Te hoê hoa, o “te hoê ïa taata tei ati maite i te tahi atu ma te here aore ra te manaˈo faatura.” Ei hiˈoraa, ua ati maite Ionatana ia Davida i muri aˈe i to ˈna haapoheraa ia Golia. (Sa1 18:1) Ua haafaufaa raua i to raua auhoaraa ma te faatupu i te mau huru maitatai. No te fanaˈo râ i te hoê auhoaraa piri, e titauhia ia matau maitai tatou i te hoê taata. E titauhia ïa te taime e te mau tutavaraa. Area i nia i te reni faahoaraa, hoê noa taumiraa i nia i te pitopito e ua noaa to oe hoa. E nehenehe te feia e faaohipa ra i te natirara e tuu i ta ratou e hinaaro no nia ia ratou e e maiti eaha ta vetahi ê e nehenehe e ite no nia ia ratou. Mea ohie ïa no ratou ia huna o vai mau ratou. No reira, mea maitai ia feruri maite o vai ta tatou e farii ei hoa. Eiaha e taiâ i te ore e farii ei hoa te mau taata ta tatou e ore e matau ra. No te ape i te mau tupuraa atâta, e faaoti vetahi i te ore roa ˈtu e faaohipa i te mau reni faahoaraa. Ia maiti râ tatou i te faaohipa i te reira, eaha te tia ia tatou ia haamanaˈo?

A MATAITAI I TE VIDEO TE FAAHOARAA I NIA I TE INTERNET, A ARA! E A PAHONO I TEIE MAU UIRAA:

• Eaha ta oe e feruri hou a tuu ai i te hoê hohoˈa aore ra te hoê manaˈo i nia i te natirara?

• No te aha mea titauhia ia maiti maitai i te hoa i nia i te natirara?

• No te aha mea tia ia taotia i te taime ta oe e faaohipa ra i nia i te mau reni faahoaraa?—Eph 5:15, 16