oe ora atoa, ma to oe manaˈo atoa e ma to oe puai atoa.” (Mareko 12:30) Mea nafea to Iesu faatupuraa i taua here ra? Mea nafea to ˈna here i te Atua i te puai-noa-raa a vai ai oia i te fenua nei? E e nafea tatou e nehenehe ai e pee ia ˈna?

6, 7. Mea nafea tatou i te iteraa e te faataa ra te Maseli 8:22-31 i te Tamaiti a te Atua, eiaha noa râ te paari?

⁶ Ua haa ê na anei oe e te hoê hoa i nia i te hoê ohipa, a riro atu ai orua ei hoa rahi? Na roto i teie tupuraa au maitai, e nehenehe oe e taa i te here i tupu i rotopu ia Iehova e ta ˈna Tamaiti otahi. Ua faahiti pinepine tatou i te Maseli 8:30, teie râ e hiˈopoa ˈtu â tatou i teie irava ia au i te mau irava tapiri. I te irava 22 e tae atu i te irava 31, ua faahohoˈahia te paari i te taata. Mea nafea tatou i te iteraa e no te Tamaiti a te Atua teie mau parau?

⁷ I te irava 22, te na ô ra te paari e: “Na Iehova i poiete ia ˈu, te haamataraa o ta ˈna ohipa poieteraa, te matamua o ta ˈna mau ohipa i rave mea maoro aˈenei.” E ere noa o te  paari te parauhia ra i ǒ nei, no te mea aita roa ˈtu teie huru maitai i ‘poietehia.’ Aita roa ˈtu to te paari e haamataraa no te mea i vai noa na Iehova e e mea paari noa oia. (Salamo 90:2) Teie râ, o te Tamaiti a te Atua “te matahiapo o te mau mea atoa i poietehia.” Ua hamanihia aore ra poietehia oia, o ˈna te matamua roa o te mau ohipa atoa ta Iehova i rave. (Kolosa 1:15) I vai na te Tamaiti hou te fenua e te mau raˈi, mai tei faataahia i roto i te Maseli. E ei Parau, te Auvaha iho a te Atua, o ˈna te faahohoˈaraa tia roa i te paari o Iehova.—Ioane 1:1.

8. Ua aha na te Tamaiti i te roaraa o to ˈna oraraa hou a riro ai ei taata, e e manaˈo tatou i te aha ia umere tatou i te mau mea poietehia?

⁸ Ua aha na ïa te Tamaiti i tera roaraa hou oia a haere mai ai i nia i te fenua? Te na ô mai ra te irava 30 e tei pihai iho oia i te Atua mai te “hoê rave ohipa aravihi.” Eaha ïa te auraa? Te faataa ra te Kolosa 1:16 e: “E mea na roto hoi ia ˈna i poietehia ˈi to te raˈi atoa e to te fenua atoa . . . Ua poietehia te mau mea atoa na roto ia ˈna e no ˈna.” No reira, ua faaohipa Iehova te Atua poiete i ta ˈna Tamaiti ei “rave ohipa aravihi,” no te hamani i te tahi atu mau mea atoa, mai te mau melahi, te fetia, te fenua e te raau tupu e te animara, e te pae hopea te taata. I roto i te tahi mau tuhaa, e nehenehe tatou e faaau i teie haa-amui-raa te Metua e te Tamaiti, i te ohipa-amui-raa te hoê taata papai hohoˈa fare e te hoê taata patu fare o te pee maitai roa ra i te mau hohoˈa a te taata papai hohoˈa fare. Ia umere tatou i te mau huru atoa o te mau mea i poietehia, te arue ra ïa tatou ia Iehova. (Salamo 19:1) Teie râ, e nehenehe tatou e haamanaˈo atoa i te haa-amui-raa oaoa e te roa i rotopu i te Atua poiete e ta ˈna “rave ohipa aravihi.”

9, 10. (1) Na te aha i haapuai i te auhoaraa i rotopu ia Iehova e ta ˈna Tamaiti? (2) Na te aha e nehenehe e haapuai i to oe auhoaraa e to oe Metua i te raˈi?

⁹ Ia haa amui roa e piti taata tia ore, eita raua e afaro i te tahi taime. E ere mai tera no Iehova e ta ˈna Tamaiti! Ahia  maororaa to te Tamaiti haaraa e to ˈna Metua e ua ‘oaoa na oia i mua ia ˈna i te mau taime atoa.’ (Maseli 8:30) Oia, mea oaoa roa oia i pihai iho i to ˈna Metua, e to ˈna atoa Metua. No reira, ua paari mai te Tamaiti ma te hohoˈa roa ˈtu â i to ˈna Metua, a haapii ai i te pee i te mau huru maitatai o te Atua. No reira te auhoaraa i rotopu i te Metua e te Tamaiti i puai roa ˈtu ai! E nehenehe mau â e parau e tera te taamuraa puai e te maoro roa ˈˈe o te here aita i itehia aˈenei.

¹⁰ Eaha râ te auraa o te reira no tatou? E manaˈo paha oe e eita roa ˈtu e tia ia oe ia haamau i te hoê auhoaraa mai tera e o Iehova. Parau mau, aita to te hoê o tatou e tiaraa teitei mai to te Tamaiti. Teie râ, e ravea faahiahia ta tatou. A haamanaˈo, ua piri atu â Iesu i to ˈna Metua ma te haa e o ˈna. Ma te here, te pûpû mai ra Iehova i te ravea e riro ei “hoa ohipa” no ˈna. (Korinetia 1, 3:9) A pee ai tatou i te hiˈoraa o Iesu i roto i te taviniraa, mea maitai ia haamanaˈo noa tatou e e hoa ohipa tatou no te Atua. No reira, e puai noa ˈtu â te here e tahoê ra ia tatou e o Iehova. Te vai ra anei te hoê fanaˈoraa taa ê faahiahia ˈtu â?

11-13. (1) Eaha te faaauraa e tauturu ia tatou ia taa e titauhia ia haapuai i to tatou here, e mea nafea te here o te taurearea ra o Iesu ia Iehova i te puai-noa-raa? (2) Mea nafea to te Tamaiti a te Atua faaiteraa i to ˈna anaanatae i te haapii no nia ia Iehova, hou a haere mai ai i te fenua e i muri aˈe atoa ei taata?

¹¹ No te tauturu ia tatou ia taa e nafea ia haapuai i to tatou here ia Iehova, a feruri i teie faaauraa. Mai te hoê tiare nehenehe ta tatou e atuatu ia ruperupe maitai te reira, e na reira atoa tatou ia rahi atoa to tatou here no Iehova. Ia ore ia atuatuhia, e iti mai te reira a pohe atu ai. Aita Iesu i haafaufaa ore i to ˈna here ia Iehova. Ua vai puai e ua ruperupe noa te reira i te roaraa o to ˈna parahiraa i te fenua. E hiˈo anaˈe e nafea.

 ¹² A manaˈo faahou i te ohipa i tupu i to te taurearea ra o Iesu paraparauraa i te hiero i Ierusalema. A haamanaˈo i ta ˈna i parau i to ˈna na metua o te haapeapea ra: “Eaha orua i imi ai ia ˈu? Aita orua i ite e ei roto vau i te fare o to ˈu Metua?” (Luka 2:49) Ei tamaroa apî, aitâ Iesu i haamanaˈo atura i to ˈna oraraa hou a riro ai ei taata. Mea puai roa râ to ˈna here i to ˈna Metua ra o Iehova. Ua ite oia e e itehia iho â taua here ra i roto i te haamoriraa. No reira, aita ˈtu ïa e vahi auhia e Iesu maori râ te fare o te haamoriraa viivii ore o to ˈna Metua. Mea au roa na ˈna e haere i reira e eita o ˈna e au e faarue i taua vahi ra. Hau atu â, e ere oia i te taata mataitai noa. Ua hinaaro ru oia e haapii no nia ia Iehova e e faaite i ta ˈna i ite. Aita taua mau huru aau ra i haamata i te 12raa o to ˈna matahiti, aita atoa i ore i reira.

¹³ A ora ˈi oia i nia i te raˈi hou a riro ai ei taata, i haapii na te Tamaiti ma te aau tae mai to ˈna Metua mai. Ia au i te hoê parau tohu i papaihia i roto i te Isaia 50:4-6, ua horoa Iehova na ta ˈna Tamaiti i te hoê haapiiraa taa maitai no nia i ta ˈna ohipa ei Mesia. Noa ˈtu e ua haapii atoa Tei faatavaihia e Iehova eaha te tahi mau ati ta ˈna e farerei, ua haapii mai te Tamaiti ma te aau tae. I muri aˈe i to Iesu haereraa mai i nia i te fenua e riroraa ei taata paari, ua tae noa to ˈna aau i te haere i te fare o to ˈna Metua e i te apiti i te haamoriraa e i te haapiiraa ta Iehova i hinaaro ia horoahia i reira. Te faatia ra hoi te Bibilia i te haere-tamau-raa Iesu i te hiero e te sunago. (Luka 4:16; 19:47) Ia hinaaro tatou ia puai noa to tatou here ia Iehova, mea maitai ia haere tamau tatou i te mau putuputuraa Kerisetiano, i reira tatou e haamori ai ia Iehova e e faahohonu ai i to tatou ite e to tatou mauruuru ia ˈna.

14, 15. (1) No te aha Iesu i imi ai i te vahi moˈemoˈe? (2) Mea nafea ta Iesu mau pure i te faaiteraa e mea piri roa e e mea faatura oia i to ˈna Metua?

¹⁴ Ua puai noa atoa to Iesu here ia Iehova maoti te pure  tamau. Noa ˈtu e mea au na ˈna i te taata, e tano ia tapao e mea au atoa na ˈna e faafaaea o ˈna anaˈe. Ei hiˈoraa, te na ô ra te Luka 5:16: “Pinepine . . . oia i te haere i te mau vahi aita e taata, no te pure.” Te na ô atoa ra te Mataio 14:23: “E oti aˈera te nahoa i te tuuhia, haere atura Iesu i nia i te mouˈa e pure o ˈna anaˈe. I te poraa, to reira noa â oia.” Ua imi Iesu i te vahi moˈemoˈe i taua mau taime ra e i te tahi atu, eiaha no te mea ua hinaaro oia e faataa ê ia ˈna aore ra eita o ˈna e au i te taata, no te mea râ ua hinaaro oia o raua Iehova anaˈe, no te paraparau e to ˈna Metua i roto i te pure.

¹⁵ Ia pure oia, e faaohipa Iesu i te tahi taime i te parau “Aba, to ˈu Metua.” (Mareko 14:36) I to Iesu tau, e taˈo mahanahana “Aba” no “metua tane,” o te faaohipahia i roto i te utuafare. E pinepine, tera hoê o te mau taˈo matamua ta te hoê tamarii e haapii. E taˈo faatura râ. I to Iesu faahitiraa i teie parau, ua faaite oia e mea piri roa oia i to ˈna Metua here ra, ma te faatura hohonu atoa râ ia ˈna. I roto i te Bibilia, te faaite ra te mau pure atoa a Iesu ia Iehova, e mea piri roa e e mea faatura oia i to ˈna Metua. Ei hiˈoraa, i roto i te Ioane pene 17, ua papai te aposetolo Ioane i te pure roa e te haavare ore ta Iesu i faaoti i to ˈna po hopea. E putapû mau â tatou ia haapii tatou i taua pure ra e mea faufaa roa ia pee tatou i te reira, eiaha iho â ïa ma te faahiti noa i ta Iesu mau parau, ma te imi râ i te mau ravea e paraparau pinepine ai ma to tatou aau i to tatou Metua i te raˈi. E vai oraora e e puai noa ïa to tatou here ia ˈna.

16, 17. (1) Mea nafea to Iesu parau-roa-raa i to ˈna here i to ˈna Metua? (2) Mea nafea to Iesu faataaraa i te aau horoa o to ˈna Metua?

¹⁶ Mai ta tatou i tapao na mua ˈtu, aita Iesu i faahiti noa i te mau parau “Mea here na ˈu te Metua.” Teie râ, mea rahi te taime to ˈna parau-roa-raa i to ˈna here i to ˈna Metua. E nafea? Ua parau Iesu iho e: “To ˈu Metua e te Fatu o te raˈi e te  fenua, te arue nei au ia oe i mua i te taata.” (Mataio 11:25) A haapii ai tatou i te tuhaa 2 o teie buka, ua ite tatou e mea au roa na Iesu e arue i to ˈna Metua ma te tauturu i te taata ia ite o vai o ˈna. Ei hiˈoraa, ua faaau oia ia Iehova i te hoê metua tane o te hinaaro ru ra e faaore i te hapa a ta ˈna tamaiti orure hau, ua tiai hoi oia i te taeraa mai o te taata apî tatarahapa, ua ite atu ia ˈna i te atea ê â, e ua horo atura e tauahi ia ˈna. (Luka 15:20) O vai te nehenehe e taio i taua irava ra ma te ore e putapû i ta Iesu faataaraa i te here o Iehova e ta ˈna faaoreraa i te hapa?

¹⁷ Ua arue pinepine Iesu i to ˈna Metua no to ˈna aau horoa. Ua rave oia i te hiˈoraa o te mau metua no te faaite e e nehenehe tatou e tiaturi e e horoa mai to tatou Metua i te varua moˈa atoa ta tatou e hinaaro. (Luka 11:13) Ua faahiti atoa Iesu i te tiaturiraa ta te Metua e pûpû noa ra. Ua faataa maite Iesu i to ˈna iho tiaturiraa e parahi faahou i pihai iho i to ˈna Metua i nia i te raˈi. (Ioane 14:28; 17:5) Ua faaite oia i ta ˈna mau pǐpǐ i te tiaturiraa ta Iehova i faataa no te “nǎnǎ iti” a te Mesia, oia hoi e ora i nia i te raˈi e e faatere atoa e te Arii Mesia. (Luka 12:32; Ioane 14:2) E ua tamahanahana oia i te hoê taata rave hara, o te fatata i te pohe, maoti te tiaturiraa e ora i roto i te Paradaiso. (Luka 23:43) Papu maitai e ma te faahiti i te aau horoa rahi o to ˈna Metua na roto i teie mau ravea, ua puai noa to Iesu here ia Iehova. Mea rahi te pǐpǐ a te Mesia tei ite e te tauturu rahi roa ˈˈe no te haapuai i to ratou here aore ra to ratou faaroo ia Iehova, o te paraparauraa ïa no nia ia ˈna e te tiaturiraa ta ˈna e horoa ra na te feia e here ra ia ˈna.

18. Eaha te ravea faufaa roa ˈˈe e mea tia ˈi ia pee tatou ia Iesu, e no te aha?

¹⁸ Na roto i te mau ravea atoa e mea tia ˈi ia pee tatou ia Iesu, aita ˈtu i hau aˈe i te faufaa maori râ teie: Ia here tatou  ia Iehova ma to tatou aau atoa, ma to tatou ora atoa, ma to tatou puai atoa e ma to tatou manaˈo atoa. (Luka 10:27) E faaite tatou i teie here eiaha noa ma to tatou huru aau, ma te haa atoa râ. Aita noa Iesu i faatupu i te here i to ˈna Metua i roto i to ˈna aau, aita atoa i parau noa: “Mea here na ˈu te Metua.” Ua na ô oia e: “Ia ite to te ao e mea here na ˈu te Metua, te rave nei au i ta te Metua i faaue mai.” (Ioane 14:31) I pari na Satani e aita e taata e tavini ia Iehova ma te here miimii ore. (Ioba 2:4, 5) No te horoa i te pahonoraa maitai roa ˈˈe i te pariraa haavare a Satani, ua haa Iesu ma te itoito e ua faaite i to te ao e mea here roa na ˈna to ˈna Metua. Ua auraro oia e tae noa ˈtu i te horoaraa i to ˈna ora. E pee anei oe ia Iesu? E faaite anei oe i to te ao e mea here iho â na oe te Atua ra o Iehova?

19, 20. (1) No teihea mau tumu faufaa e hinaaro ai tatou e haere tamau i te mau putuputuraa Kerisetiano? (2) E nafea ia hiˈo i ta tatou iho haapiiraa, feruriruriraa, e pure?

¹⁹ Ua hamanihia tatou e te hinaaro e faafatata ˈtu e te Atua no te faaite i to tatou here ia ˈna. Ua faanaho Iehova e ia haamori tatou ma te hoê ravea e puai ai to tatou here i to tatou Metua. Ia haere oe i te mau putuputuraa Kerisetiano, a tamata i te haamanaˈo e tei reira oe no te haamori i to oe Atua. I roto i taua haamoriraa ra, te vai ra te amuiraa ˈtu i te pure haavare ore, te himeneraa i te mau arueraa, te faaroo-maitai-raa, e te apitiraa ˈtu ia nehenehe. Maoti atoa taua mau putuputuraa ra, e nehenehe oe e faaitoito i te mau hoa Kerisetiano. (Hebera 10:24, 25) Na roto i te haamori-tamau-raa ia Iehova i te mau putuputuraa Kerisetiano, e puai atu â to oe here i te Atua.

²⁰ E nehenehe atoa e faahiti i ta oe iho haapiiraa, te feruriruriraa, e te pure. A manaˈo i te reira mai te mau taime o orua anaˈe Iehova. A haapii ai oe i te Parau a te Atua e a feruriruri ai oe i te reira, te horoa ˈtu ra Iehova i to ˈna mau manaˈo. A pure ai oe, te haamahora ra oe i to oe aau ia ˈna.  A haamanaˈo e e ere noa te pure i te aniraa i te tahi mea i te Atua. E taime atoa râ no te haamauruuru ia Iehova no te mau haamaitairaa ta oe i fanaˈo e no te arue ia ˈna no ta ˈna mau ohipa faahiahia. (Salamo 146:1) Hau atu â, te pororaa no nia ia Iehova ma te oaoa e te aau tae, o te ravea maitai roa ˈˈe ïa no te haamauruuru ia Iehova e no te faaite e mea here na oe ia ˈna.

21. Eaha te faufaaraa o te here ia Iehova, e eaha te hiˈopoahia i te mau pene i muri nei?

²¹ Tei to oe here i te Atua e oaoa ˈi oe e a muri noa ˈtu. Tera tei hinaarohia e Adamu raua Eva no te manuïa, e tera ta raua i ore i faatupu. Tera te mea faufaa roa ˈˈe ta oe e hinaaro no te upootia i roto i te mau tamataraa atoa i to oe faaroo, no te patoi i te mau faahemaraa atoa, no te faaoromai tamau i te mau tamataraa atoa. O te mea faufaa roa ˈˈe ïa no te riro ei pǐpǐ na Iesu. Parau mau, ua tuati te here i te Atua, i te here i to tatou taata tupu. (Ioane 1, 4:20) I te mau pene i muri nei, e hiˈopoa tatou mea nafea to Iesu faaiteraa i to ˈna here i te taata. I te pene i muri nei, e hiˈopoa tatou no te aha e rave rahi roa taata i ite ai e mea ohie ia tapiri atu ia Iesu.