NO TE AHA E MEA FAUFAA ’I? E mea tia ia tiaoro te taata i te i‘oa o Iehova ia faaorahia ratou. (Ro 10:13, 14) Tera râ, eita pauroa te taata tei farii i te haapii i te Bibilia e hinaaro e ora ia au i te mau ture aveia a Iehova. E faaohipa maitai tatou i to tatou taime i roto i te taviniraa ma te tauturu i te feia o te hinaaro iho â e rave i te mau tauiraa no te faaoaoa ia Iehova. Mai te peu aita te piahi Bibilia e haere ra i mua i muri a‘e i te hoê taime tano, e faaotiraa î i te paari ia faaea i ta ’na haapiiraa e ia faaohipa i to tatou taime no te feia ta Iehova e faafatata mai ia ’na e i ta ’na faanahonahoraa. (Ioa 6:44) Papu maitai, mai te peu e taui te taata e e faaite oia e “aau farii [to ’na] i te ora mure ore,” e faatere faahou tatou i ta ’na haapiiraa Bibilia.—Ohi 13:48.

NAFEA ÏA?

• A haapopou i te piahi no to ’na hinaaro e ite i te parau mau.—Ti1 2:4

• A haapapu e mea faufaa ia faaohipa i ta ’na e haapii mai.—Lu 6:46-49

• Ma te mǎrû, a faaohipa i ta Iesu faahoho‘araa no nia i te taata tei ueue i te huero e a ani atu eaha te nehenehe e tapea ia ’na ia faaohipa i ta ’na e haapii mai ra.—Mt 13:18-23

• Ma te tura, a faataa ’tu no te aha e faaea oe i ta ’na haapiiraa

• A faaite ia ’na e taniuniu oe aore ra e haere mai oe e farerei ia ’na i te tahi mau taime no te faaitoito ia ’na. A faaite atoa ’tu e e nehenehe te haapiiraa e faatere-faahou-hia mai te peu e rave oia i te mau tauiraa

A MATAITAI NA I TE VIDEO E A PAHONO NA I TO MURI NEI MAU UIRAA:

• Eaha ta oe i haapii mai i teie aparauraa e faaite ra aita te piahi e haere ra i mua i te pae varua?

• E nafea te taata poro i tauturu ai i te piahi ia taa e titauhia ia ’na ia rave i te mau tauiraa?

• E nafea te taata poro i faaite ai e faatere faahou oia i ta ’na haapiiraa ia ineine te piahi?