E te taata taio here e:

‘A haere mai e a pee mai ia ˈu.’ (Mareko 10:21) Na roto i teie mau parau, te titau manihini ra hoi Iesu Mesia ia tatou ia pee ia ˈna. Te pahono ra anei oe i ta ˈna piiraa? Ia na reira oe, e ohipa roa i roto i to oe oraraa. No te aha?

Ua tono mai Iehova i ta ˈna Tamaiti otahi i nia i te fenua no te horoa i to ˈna ora ei hoo. (Ioane 3:16) Hau atu i te pohe no tatou, ua faaite mai taua Tamaiti ra e nafea ia ora. I roto i te mau mea atoa ta ˈna i rave, ua tapea oia i to ˈna taiva ore e ua faaoaoa i te aau o to ˈna Metua. Ua faaite atoa mai Iesu e nafea ia pee i to ˈna Metua. Te ite-maitai-roa-hia ra te mau eˈa e te hinaaro o te Metua i roto i te mau parau e te mau ohipa a te Tamaiti.—Ioane 14:9.

E “hiˈoraa” Iesu, te parau ra te Bibilia, “ia pee maite [tatou] i to ˈna mau taahiraa avae.” (Petero 1, 2:21) Ia hinaaro tatou e faafatata ˈtu â ia Iehova, e fanaˈo i te hoê oraraa faufaa mau i teie nei, e e faaea noa i nia i te eˈa e tae atu ai i te ora mure ore, e titauhia ïa ia pee maite tatou i te mau taahiraa avae o te Mesia.

No te haamata i teie tere, mea faufaa roa ia ite tatou i te oraraa o Iesu i nia i te fenua. No reira e tano ai ia haapii maite tatou i te faataaraa no nia ia Iesu tei faahereherehia i roto i te Bibilia. Na roto i te feruriruriraa i te mau mea ta Iesu i parau e i rave e te hiˈopoaraa e nafea tatou e pee ai i to ˈna hiˈoraa i roto i te parau e te ohipa, e taa ˈtu â ïa ia tatou e nafea ia pee ia ˈna.

Ia tauturu ïa teie buka ia oe ia rahi to oe here ia Iesu e ia Iehova. E ia turai taua here ra ia oe ia pee maite i te mau taahiraa avae o Iesu, a faaoaoa ˈtu ai oe i te aau o Iehova i teie nei e a muri noa ˈtu.