1-3. (1) Mea fanaˈo roa te mau pǐpǐ e ratere ra e o Iesu i te aha, e ua aha Iesu ia haamanaˈo ohie ratou i ta ˈna mau haapiiraa? (2) No te aha e mea ohie ai ia haamanaˈo i te mau faahohoˈaraa maiti-maitai-hia?

 MEA fanaˈo roa te mau pǐpǐ e ratere ra e o Iesu. Na te Orometua rahi e haapii roa ˈtu ra ia ratou. Te faaroo roa ra ratou ia ˈna ia faataa i te auraa o te Parau a te Atua e ia haapii atu i te pue parau mau faahiahia. I teie nei, e titauhia ia tapea ratou i ta ˈna mau parau faufaa roa i roto i to ratou feruriraa e aau e ere â i te taime no te papai i ta ˈna mau parau. a E rave râ Iesu e ia haamanaˈo ohie ratou i ta ˈna mau haapiiraa. E nafea? Maoti ïa ta ˈna huru haapiiraa, ta ˈna faaohiparaa aravihi iho â râ i te mau faahohoˈaraa.

² Eita iho â e moˈe oioi te mau faahohoˈaraa maiti-maitai-hia. Ua tapao te hoê taata papai e “e faariro” te mau faahohoˈaraa “i te tariˈa ei mata” a nehenehe atu ai “te hohoˈa e puta mai i roto i te feruriraa o te feia e faaroo ra.” Maoti te mau hohoˈa, e taa ohie aˈe ïa ia tatou te mau manaˈo papu ore maoti te mau faahohoˈaraa. E nehenehe te mau faahohoˈaraa e faaoraora i te mau taˈo, o te horoa mai i te mau haapiiraa o te mau maitai i roto i to tatou feruriraa.

³ Aita e orometua haapii i te fenua nei i faaohipa aˈenei i te mau faahohoˈaraa ma te aravihi rahi mai ia Iesu Mesia. I teie mahana, te haamanaˈo-ohie-noa-hia ra ta ˈna mau faahohoˈaraa. No te aha Iesu i faaohipa rahi ai i teie ravea haapiiraa? Na te aha i faariro i ta ˈna mau faahohoˈaraa ei mea maiti-maitai-roa-hia?  E nafea tatou e nehenehe ai e haapii i te faaohipa i teie ravea haapiiraa?

4, 5. No te aha Iesu i faaohipa ˈi i te mau faahohoˈaraa?

⁴ Te horoa ra te Bibilia e piti tumu faufaa i faaohipa ˈi Iesu i te mau faahohoˈaraa. A tahi, no te faatupu i te parau tohu. Te taio nei tatou i roto i te Mataio 13:34, 35: “Te mau parau atoa ta Iesu i faahiti i te nahoa na roto i te mau faahohoˈaraa. Oia mau, na roto noa i te mau faahohoˈaraa e paraparau ai oia ia ratou, ia tupu hoi tei tohuhia e te peropheta: ‘E parau to ˈu vaha i te mau faahohoˈaraa.’” Te peropheta ta Mataio i faahiti, na ˈna ïa i papai i te Salamo 78:2. Ua papai taua fatu salamo ra i raro aˈe i te aratairaa a te varua moˈa o te Atua tau senekele hou to Iesu fanauraa. A hiˈo na eaha te auraa o te reira. E hanere matahiti na mua, ua faataa Iehova e e haapii te Mesia ma te mau faahohoˈaraa. Mea papu ïa e te haafaufaa ra Iehova i teie ravea haapiiraa.

⁵ A piti, ua faataa Iesu e ua faaohipa oia i te mau faahohoˈaraa no te faataa ê i te feia “ua etaetahia” te aau. (Mataio 13:10-15; Isaia 6:9, 10) E ta ˈna ïa mau faahohoˈaraa o tei faaite roa i te mau manaˈo turai o te taata? I roto i te tahi mau tupuraa, ua hinaaro oia ia ani te feia e faaroo ra ia ˈna i te tatararaa ia taa maitai ia ratou ta ˈna mau parau. O te feia haehaa tei ani, aita râ te feia teoteo aore ra tâuˈa ore. (Mataio 13:36; Mareko 4:34) Ua faaite ïa te mau faahohoˈaraa a Iesu i te parau mau i te feia ua hinaaro te aau i te reira, i te hoê â taime, ua huna ta ˈna mau faahohoˈaraa i te parau mau i te feia ua teoteo te aau.

6. Eaha te mau tapao maitai o te mau faahohoˈaraa a Iesu?

⁶ E tapao maitai ê atu to te mau faahohoˈaraa a Iesu. Ua faaara te reira i te anaanatae, a turai atu ai i te taata ia faaroo. Ua tauturu te reira ia ratou ia feruri e ia taa i te mau manaˈo fifi. Mai tei tapaohia i te omuaraa, ua tauturu te mau faahohoˈaraa a Iesu i te feia e faaroo ra ia ˈna ia haamanaˈo i ta ˈna mau parau. Te Aˈoraa i nia i te mouˈa i papaihia i roto i te Mataio 5:3–7:27, e hiˈoraa faahiahia ïa o te faaohiparaa rahi a Iesu i te mau faahohoˈaraa.  Ia au i te hoê aivanaa, e 50 tiahapa faahohoˈaraa, hiˈoraa e faaauraa i roto i taua Aˈoraa ra. No te taa i te auraa o te reira, a haamanaˈo e e nehenehe taua aˈoraa ra e taiohia i roto e 20 minuti. Oia ïa, ua faaohipa Iesu hoê faahohoˈaraa, hiˈoraa aore ra faaauraa i te mau 20 tetoni atoa! Mea maramarama maitai, ua haafaufaa Iesu i te faaohiparaa i te mau faahohoˈaraa!

7. No te aha e pee ai i ta Iesu faaohiparaa i te mau faahohoˈaraa?

⁷ Ei pǐpǐ a te Mesia, e hinaaro tatou e pee i ta ˈna huru haapiiraa, ta ˈna atoa faaohiparaa i te mau faahohoˈaraa. Mai te mau raau faanoˈanoˈa o te faariro i te hoê maa ei mea au atu â i te amu, e nehenehe te mau faahohoˈaraa maiti-maitai-hia e faariro i ta tatou haapiiraa ei mea au atu â na vetahi ê. Maoti atoa te mau faahohoˈaraa feruri-maitai-hia, mea ohie atu â ia taa i te pue parau mau faufaa. E hiˈopoa anaˈe i teie nei i te tahi mau tuhaa o tei faariro i ta Iesu mau faahohoˈaraa ei mea tano maitai. E ite ïa tatou e nafea ia faaohipa maitai i teie ravea haapiiraa faufaa.

8, 9. Mea nafea to Iesu faaohiparaa i te mau faaauraa ohie, e no te aha e mea maiti-maitai-hia ˈi te mau faaauraa ta ˈna i rave?

⁸ I roto i ta ˈna haapiiraa, ua faaohipa pinepine Iesu i te mau faaauraa ohie, tau taˈo noa tei hinaarohia. Ua puta maitai râ teie mau faaauraa ohie i roto i te feruriraa o te feia e faaroo ra ia ˈna e ua tauturu te reira ia ratou ia taa maitai i te parau mau no nia i te Atua, ta ˈna mau ture aveia e ta ˈna opuaraa. Ei hiˈoraa, i to ˈna aˈoraa i ta ˈna mau pǐpǐ eiaha e haapeapea i te mau hinaaro o te mau mahana atoa, ua faahiti oia i “te mau manu o te reva” e “te mau tiare.” Eita te mau manu e ueue e e ooti, eita atoa te tiare e hamani i te ahu. Teie râ, te haapao ra te Atua ia ratou. Mea ohie ia ite i te manaˈo, oia hoi te haapao ra te Atua i te mau manu e te mau tiare, mea papu e e haapao atoa oia i te feia e ‘tamau ra i te imi na mua i te Faatereraa arii a te Atua.’—Mataio 6:26, 28-33.

⁹ Ua faaohipa rahi atoa Iesu i te mau faataiperaa, te mau faaauraa  puai atu â. E faahiti te hoê faataiperaa i te hoê mea mai te huru ra e e ohipa ê teie. I ǒ nei â, mea ohie noa ta ˈna mau faaauraa. I te hoê taime, ua parau oia i ta ˈna mau pǐpǐ e: “O outou te maramarama o teie nei ao.” E taa oioi noa i te mau pǐpǐ te manaˈo o te faataiperaa, oia hoi na roto i ta ratou mau parau e ohipa, e faaanaana ïa ratou i te maramarama o te parau mau pae varua e e tauturu ia vetahi ê ia faahanahana i te Atua. (Mataio 5:14-16) A tapao na i te tahi atu faataiperaa ta Iesu i faaohipa: “O outou te miti papaa o te fenua” e “O vau te tumu vine, o outou te mau amaa.” (Mataio 5:13; Ioane 15:5) Mea puai tera mau faahohoˈaraa no te ohie o te reira.

10. Eaha te tahi mau hiˈoraa e faaite e nafea oe e faaohipa ˈi i te mau faahohoˈaraa ia haapii oe ia vetahi ê?

¹⁰ E nafea oe e nehenehe ai e faaohipa i te mau faahohoˈaraa ia haapii oe ia vetahi ê? Aita e faufaa ia hamani i te mau aamu roroa e te fifi roa. A tamata noa i te manaˈo i te mau faaauraa ohie. A feruri na e te aparau ra oe no nia i te tia-faahou-raa o te feia pohe e te hinaaro ra oe e faataa e e ere roa ˈtu te reira i te mea fifi no Iehova. Eaha te faaauraa e puta mai? Te faaohipa ra te Bibilia i te taotoraa ei faataiperaa i te pohe. E nehenehe oe e parau: “E nehenehe ta te Atua e faatia ohie mai i te feia pohe mai ta tatou e nehenehe e faaara i te hoê taata e taoto ra.” (Ioane 11:11-14) E hinaaro paha oe e faataa e e hinaaro te mau tamarii i te here e te aroha ia oaoa ratou. Eaha te hiˈoraa ta oe e nehenehe e rave? Te faaohipa ra te Bibilia i teie faaauraa: “Mai te mau ohi o te hoê tumu olive” te mau tamarii. (Salamo 128:3) E nehenehe oe e parau: “E hinaaro te hoê tamarii i te here e te aroha mai te hoê tumu raau e hinaaro i te hihi mahana e te pape.” Ia ohie atu â te faaauraa, e taa ohie atu â ïa te feia e faaroo ra.

11. A horoa i te tahi mau hiˈoraa e ua faahiti te mau faahohoˈaraa a Iesu i te mau mea ta ˈna i ite na a paari ai oia i Galilea.

¹¹ Mea ite roa Iesu i te faaohipa i te mau faahohoˈaraa i faaauhia i te oraraa o te taata. No roto mai e rave rahi o ta ˈna mau  faahohoˈaraa i te mau tupuraa o te mau mahana atoa ta ˈna i ite na a paari ai oia i Galilea. A feruri maa taime i to ˈna oraraa i te fenua nei i to ˈna apîraa. Ehia taime to ˈna iteraa i to ˈna metua vahine ia taviri i te huero maa, ia tuu i te hopue i roto i te faraoa ôihia, ia tuama i te mori, aore ra ia purumu i te fare? (Mataio 13:33; 24:41; Luka 15:8) Ehia taime to ˈna mataitairaa i te mau ravaai ia tuu i ta ratou upeˈa i te miti o Galilea? (Mataio 13:47) Ehia taime to ˈna iteraa i te mau tamarii ia hauti i te mahora? (Mataio 11:16) Mea papu e ua ite Iesu i te tahi atu mau mea matauhia tei faahitihia i roto i ta ˈna faahohoˈaraa e rave rahi: Te ueueraa i te huero, te mau oroa faaipoiporaa oaoa, e te mau faaapu ua paari te maa i raro aˈe i te mahana.—Mataio 13:3-8; 25:1-12; Mareko 4:26-29.

12, 13. No te aha mea faufaa ˈi to Iesu faahitiraa i te purumu “na Ierusalema mai i Ieriko” no te vauvau i to ˈna manaˈo i roto i te faahohoˈaraa o te taata Samaria?

¹² I roto i ta ˈna mau faahohoˈaraa, ua faahiti Iesu i te mau parau rii ta te feia e faaroo ra ia ˈna i ite maitai. Ei hiˈoraa, ua haamata oia i te faahohoˈaraa o te taata Samaria ma te parau e: “Te pou mai ra te hoê taata na Ierusalema mai i Ieriko, haru ihora te tahi feia eiâ ia ˈna, rave atura i ta ˈna mau mea atoa, rutu aˈera ia ˈna e reva ˈtura, a faarue mai ai ia ˈna ua fatata i te pohe.” (Luka 10:30) A tapao e no te vauvau i to ˈna manaˈo, ua faahiti Iesu i te purumu “na Ierusalema mai i Ieriko.” I to ˈna faatiaraa i teie faahohoˈaraa, tei Iudea oia, aita i atea roa ia Ierusalema, ua ite iho â ïa te feia e faaroo ra ia ˈna i taua purumu ra. Ua ite te taata e mea atâta taua purumu ra no te hoê taata iho â râ o te haere o ˈna anaˈe. E na roto atu te purumu i te mau vahi moˈemoˈe, mea rahi ïa te vahi tapuniraa no te feia eiâ.

¹³ Ua faahiti Iesu i te tahi atu mau parau rii matauhia no nia i te purumu “na Ierusalema mai i Ieriko.” Ia au i te faahohoˈaraa, te pou atoa ra te hoê tahuˈa na mua e te hoê ati Levi i muri iho na taua purumu ra, aita râ raua i tauturu i te taata ati. (Luka 10:31, 32) I haa na te mau tahuˈa i te hiero i Ierusalema, e i tauturu na te mau ati Levi ia ratou. Mea rahi te tahuˈa e te ati Levi e parahi i Ieriko aita anaˈe ta ratou e ohipa i te hiero, e 23 noa  kilometera Ieriko i te atea ia Ierusalema. E itehia ïa ratou i nia i taua purumu ra. A tapao atoa, te parau ra Iesu no te ratere, mai te mea ra e “te pou mai ra” oia, eiaha râ mai te mea ra e te pauma ra oia, “na Ierusalema mai.” Ua taa i te feia e faaroo ra ia ˈna te reira. Tei nia ˈˈe Ierusalema ia Ieriko. No reira, ia ratere te taata e “pou mai” iho â oia “na Ierusalema mai.” b Ua manaˈo maitai Iesu i te feia e faaroo ra ia ˈna.

14. Ia faaohipa tatou i te mau faahohoˈaraa, e nafea tatou e manaˈo ai i te feia e faaroo ra ia tatou?

¹⁴ Ia faaohipa tatou i te mau faahohoˈaraa, mea faufaa atoa ia manaˈo tatou i te feia e faaroo ra ia tatou. Eaha te tahi mau mea no nia i te feia e faaroo ra ia tatou e nehenehe e ohipa i nia i ta tatou maitiraa i te mau faahohoˈaraa? Te matahiti paha, te taˈere aore ra te fetii, e te ohipa. Ei hiˈoraa, te hoê faahohoˈaraa o te faahiti i te mau parau rii no nia i te  ohipa faaapu, e taahia aˈe ïa i te hoê tuhaa fenua faaapu, eiaha i te hoê oire rahi. Te oraraa e te mau ohipa i te mau mahana atoa a te feia e faaroo ra ia tatou, ta ratou mau tamarii, to ratou fare, ta ratou mau faaanaanataeraa, ta ratou maa, tera atoa te niu o te mau faahohoˈaraa e tano.

15. No te aha e ere ai i te mea maere ia ite maitai roa Iesu i te mau mea i poietehia?

¹⁵ Mea rahi o ta Iesu faahohoˈaraa e faaite ra i to ˈna ite i te ao o te natura, mai te mau raau, te mau animara, e te huru o te mahana. (Mataio 16:2, 3; Luka 12:24, 27) Nohea mai taua ite to ˈna ra? A paari ai oia i Galilea, eita e ore e mea rahi te taime oia i mataitai ai i te mau mea i poietehia. Hau atu â, o Iesu “te matahiapo o te mau mea atoa i poietehia,” e i roto i te poieteraa i te mau mea atoa, ua faaohipa Iehova ia ˈna ei “rave ohipa aravihi.” (Kolosa 1:15, 16; Maseli 8:30, 31) Mea maere anei ïa ia ite maitai roa Iesu i te mau mea i poietehia? E hiˈo mai tatou mea nafea to ˈna faaohipa-maitai-raa i taua ite ra.

16, 17. (1) Na te aha e faaite ra e ua ite maitai Iesu i te huru o te mau mamoe? (2) Eaha te hiˈoraa e faaite ra e e faaroo iho â te mau mamoe i te reo o to ratou tiai?

¹⁶ A haamanaˈo e ua faataa Iesu ia ˈna iho mai “te tiai mamoe maitai” e ta ˈna mau pǐpǐ mai “te mau mamoe.” Ia au i ta Iesu mau parau, ua ite maitai oia i te huru o te mau mamoe rata. Ua ite oia e te vai ra te hoê taamuraa taa ê i rotopu i te mau tiai e ta ratou mau mamoe. Ua tapao oia e e vaiiho noa teie mau animara taiâ ore ia arataihia ratou e e pee maite ratou i to ratou tiai. No te aha te mau mamoe e pee ai i to ratou tiai? “No te mea ua matau ratou i to ˈna reo,” ta Iesu ïa i parau. (Ioane 10:2-4, 11) Ua ite iho â anei te mau mamoe i te reo o to ratou tiai?

¹⁷ I roto i ta ˈna buka The Historical Geography of the Holy Land, ua papai o George Smith i ta ˈna iho i ite: “I te tahi taime, e taotooto matou i te avatea i pihai iho i tera mau apoo pape no Iudea i reira e toru aore ra e maha tiai mamoe e haere mai ai e ta ratou mau nǎnǎ. E anoi haere te mau nǎnǎ, e i uiui  na matou e nafea te tiai mamoe tataitahi e taa faahou ai teihea ta ˈna iho. Ia oti râ te mau mamoe i te inu i te pape e te hauti, e haere hoê hoê te mau tiai i tera e tera vahi o te peho, e e pii te tahi i ta ˈna iho pii taa ê, e e faarue iho â ta ˈna mau mamoe i te toea e haere atu ai i to ˈna iho tiai ra, e reva ˈtu ai te mau nǎnǎ mai i to ratou haereraa mai ma te nahonaho.” Aita ˈtu ravea maitai aˈe i faahohoˈa ˈi Iesu i to ˈna manaˈo, oia hoi ia farii e ia auraro tatou i ta ˈna mau haapiiraa e ia pee tatou i ta ˈna aratairaa, e nehenehe ïa tatou e aupuruhia ma te here e “te tiai mamoe maitai.”

18. Ihea tatou e ite ai i te mau haamaramaramaraa no nia i te mau mea ta Iehova i poiete?

¹⁸ E nafea tatou e nehenehe ai e haapii i te faaohipa i te mau faahohoˈaraa no roto mai i te mau mea i poietehia? E nehenehe e faahiti i te mau huru faahiahia o te mau animara i roto i te mau faaauraa ohie, mea maiti-maitai-hia râ. Ihea tatou e ite ai i te mau haamaramaramaraa no nia i te mau mea ta Iehova i poiete? Ua pue noa te ite i roto i te Bibilia no nia e rave rau animara, e i te tahi taime, e faaohipahia te mau huru o te animara  ei faahohoˈaraa. Te faahitihiti ra te Bibilia mea vitiviti ratou mai te zabi aore ra te nemera, mea haapao maitai mai te ophi ra, e mea hapa ore mai te uupa ra. c (Paraleipomeno 1, 12:8; Habakuka 1:8; Mataio 10:16) Tei roto te tahi atu mau haamaramaramaraa i Te Pare Tiairaa e te A ara mai na!, e te tahi atu mau tumu parau e video o te anairaa tumu parau “Mea poietehia anei?” i nia jw.org. E nehenehe oe e haapii rahi mai ma te hiˈo e nafea taua mau papai ra e video e faaohipa ˈi i te mau faaauraa ohie no roto mai i te mea maere e rave rahi ta Iehova i poiete.

19, 20. (1) No te faaite i te hoê haapiiraa hape, mea nafea to Iesu faaohipa-maitai-raa i te hoê ati i tupu aˈenei? (2) E nafea tatou e nehenehe ai e faaohipa i te mau hiˈoraa e te mau tupuraa mau ia haapii tatou ia vetahi ê?

¹⁹ I roto i te mau faahohoˈaraa maiti-maitai-hia, e nehenehe e rave i te mau hiˈoraa mau. I te hoê taime, ua faahiti Iesu i te hoê ati i tupu aˈenei no te faaite e mea hape te tiaturiraa e e tupu te ati i nia i te feia e tano iho â ia û ratou i te reira. Ua na ô oia e: “Tera na 18 taata tei topahia i te pare i Siloama e pohe ihora, i to outou manaˈo, ua hau aˈe anei ta ratou hara i ta to Ierusalema atoa?” (Luka 13:4) Aita hoi tera na taata 18 i pohe no te riri o te Atua no te tahi hara. Aita, ua ‘roohia râ ratou i te taime e te tupuraa manaˈo-ore-hia.’ (Koheleta 9:11) Ua patoi ïa Iesu i te hoê haapiiraa hape ma te faahiti i te hoê ohipa i tupu ta te feia e faaroo ra ia ˈna i ite maitai.

²⁰ E nafea tatou e nehenehe ai e faaohipa i te mau hiˈoraa e te mau tupuraa mau ia haapii tatou ia vetahi ê? A feruri na e te paraparau ra oe no nia i te tupuraa o te parau tohu a Iesu no nia i te tapao o te tau o to ˈna hoˈiraa mai. (Mataio 24:3-14) E nehenehe oe e faahiti i te mau parau apî no nia i te tamaˈi, te oˈe, aore ra te aueueraa fenua no te faaite i te mau tuhaa taa maitai o te tapao e tupu ra. Aore ra e hinaaro paha oe e faaohipa  i te hoê aamu no te faataa i te mau tauiraa e titauhia no te ahu mai i te huru taata apî. (Ephesia 4:20-24) Ihea oe e ite ai i tera aamu? E nehenehe oe e manaˈo i te aamu rau o te mau hoa Kerisetiano, aore ra te hoê aamu i piahia i roto i te hoê papai a te mau Ite no Iehova. E nehenehe atoa oe e ite mai i te reira i roto i te anairaa tumu parau “Ua taui te Bibilia i to ˈu oraraa” i nia jw.org.

21. Eaha te mau haamaitairaa ia riro ei orometua haapii aravihi i te Parau a te Atua?

²¹ Oia mau, o Iesu te Orometua haapii aravihi roa! Mai ta tatou i ite i roto i teie tuhaa, o ‘te haapiiraa e te pororaa i te parau apî oaoa’ ta ˈna ohipa i roto i to ˈna oraraa. (Mataio 4:23) O ta tatou atoa ïa ohipa i roto i to tatou oraraa. Mea rahi te haamaitairaa ia riro ei orometua haapii aravihi. Ia haapii tatou, te horoa ra ïa tatou na vetahi ê, e e hopoi mai te reira i te oaoa. (Ohipa 20:35) Te oaoa o te iteraa e te horoa ra tatou i te tahi mea faufaa mau e te mure ore: Te parau mau no nia ia Iehova. E ite atoa tatou i te mauruuru no ǒ mai i te iteraa e te pee ra tatou i te hiˈoraa o Iesu, te Orometua haapii rahi roa ˈˈe i haere aˈenei i nia i te fenua.