Ia mataitai oe i te hoê tiare e rave rau û, te ra‘i e rave rahi fetia aore ra te hoê taheraa pape puai mau, te haapii mai ra anei oe no nia i te Atua poiete? Te faaite papu nei te mau poieteraa i to Iehova mau huru maitatai e ore e ite-mata-hia. (Ro 1:20) A rave ai i te taime no te feruri i nia i ta to tatou mata e ite ra, e taa maitai ia tatou i to te Atua puai, here, paari e parau-tia, oia atoa i to ’na huru horoa noa.—Sal 104:24.

Eaha te tahi mau ohipa ta Iehova i poiete e ta oe e haapao i te mau mahana atoa? Noa ’tu te ora ra oe i te oire, e ite paha oe i te mau manu aore ra tumu raau. Ma te haapao maitai i ta Iehova i poiete, e nehenehe te ahoaho e iti mai, e tiatonu noa tatou i nia i te mau mea faufaa a‘e e e puai mai to tatou tiaturiraa e nehenehe iho â Iehova e aupuru ia tatou e a muri noa ’tu. (Mt 6:25-32) E tamarii anei ta oe? A tauturu ia ratou ia taa maitai i to Iehova mau huru maitatai faahiahia mau. A rahi mai ai to tatou mauruuru no tera mau poieteraa, e faafatata ’tu â tatou i te Atua poiete.—Sal 8:3, 4.

A MATAITAI NA I TE VIDEO TE FAAITE RA TE MAU MEA FAAHIAHIA I POIETEHIA I TE HANAHANA O TE ATUA: TE MARAMARAMA E TE MAU Û, E A PAHONO NA I TO MURI NEI MAU UIRAA:

• E nafea tatou e ite ai i te mau û?

• Eaha te faatupu i te anaana o te mau û?

• No te aha tatou e ite ai i te mau û e rave rau i te ra‘i?

• Eaha te mau û faahiahia mau ta oe i ite a mataitai ai i te mau poieteraa i pihai iho i to oe fare?

• No te aha e mea maitai ia rave i te taime no te mataitai i te natura?