Mai Tenuare 2018, e itehia te mau hi‘oraa no te aparauraa i te api matamua o te api parau Faaineineraa no te putuputuraa Oraraa e taviniraa Kerisetiano. E nafea ia faaohipa i te reira?

E vauvauraa ana‘e ta tatou. E titauhia ia faaohipa i te uiraa, te irava Bibilia e te uiraa no to muri iho farereiraa, itehia i roto i te hi‘oraa no te aparauraa. E ere râ te auraa e e faahiti te piahi i te mau ta‘o atoa o te video. E faaohipa paha oe i te tahi atu tupuraa, te tahi atu omuaraa parau aore ra te tahi atu mana‘o o te haaferuri, e te vai ra ’tu â. E nehenehe atoa oe e pûpû i te tahi papai o ta tatou mauhaa no te taviniraa, noa ’tu aita i faahitihia te reira i roto i te mau faaueraa.

I roto i te pororaa. Te fa o te mau hi‘oraa no te aparauraa, o te horoaraa ïa i te mau mana‘o tauturu. Te anaanatae mau ra anei te hoê taata a hinaaro atu ai e ite atu â? E tamau ïa paha oe i te aparauraa ma te faaohipa i te mau mana‘o o te farerei-faahou-raa. E nehenehe oe e faatano i te hi‘oraa no te aparauraa aore ra e taui roa. I roto i te mau hi‘oraa no te aparauraa o te mau ava‘e na mua ’tu, te vai ra anei hoê tumu parau aore ra irava Bibilia mea anaanatae a‘e na te mau taata o te tuhaa fenua? Te vai ra anei hoê tupuraa aore ra parau apî mea anaanatae a‘e na te mau taata o ta oe tuhaa fenua? E rave rau huru faaohiparaa i te mau hi‘oraa no te aparauraa. Ta oe râ fa, o te raveraa ïa i te mau mea atoa no te parau apî oaoa e no te poro i taua parau ra ia vetahi ê.—Ko1 9:22, 23.