1-3. (1) Eaha ta te hoê taata faaapu e rave ia rahi roa te maa eita e oti ia ˈna anaˈe ia haaputu? (2) Eaha te fifi ta Iesu e farerei i te tau uaaraa tiare i 33 e e nafea oia e faaafaro ai i te reira?

 E FIFI iti rahi to te hoê taata faaapu. Tau avaˈe na mua ˈtu, ua arote oia i ta ˈna mau faaapu e ua ueue i te mau huero. Ua hiˈohiˈo maitai oia i te mau rauere matamua e tupu mai, e ua oaoa oia a paari ai te maa. I teie nei, ua haamaitaihia ta ˈna ohipa puai atoa, ua tae hoi te taime o te ootiraa. To ˈna râ fifi: Ua rahi roa te maa eita e oti ia ˈna anaˈe ia haaputu. No te faaafaro i teie fifi, e faaoti oia e tihepu i te tahi mau rave ohipa e e tono atu i roto i ta ˈna mau faaapu. Inaha, ua taotiahia te taime no te haaputu i ta ˈna maa faufaa roa.

² I te tau uaaraa tiare i 33, e farerei Iesu tei faatiahia mai i  te hoê â fifi. I roto i ta ˈna taviniraa i te fenua nei, e ueue oia i te mau huero o te parau mau. I teie nei, te auhune ra e te pue ra te maa. Mea rahi roa te taata aau farii te titauhia ia haaputu ei pǐpǐ. (Ioane 4:35-38) E nafea Iesu e faaafaro ai i teie fifi? I nia i te hoê mouˈa i Galilea, na mua rii aˈe i to ˈna haereraa i nia i te raˈi, e horoa oia i te hoê ohipa na ta ˈna mau pǐpǐ e imi atu â i te rave ohipa, ma te parau e: “A haere ïa e faariro i te taata o te mau nunaa atoa ei pǐpǐ ma te bapetizo ia ratou . . . ma te haapii ia ratou ia haapao i te mau mea atoa ta ˈu i faaue ia outou.”—Mataio 28:19, 20.

³ Taua ohipa ra, o te manaˈo tumu ïa o te auraa e riro ei pǐpǐ mau na te Mesia. E hiˈopoa anaˈe e toru uiraa. No te aha Iesu i horoa ˈi i te ohipa e imi atu â i te rave ohipa? Mea nafea to ˈna faaineineraa i ta ˈna mau pǐpǐ ia ite ia ratou? E nafea tatou e faaohipa ˈi i te faaueraa a Iesu i teie mahana?

4, 5. No te aha i ore ai i oti ia Iesu te ohipa ta ˈna i haamata na, e na vai e tamau i te rave i te reira i muri aˈe i to ˈna hoˈiraa i nia i te raˈi?

⁴ I to Iesu haamataraa i ta ˈna taviniraa i 29, ua ite oia e te haamata ra oia i te hoê ohipa eita e oti ia ˈna anaˈe. I roto i te area taime e toe ra ia ˈna i te fenua nei, ua taotiahia te tuhaa fenua ta ˈna e nehenehe e poro e mea iti te taata ta ˈna e nehenehe e faaite i te poroi o te Faatereraa arii. Inaha, ua poro noa oia i te mau ati Iuda e te feia tei farii i te haapaoraa ati Iuda, “te mau mamoe . . . tei moˈe o te utuafare o Iseraela.” (Mataio 15:24) Ua purara ê râ taua “mau mamoe . . . tei moˈe” ra e ati aˈe te fenua o Iseraela, tau tausani kilometera tuea te rahi. Hau atu â, e porohia te parau apî oaoa e ati aˈe te fenua nei.—Mataio 13:38; 24:14.

⁵ Ua ite Iesu e mea rahi â te ohipa e rave i muri aˈe i to ˈna poheraa. Teie ta ˈna i parau i ta ˈna na 11 aposetolo haapao maitai: “E parau mau ta ˈu e parau atu: O te faatupu i te faaroo ia ˈu, e rave atoa ïa oia i te mau ohipa ta ˈu e rave nei. E  ohipa rahi aˈe i teie ta ˈna e rave, no te mea te haere nei au i te Metua ra.” (Ioane 14:12) I te mea e te hoˈi ra te Tamaiti i nia i te raˈi, e titauhia ia tamau ta ˈna mau pǐpǐ, te mau aposetolo e te mau pǐpǐ atoa no a muri aˈe, i te ohipa pororaa e haapiiraa. (Ioane 17:20) Ua farii haehaa Iesu e “e rahi aˈe” ta ratou ohipa i ta ˈna iho. E nafea? I roto ïa e toru tuhaa.

6, 7. (1) E nafea te mau ohipa e ravehia e ta Iesu mau pǐpǐ e rahi aˈe ai i ta ˈna iho? (2) E nafea tatou e faaite ai e aita to Iesu tiaturi i ta ˈna mau pǐpǐ i hape?

⁶ A tahi, e tuhaa fenua rahi atu â ta te mau pǐpǐ a Iesu. I teie mahana, te poro nei ratou na te mau tuhaa atoa o te fenua e ua rahi aˈe te reira i ta Iesu i poro na. A piti, mea rahi atu â te taata ta ratou e poro. Ua maraa oioi te pǔpǔ iti o te mau pǐpǐ a Iesu tei vaiihohia ˈtu, ei tausani. (Ohipa 2:41; 4:4) I teie nei, e mirioni ratou, e hanere tausani mero apî te bapetizohia nei i te mau matahiti atoa. A toru, e poro ratou no te hoê tau maoro atu â, e tae roa mai i teie tau, fatata e 2 000 matahiti i muri aˈe i te hoperaa ta Iesu taviniraa e toru matahiti e te afa.

⁷ Te faaite ra Iesu i te tiaturi i ta ˈna mau pǐpǐ i to ˈna parauraa e “e ohipa rahi aˈe i teie [ta ratou] e rave.” Te tuu ra oia i roto i to ratou rima i te hoê ohipa hope i te faufaa no ˈna, oia te pororaa e te haapiiraa i “te parau apî oaoa o te Faatereraa arii a te Atua.” (Luka 4:43) Ua papu ia ˈna e e rave maite ratou i taua ohipa ra. Eaha ïa te auraa no tatou i teie mahana? Ia rave tatou i te taviniraa ma te itoito rahi e te aau atoa, te faaite ra ïa tatou e aita to Iesu tiaturi i ta ˈna mau pǐpǐ i hape. E ere anei teie i te hoê haamaitairaa faahiahia?—Luka 13:24.

8, 9. Eaha te hiˈoraa ta Iesu i horoa i roto i te taviniraa, e e nafea tatou e nehenehe ai e pee ia ˈna i roto i ta tatou taviniraa?

⁸ Ua horoa Iesu na ta ˈna mau pǐpǐ i te faaineineraa maitai  roa ˈˈe no te taviniraa. Na mua roa, ua horoa ˈtu oia i te hoê hiˈoraa tia roa. (Luka 6:40) I te pene na mua ˈtu, ua hiˈopoa tatou i to ˈna huru i mua i te taviniraa. A hiˈo na maa taime i te mau pǐpǐ e apee ra ia Iesu i roto i to ˈna mau tere pororaa. Ua tapao ratou e e poro Iesu i te mau vahi atoa to reira te taata, i te hiti roto e i nia i te mouˈa, i te oire e te mahora, e i te fare o te taata. (Mataio 5:1, 2; Luka 5:1-3; 8:1; 19:5, 6) Ua ite ratou e e rave ohipa puai oia, e tia oioi oia i nia e e haa e po noa ˈtu. E ere te taviniraa i te tahi faaanaanataeraa ta ˈna e rave i te tahi taime! (Luka 21:37, 38; Ioane 5:17) Ua taa maitai ia ratou e te turaihia ra oia e te here hohonu i te taata. Peneiaˈe ua ite ratou i nia i to ˈna hohoˈa mata i te huru aumihi o to ˈna aau. (Mareko 6:34) I to oe manaˈo, eaha te faahopearaa o te hiˈoraa o Iesu i nia i ta ˈna mau pǐpǐ? E i nia ia oe?

⁹ Ei pǐpǐ a te Mesia, e pee tatou i to ˈna hiˈoraa i roto i ta tatou taviniraa. No reira, e faaohipa tatou i te mau taime maitatai atoa no te “faaite papu.” (Ohipa 10:42) Mai ia Iesu, e haere tatou e farerei i te taata i to ratou fare. (Ohipa 5:42) E faatano tatou i ta tatou tapura ohipa, ia titauhia, ia nehenehe tatou e haere atu i te hoê taime mea papu e tei te fare te taata. E imi e e poro maite atoa tatou i te taata i te mau vahi taata, i roto i te aroâ, te vahi faafaaearaa, te fare toa, e i te vahi raveraa ohipa. E “rohi e e tautoo” noa tatou i roto i te taviniraa, no te mea te haafaufaa ra tatou i teie ohipa. (Timoteo 1, 4:10) Na te here hohonu e te haavare ore ia vetahi ê e turai ra ia tatou ia imi noa i te mau taime maitatai no te poro i te mau vahi e i te mau taime atoa e ite ai tatou i te taata.—Tesalonia 1, 2:8.

10-12. Eaha te mau haapiiraa faufaa ta Iesu i horoa na ta ˈna mau pǐpǐ hou oia a tono ai ia ratou e poro?

¹⁰ Te tahi atu ravea i faaineine ai Iesu i ta ˈna mau pǐpǐ, o te horoaraa ˈtu ïa i te mau faaueraa taa maitai. Hou oia a tono ai i na aposetolo 12 na mua e na pǐpǐ e 70 i muri aˈe  e poro, ua faatere Iesu i te mau tuhaa faaineineraa. (Mataio 10:1-15; Luka 10:1-12) E haamaitairaa tei noaa mai, te na ô ra hoi te Luka 10:17 e: “Hoˈi maira na 70 ma te oaoa.” E hiˈopoa anaˈe e piti o te mau haapiiraa faufaa ta Iesu i horoa, noa ˈtu mea taa ê te tupuraa o ta ˈna mau pǐpǐ i to tatou, e huti iho â tatou i te mau haapiiraa faufaa.

¹¹ Ua haapii Iesu i ta ˈna mau pǐpǐ ia tiaturi ia Iehova. Ua na ô oia ia ratou e: “Eiaha ei auro, ario aore ra veo i roto i to outou hatua, eiaha ei pute maa no te tere, eiaha ei piti ahu, tiaa, turutootoo, e fanaˈo hoi te rave ohipa i ta ˈna maa.” (Mataio 10:9, 10) Ua matau te mau ratere i te rave i te hoê hatua no te moni, te hoê pute no te maa, e te tiaa hau. a Ma te faaue i ta ˈna mau pǐpǐ eiaha e haapeapea no taua mau mea ra, te na ô ra ïa Iesu e: “A tiaturi roa ia Iehova, na ˈna hoi e haapao i to outou mau hinaaro.” E haapao Iehova ia ratou ma te turai i te feia i farii i te parau apî oaoa ia hamani maitai ia ratou, e peu tumu hoi te reira i Iseraela.—Luka 22:35.

¹² Ua haapii atoa Iesu i ta ˈna mau pǐpǐ ia ape i te mau haapeapearaa faufaa ore. Ua parau oia e: “Eiaha . . . e faataere i te aroha haere i te taata ta outou e farerei i te pae purumu.” (Luka 10:4) Te parau ra anei Iesu ia ratou eiaha e faahoa ˈtu e e paraparau atu ia vetahi ê? Aita roa ˈtu. I te tau a ora ˈi Iesu, ia aroha te taata te tahi i te tahi, aita ratou e  parau noa iaorana a haere atu ai. E aroha râ ratou ma te rave i te taime no te aparau. Te na ô ra te hoê aivanaa Bibilia e: “Ia aroha te taata te tahi i te tahi i taua tuhaa fenua ra, aita noa ratou e piˈo aore ra e horoa i te rima. E tauahi râ ratou te tahi i te tahi e tipapa atoa i raro. E na reirahia i te rahiraa o te taime.” Ma te parau i ta ˈna mau pǐpǐ eiaha e rave i te mau peu aroharaa matauhia, te na ô ra ïa Iesu i roto i te hoê auraa e: “Ia faaohipa maitai aˈe outou i to outou taime e tia ˈi, no te mea e poroi ru ta outou e faaite.” b

13. E nafea tatou e nehenehe ai e faaite e te anaanatae roa nei tatou i te mau faaueraa ta Iesu i horoa na ta ˈna mau pǐpǐ i te senekele matamua?

¹³ Te anaanatae roa nei tatou i te mau faaueraa ta Iesu i horoa na ta ˈna mau pǐpǐ i te senekele matamua. Ia rave tatou i ta tatou taviniraa, e tiaturi roa tatou ia Iehova. (Maseli 3:5, 6) Ua ite tatou e e ore roa ˈtu tatou e ere i te mau mea faufaa roa o te oraraa mai te peu e e “tamau [tatou] i te imi na mua i te Faatereraa arii a te Atua.” (Mataio 6:33) E nehenehe te feia poro taime taatoa i te Faatereraa arii i te ao nei e haapapu e aita roa ˈtu te rima o Iehova i poto i te mau taime fifi atoa. (Salamo 37:25) Ua ite atoa tatou e mea faufaa roa ia ape i te mau haapeapearaa faufaa ore. Ia ore tatou e vai ara, e nehenehe teie faanahoraa o te ao e faahahi ê ohie ia tatou. (Luka 21:34-36) E ere hoi teie te taime no te reira. E poroi ru ta tatou, te fifi nei hoi te ora o te taata. (Roma 10:13-15) Ia haamanaˈo to tatou aau e e tau ru teie, eita ïa tatou e vaiiho i te mau haapeapearaa a teie nei ao ia haapau i te taime e te itoito o te faaohipa-maitai-aˈe-hia i roto  i te taviniraa. A haamanaˈo, te poto ra te taime e toe nei e te rahi nei te auhune.—Mataio 9:37, 38.

14. Eaha te faaite ra e na te taatoaraa o te mau pǐpǐ a te Mesia te ohipa faauehia i roto i te Mataio 28:18-20? (A hiˈo atoa i te nota.)

¹⁴ Ia au i te mau parau ‘A haere e a faariro i te taata ei pǐpǐ,’ te tuu ra Iesu tei faatiahia mai i te hoê hopoia rahi i nia i ta ˈna mau pǐpǐ. Aita noa oia e manaˈo ra i te mau pǐpǐ i taua mahana ra i nia i te mouˈa i Galilea. c Te ohipa ta ˈna i faaue e rave, o te farereiraa ïa i “te taata o te mau nunaa atoa,” e e tamau te reira “tae noa ˈtu i te anotau hopea o te ao nei.” Mea maramarama teie ohipa faauehia, na te taatoaraa ïa o te mau pǐpǐ a te Mesia, o tatou atoa i teie mahana. E hiˈopoa ˈtu â anaˈe i te mau parau a Iesu i roto i te Mataio 28:18-20.

15. No te aha e haerea paari ai ia auraro i ta Iesu faaueraa e faariro i te taata ei pǐpǐ?

¹⁵ Hou oia a horoa ˈi i te ohipa faauehia, e na ô Iesu e: “Ua horoahia mai ia ˈu te mana atoa i te raˈi e i te fenua.” (Irava 18) Tei ia Iesu iho â anei taua mana rahi roa ra? Oia mau! O ˈna te melahi rahi, o te faatere ra e ahuru tausani i te ahuru tausaniraa melahi. (Tesalonia 1, 4:16; Apokalupo 12:7) Ei ‘upoo o te amuiraa,’ e mana to ˈna i nia i ta ˈna mau pǐpǐ i nia i te fenua. (Ephesia 5:23) Mai 1914 mai â, te faatere ra oia ei Arii Mesia i nia i te raˈi. (Apokalupo 11:15) E mana atoa to ˈna e faatia mai i te feia pohe. (Ioane 5:26-28) Ma te faahiti na mua i to ˈna mana rahi, te faaite ra ïa Iesu e e ere to muri iho mau parau i te tahi noa manaˈo, e faaueraa râ. E haerea paari ïa ia auraro atu tatou, no te mea  e ere no ˈna iho to ˈna mana, no ǒ mai râ i te Atua ra.—Korinetia 1, 15:27.

16. Ma te parau mai “a haere,” eaha ïa ta Iesu e faaue ra ia tatou e rave, e e nafea tatou e rave ai i teie tuhaa o te ohipa faauehia?

¹⁶ I teie nei, e tatara poto Iesu i te faaueraa, o te haamata ma teie noa parau: “A haere.” (Irava 19) Te faaue mai ra ïa oia e haere e faaite i te poroi o te Faatereraa arii ia vetahi ê. No te rave i teie tuhaa o te ohipa faauehia, ua rau te ravea. O te pororaa i tera e tera fare te ravea maitai roa ˈˈe no te farerei roa ˈtu i te taata. (Ohipa 20:20) E nehenehe atoa tatou e poro ma te faanaho ore, e hinaaro ru tatou e haamata i te aparauraa no nia i te parau apî oaoa i te mau taime tano atoa i te roaraa o to tatou oraraa i te mau mahana atoa. E nehenehe ta tatou mau ravea pororaa taa maitai e taui, e faatanohia i nia i te mau hinaaro e te mau tupuraa o te fenua. Te mea râ o te ore e taui: ‘E haere’ tatou e imi i te feia e farii ia tatou.—Mataio 10:11.

17. E nafea tatou ‘e faariro ai i te taata ei pǐpǐ’?

¹⁷ I muri iho, e faataa Iesu i te fa o te ohipa faauehia, oia hoi “e faariro i te taata o te mau nunaa atoa ei pǐpǐ.” (Irava 19) E nafea tatou ‘e faariro ai i te taata ei pǐpǐ’? Te auraa mau, e piahi te hoê pǐpǐ o te haapiihia ra. Te faariroraa râ i te taata ei pǐpǐ, e ere noa ïa i te horoaraa ˈtu i te ite. Ia haapii tatou i te Bibilia e te feia e anaanatae ra, ta tatou fa o te tautururaa ia ratou ia riro ei pǐpǐ na te Mesia. I te mau taime atoa e nehenehe, e huti tatou i te ara-maite-raa i nia i te hiˈoraa o Iesu ia haapii ta tatou mau piahi i te hiˈo ia ˈna ei orometua haapii e ei hiˈoraa no ratou, ma te pee i to ˈna huru oraraa e ma te rave i te ohipa ta ˈna i rave.—Ioane 13:15.

18. No te aha o te bapetizoraa te taahiraa faufaa roa ˈˈe o te oraraa o te hoê pǐpǐ?

¹⁸ Te faahitihia ra te hoê tuhaa faufaa roa o te ohipa faauehia i roto i teie mau parau: “Ma te bapetizo ia ratou i  te iˈoa o te Metua e o te Tamaiti e o te varua moˈa.” (Irava 19) Te bapetizoraa, o te taahiraa faufaa roa ˈˈe ïa i roto i te oraraa o te hoê pǐpǐ, e faaite te reira e ua pûpû oia ia ˈna i te Atua. Mea faufaa roa ïa te reira no te ora. (Petero 1, 3:21) Oia, ma te tamau i te rohi i te tavini ia Iehova, e nehenehe te pǐpǐ bapetizohia e tiai ru i te mau haamaitairaa i roto i te ao apî i mua nei. Ua tauturu anei oe i te hoê taata ia riro ei pǐpǐ bapetizohia na te Mesia? I roto i te taviniraa Kerisetiano, aita ˈtu e tumu rahi atu â no te oaoa.—Ioane 3, 4.

19. Eaha ta tatou e haapii i te mau mero apî, e no te aha te haapiiraa e nehenehe ai e tamau i muri aˈe i to ratou bapetizoraa?

¹⁹ E faataa Iesu i te tuhaa i muri iho o te ohipa faauehia, ma te parau e: “Ma te haapii ia ratou ia haapao i te mau mea atoa ta ˈu i faaue ia outou.” (Irava 20) E haapii tatou i te mau mero apî ia pee i te mau faaueraa a Iesu, tae noa ˈtu te mau faaueraa e here i te Atua, e here i te taata tupu, e e faariro i te taata ei pǐpǐ. (Mataio 22:37-39) E haapii riirii tatou ia ratou ia faataa i te pue parau mau Bibilia e ia paruru i to ratou faaroo o te rahi noa ˈtu ra. Ia faaî ratou i te mau titauraa no te apiti i te pororaa, e haa tatou e o ratou ma te haapii atu na roto i te parau e te hiˈoraa e nafea ia rave maitai i taua ohipa ra. Eita te haapiiraa i te mau pǐpǐ apî e faaea  hou to ratou bapetizoraa. E hinaaro â tei bapetizo-apî-hia i te haapiiraa hau ia nehenehe ratou e faaruru i te mau fifi i tuatihia i te peeraa i te Mesia.—Luka 9:23, 24.

20, 21. (1) No te rave i ta Iesu ohipa i faaue mai, no te aha eiaha ˈi tatou e riaria? (2) No te aha e ere ai teie te taime no te haamarirau, e eaha ta tatou faaotiraa papu e tia ˈi?

²⁰ Mea tamahanahana roa te mau parau hopea o ta Iesu ohipa i faaue mai: “A haamanaˈo, tei pihai iho vau ia outou i te mau mahana atoa e tae noa ˈtu i te anotau hopea o te ao nei.” (Mataio 28:20) Ua ite Iesu e e ohipa faufaa roa te reira. Ua ite atoa oia e i te tahi taime, e faatupu te raveraa i taua ohipa ra i te au ore o te feia patoi. (Luka 21:12) Aita râ e tumu e riaria ˈi tatou. Aita iho â to tatou Aratai e tiai ra ia rave tatou i taua hopoia ra ma te tauturu ore aore ra o tatou anaˈe. E ere anei i te mea tamahanahana ia ite e tei pihai iho Tei pûpûhia ˈtu “te mana atoa i te raˈi e i te fenua,” ia tatou no te turu mai i roto i te raveraa i taua ohipa faauehia ra?

²¹ Ua haapapu Iesu i ta ˈna mau pǐpǐ e ei pihai iho o ˈna ia ratou i roto i ta ratou taviniraa i te roaraa o te mau senekele e tae noa ˈtu i “te anotau hopea o teie nei ao.” E tae noa ˈtu i te hopea, e titauhia ia tamau tatou i te rave i ta Iesu ohipa i faaue mai. E ere teie te taime no te haamarirau. Te auhune rahi nei i te pae varua! Te haaputuputu-rahi-hia nei te feia aau farii. Ei pǐpǐ a te Mesia, e faaoti papu anaˈe i te rave i te ohipa faufaa roa i faauehia ia tatou e rave. E faaoti anaˈe i te horoa i to tatou taime, to tatou itoito, e ta tatou faufaa no te rave i te faaueraa a te Mesia: ‘A haere e a faariro i te taata ei pǐpǐ.’