I te avaˈe Tetepa, e tutava ˈtu â tatou i te pûpû i te mau haapiiraa Bibilia, ma te faaohipa i te buka rairai Ia ora oe e a muri noa ˈtu! E nehenehe te mau taata poro e rave i te taviniraa pionie tauturu e 30 hora. Eaha ïa ta tatou e rave no te apiti atu i teie pororaa taa ê?

• I te farereiraa matamua: A faaohipa i te api hopea o te buka rairai no te faaara i te anaanatae o te taata e a faaite atu i te tereraa o te hoê haapiiraa. Mai te peu e anaanatae te taata, eiaha e moˈehia ia hoˈi atu e farerei ia ratou. Noa ˈtu aita ratou i farii i te haapiiraa na mua ˈtu, e anaanatae paha ratou i te rave i te haapiiraa i nia i teie buka rairai apî. Eiaha e vaiiho atu aore ra e hapono atu i teie buka rairai i te feia o te ore e anaanatae ra. I te roaraa o te avaˈe, e nehenehe te Tomite tiaauraa a te amuiraa e faanaho i te tahi atu putuputuraa no te pororaa.

• I te tahi atu taime: Mai te peu te faaohipa ra ta outou amuiraa i te vairaa papai afaifai, e nehenehe outou e pûpû atu i te buka rairai Ia ora oe e a muri noa ˈtu! maoti teie ravea. A faaite atu i te taata e anaanatae ra e e nehenehe ratou e fanaˈo i te hoê haapiiraa Bibilia tamoni ore i nia i teie buka rairai. A faataa poto atu i te tereraa o te hoê haapiiraa aore ra a faanaho atu no te hoˈi e farerei i taua taata ra. E faanaho paha te tiaau no te taviniraa i te tahi feia poro aravihi no te haere e poro i te mau vahi tapihooraa. E nehenehe atoa outou e pûpû atu i te hoê haapiiraa Bibilia i to outou mau hoa ohipa aore ra i te feia ta outou e farerei a poro ai ma te faanaho-ore-hia.

Ua faaue mai Iesu ia haere e faariro i te taata ei pǐpǐ e ia haapii atu ia ratou. (Mt 28:19, 20) Ia nehenehe teie pororaa taa ê e tauturu ia tatou ia haapao i teie faaueraa ma te faaohipa i te buka rairai Ia ora oe e a muri noa ˈtu!