NO NA METUA
6: Aˈoraa
EAHA TE AURAA?
Te auraa e horoa i te aˈoraa, o te aratairaa ïa aore ra te haapiiraa ˈtu. I te tahi taime, e aˈohia te tamarii haerea ino. Te mea pinepine aˈe râ, o te haapiiraa ïa i te tamarii eaha te mea maitai e te mea ino ia nehenehe oia e rave i te mau faaotiraa maitai.
NO TE AHA MEA FAUFAA?
I te mau matahiti i mairi aˈenei i roto i te utuafare, fatata roa aita te mau tamarii e aˈohia ra, ua mǎtaˈu hoi te mau metua aˈunei te tamarii e haafaufaa ore ai ia ˈna iho. Tera râ, e haamau te mau metua feruriraa paari i te tahi mau faatureraa au noa e e haapii ratou i ta ratou mau tamarii ia haapao i te reira.
“Mea faufaa ia haamau i te faatureraa no te tamarii ia riro mai ratou ei taata feruriraa paari. Aita anaˈe e aˈoraa, e au te tamarii i te poti aita e taere, e painu i te hopea a taahuri roa ˈtu ai.”—Pamela.
EAHA TE NEHENEHE E RAVE?
A parau, a faaohipa ˈtu ai. Aita anaˈe ta oe tamarii e haapao i te mau faatureraa, a aˈo atu. Area ia haapao oia i te reira, a haapopou atu.
“Pinepine au i te haapopou i ta ˈu mau tamarii no to ratou auraro i roto i te hoê ao mea varavara te auraro. Ia haapopouhia ratou, mea ohie atura no ratou ia farii i te aˈoraa ia hinaarohia.”—Christine.
ARATAIRAA BIBILIA: “Ta te taata hoi e ueue ra, o ta ˈna atoa ïa e ooti.”—Galatia 6:7.
A faatano i te aˈoraa. A faatano i te aˈoraa ia au i te faito matahiti e te faito ite o ta oe tamarii. E maramarama aˈe oia ia tuati te utua i te hape ta ˈna i rave. Ei hiˈoraa, ua faaohipa hape anaˈe oia i ta ˈna niuniu paraparau, eiaha ïa o ˈna e faaohipa faahou i te reira no te hoê taime faataahia. Tera râ, eiaha e faarahi mai te peu ua haraooo rii oe.
“E feruri au e ua auraro ore anei ta ˈu tamarii ma te opua aore ra ua hape oia. Mea taa ê roa te huru ino te tia ia iriti ê, te hape o te tia ia faatitiaifaro.”—Wendell.
ARATAIRAA BIBILIA: “Eiaha e faariri i ta outou mau tamarii, a toaruaru roa ˈtu ai ratou.”—Kolosa 3:21.
A faaite i te here. Mea ohie aˈe no te tamarii ia farii i te aˈoraa e ia haapao i te reira ua ite anaˈe ratou e na te here i turai i to ratou metua ia aˈo mai.
“Ua hape anaˈe ta mâua tamaiti, e faaite mâua ia ˈna e ua faahiahia mâua i te mau faaotiraa maitai ta ˈna i rave aˈenei. E faataa mâua ia ˈna e ia farii oia i te aˈoraa, eita to ˈna roo e ino, e tei reira mâua no te tauturu ia ˈna.”—Daniel.
ARATAIRAA BIBILIA: “E faaoromai e e hamani maitai te here.”—Korinetia 1, 13:4.
E au atoa outou . . .
TE PARE TIAIRAA
E nafea ia aˈo i ta oe tamarii?
Te faaite ra te Bibilia e toru manaˈo faufaa no te aˈo maitai.
A ARA MAI NA!
Teihea ˈtura te aˈo a te metua i teie mahana?
Ua taui anei te huru o te mau metua i teie mahana no tei tupu mai 1960?
A ARA MAI NA!
E nafea ia aˈo i to tamarii?
Te aˈoraa, te haapiiraa ˈtu ïa. E tauturu atu te mau faaueraa Bibilia ia haapii te tamarii ia auraro eiaha râ ia orure hau atu.
