I teie mahana, pinepine te mau ati natura i te tupu. Mea faufaa ïa ia faanaho maitai i te tauturu hinaarohia. No reira, ua faanaho te Tino aratai ia haamauhia te hoê Tuhaa o te tauturu i tei ati i roto i te mau amaa atoa.

Ia tupu te hoê ati, e taniuniu oioi te mau taeae o teie Tuhaa i te mau matahiapo o taua fenua ra no te ite eaha te tauturu e hinaarohia. Mai te peu mea rahi te ohipa e titauhia ia rave, e maiti te amaa i te tahi mau taeae aravihi no te haapao i te ohipa. E nehenehe teie mau taeae e ani i te rima tauturu e te tahi mau taihaa taa maitai. E nehenehe atoa ratou e hoo mai i tei hinaarohia i taua fenua ra a opere atu ai i te reira i tei roohia i te ati.

Mea faufaa iho â ia rave i teie mau faanahoraa no te mea ia nahonaho maitai te ohipa tauturu, eita ïa e tataipitihia te haamâuˈaraa, eita atoa te ohipa e ravehia ma te feruri ore. Inaha hoi, tera te tupu ia rave te mau taeae i te ohipa na roto i to ratou manaˈo.

Na te mau taeae maitihia e te amaa te hopoia e faaoti ehia moni e ehia rima tauturu te hinaarohia. E nehenehe atoa ratou e ohipa amui e te mau tia mana no te hapono i ta tatou mau taihaa. Eiaha ïa tatou e rave i te tahi faanahoraa mai te haaputuraa i te taihaa tauturu a hapono atu ai i te reira. Eiaha atoa e haere i taua fenua ra i reira te ati i te tupuraa aita anaˈe ratou i tono ia outou.

Papu ia tupu te ati, e hinaaro tatou e tauturu atu. (Heb 13:16) Mea here na tatou i to tatou mau taeae. Eaha ïa ta tatou e nehenehe e rave? Te mea faufaa roa ˈˈe, o te pureraa ïa no tei roohia i te ati e no te mau taeae e ohipa ra ei rima tauturu. E nehenehe atoa tatou e pûpû i te tahi mau ô no te turu i te taviniraa na te ao nei. I raro aˈe i te aratairaa a te Tino aratai, o te mau amaa tei ite maitai aˈe e nafea ia faaohipa i ta tatou mau ô ma te tano. Ia hinaaro noa ˈtu tatou e apiti atu, e nehenehe tatou e faaî i te api parau Demande d’admission comme volontaire Local Développement/Construction (DC-50-F).

A MATAITAI I TE VIDEO PAPE PUE I BERESILIA NO TE ÛA RAHI E A PAHONO I TEIE MAU UIRAA:

Eaha ta outou e faahiahia ra no nia i te tauturu ta te mau Ite no Iehova i hopoi i muri aˈe i te pape pue i Beresilia no te ûa rahi i 2020?