Ua horoa Iesu i to ’na ora ei tusia no te taata tia ore. (Ro 5:8) Papu maitai te oaoa ra tatou taitahi inaha ua faaite mai Iesu i to ’na here ma te horoa i to ’na ora no tatou. Tera râ, a mairi ai te tau, e titauhia ia haamana‘o e ua pohe atoa te Mesia no to tatou taeae. E nafea ia faaite i te here Kerisetiano i to tatou mau taeae e tuahine, e mau taata tia ore hoi mai ia tatou? A hi‘opoa teie na ravea e toru. A tahi, e nehenehe tatou e faahoa atoa i te feia e ere hoê â huru oraraa e to tatou. (Ro 15:7; Ko2 6:12, 13) A piti, e vai ara tatou ia ore e parau aore ra e rave i te hoê ohipa o te faahuru ê ia vetahi ê. (Ro 14:13-15) I te pae hopea, mai te peu e hara te tahi ia tatou, e oioi tatou i te faaore atu i te hapa. (Lu 17:3, 4; 23:34) A tutava ’i i te pee i to Iesu hi‘oraa i na tuhaa e toru, e ite te amuiraa i te hau e te auhoêraa ei tapao o te haamaitai-tamau-raa a Iehova.

A MATAITAI NA I TE VIDEO IA MAITAI ATU Â TO HURU FERURIRAA E A PAHONO NA I TO MURI NEI MAU UIRAA:

• I te omuaraa, eaha to Miki mana‘o no nia i ta ’na amuiraa?

• No te aha oia i taui ai i to ’na mana‘o?

• E nafea to Iesu hi‘oraa i tauturu ai ia Miki ia faatano i to ’na huru feruriraa? (Mk 14:38)

• E nafea te Maseli 19:11 e tauturu ai ia tatou ia hi‘o i to tatou mau hoa Kerisetiano ma te au mau?