I roto i te taviniraa, te faaohipa nei tatou e maha video no te haapiiraa Bibilia. Eaha te fa o taua mau video ra?

• Ua faaineinehia te video No te aha e haapii ai i te Bibilia? (Taatoaraa o te video) ia anaanatae te taata i te haapii i te Bibilia, noa ˈtu eaha te mea ta ratou e tiaturi ra. Te faaitoito ra teie video i te taata ia imi i te pahonoraa o ta ratou mau uiraa e te mau haamaramaramaraa tano i roto i te Bibilia. Te faataa atoa ra te video e nafea ia fanaˈo i te hoê haapiiraa Bibilia.

• No te aha e haapii ai i te Bibilia? (video haapotohia). Hoê â video teie, ua haapotohia râ te reira. E tano tera video ia farerei tatou i te taata aita e taime to ratou no te tauaparau.

• Ua faaineinehia te video Eaha te ravehia i te hoê haapiiraa Bibilia? no te huti i te ara-maite-raa o te taata i nia i te faanahoraa o te hoê haapiiraa Bibilia tamoni ore. E pahono atoa teie video i te mau uiraa ta vetahi e uiui ra no nia i te tereraa o te haapiiraa Bibilia e e nafea ia fanaˈo i te reira.

• E faaite tatou i te video Farii-popou-hia oe no ta oe haapiiraa Bibilia i te mau piahi Bibilia. Noa ˈtu ua faahitihia teie video i te api piti o te buka Ia ora oe e a muri noa ˈtu!, e faaite atoa tatou i te reira no te buka rairai Ia ora oe e a muri noa ˈtu! Te faataa ra te video eaha te mau tumu parau e hiˈopoahia i roto i te buka e eaha ta te piahi e ite mai i te roaraa o te haapiiraa.

Noa ˈtu e fa taa maitai to te video tataitahi, e faaite e e hapono tatou i te reira i te taime tano. Te faaitoitohia ra te feia poro atoa ia haamatau e ia faaohipa maitai i teie mau video i roto i te taviniraa.