Te faaoreraa i te hara, o te faaoromairaa ïa i te hapa e te inoino ta te reira i faatupu. E ere râ i te auraa te haafaufaa ore ra oe i te hape aore ra te haamoˈe ra i te reira mai te huru ra aita i tupu.

ARATAIRAA BIBILIA: “A faaoromai noa i te tahi e te tahi, e ia hapa noa mai te tahi ia oe, a faaore noa ˈtu ïa i ta ˈna hapa.”—Kolosa 3:13.

“Ia here oe i te hoê taata, eita noa oe e hiˈo i to ˈna vahi paruparu, e hiˈo râ i te taata ta ˈna e tamata ra i te riro mai.”—Aaron.

Ia tapea oe i te ino, e ahoaho oe e e ino to oe ea, e ino atoa to oe faaipoiporaa.

“I te hoê taime, ua tatarahapa mai ta ˈu tane faaipoipo no te hoê ohipa ua mauiui roa vau. Mea fifi no ˈu ia faaore i ta ˈna hara. Ua faaore râ vau, e te tatarahapa nei e aita vau i faaore oioi i ta ˈna hara. Ua faatupu te reira i te inoino faufaa ore i roto i to mâua faaipoiporaa.”—Julia.

A TAMATA

Ia mauiui faahou oe no te tahi parau aore ra ohipa a to oe hoa, a ui ia oe iho:

• ‘E ere anei o vau teie faarahi nei?’

• ‘E hara rahi anei e titau ai au ia tatarahapa mai oia aore ra e nehenehe noa vau e faaoromai?’

A APARAU I TO OUTOU HOA FAAIPOIPO

• Eita anei mâua e faaore oioi i to te tahi e te tahi hara?

• E nafea mâua e nehenehe ai e faaore oioi i te hara?

MANAˈO TAUTURU

• Ia hapa mai to oe hoa, eiaha e parau e manaˈo ino to ˈna.

• A imi i te tumu e faaore ai oe i te hara a to oe hoa, a haamanaˈo ai “e hapa hoi tatou paatoa e rave rahi taime.”—Iakobo 3:2.

“Mea ohie ia faaore i te hara mai te peu no mâua e piti te hape, mea fifi aˈe râ mai te peu no te tahi atu. E faaite oe i te haehaa mau ia farii i te tatarahapa e ia faaore i te hara.”—Kimberly.

ARATAIRAA BIBILIA: “Ia ru oe i te faaafaro i to oe fifi.”—Mataio 5:25.