A feruri na e te ora ra oe i Galilea i te tau o Iesu. Ua tere oe i Ierusalema no te Oroa patiaraa tiahapa. Ua î te oire i te mau hoa haamori no te mau oire atea roa. Te hinaaro nei oe e pûpû i te hoê ô na Iehova. E haamata ïa oe i tera tere e ta oe puaaniho, na roto i te mau aroâ î i te taata no te tapae atu i te hiero. I to oe tapaeraa, mea rahi te taata i te hiero o te hinaaro atoa ra e pûpû i te ô na Iehova. Na oe i teie nei e horoa i ta oe puaaniho i te mau tahu‘a. I tera taime, te haamana‘o ra oe e ua inoino to oe taeae ia oe. Tei rotopu paha o ’na i te nahoa aore ra tei rapaeau o ’na i te oire. Te faataa ra o Iesu eaha te titauhia ra ia rave oe. (A taio i te Mataio 5:24.) E nafea oe e to oe taeae e tapi ai i te parahi hau noa, mai ta Iesu i parau? I pihai iho i te mau mana‘o i raro, a tuu i te hoê tapao no te faaite i te pahonoraa tano.

E TITAUHIA IA OE IA . . .

• paraparau i to oe taeae mai te peu noa no oe, e tumu tano to ’na no te inoino ia oe

• tamata i te faaafaro i to oe taeae huru feruriraa mai te peu no oe, mea riri hanoa o ’na aore ra ua hape atoa o ’na

• faaroo ma te mǎrû a paraparau ai to oe taeae. Noa ’tu aita oe e taa maitai ra ia ’na, a ani i te tatarahapa ma te aau tae no to ’na mauiui aore ra no te mau faahopearaa mana‘o-ore-hia o ta oe mau ohipa

E TITAUHIA I TO OE TAEAE IA . . .

• faatia haere eaha te hape ta oe i rave ia turu vetahi o te amuiraa ia ’na

• faahapa ia oe, ia haamana‘o i te mau ohipa iti atoa tei tupu e ia turai ia oe ia farii e na oe te hape

• farii e ua titauhia ia oe i te haehaa e te itoito no te paraparau ia ’na e ia faaore i te hapa ma te aau tae

Noa ’tu aita tatou e pûpû faahou i te mau animara ei tusia, eaha ta Iesu i haapii atu no nia i te taairaa i rotopu i te imiraa i te hau e to tatou taeae e te haamoriraa fariihia e te Atua?