NO NA HOA FAAIPOIPO
3: Faatura
EAHA TE AURAA?
Noa ˈtu e tupu te fifi, mea aupuru na hoa faaipoipo o te faatura te tahi i te tahi. “Eita raua e faaea noa i nia i to raua manaˈo,” te parau ra te hoê buka no nia i te faaipoiporaa. “Tera râ, e tauaparau raua no nia i te fifi. Ma te faatura, e faaroo raua i to te tahi e te tahi manaˈo a rave atu ai i te faaotiraa e mauruuru ai raua e piti.”
ARATAIRAA BIBILIA: “Eita [te here] e imi i to ˈna iho maitai.”—Korinetia 1, 13:4, 5.
“E faatura vau i ta ˈu vahine ma te haafaufaa ia ˈna e ma te ore e rave i te tahi ohipa e mauiui ai oia e e fifi ai to mâua faaipoiporaa.”—Micah.
NO TE AHA MEA FAUFAA?
Mai te peu aita te faatura, e ô mai i roto i te aparauraa o na hoa faaipoipo te faainoraa, te faaoooraa e te vahavaharaa atoa. Ia au i te mau aivanaa, tera iho â te tupu hou na hoa faaipoipo e taa ˈi.
“Mai te peu e faaino vau, e faahiti i te auraa parau e parau hauti no te faaino i ta ˈu vahine faaipoipo, eita oia e tiaturi faahou ia ˈna iho e ia ˈu, e ino ïa to mâua faaipoiporaa.”—Brian.
EAHA TE NEHENEHE E RAVE?
A TAMATA
A hiˈopoa i ta oe e parau e e rave i roto hoê hebedoma, e a uiui ia oe iho:
-
‘Mea pinepine anei au i te faaino i to ˈu hoa faaipoipo, aore ra mea pinepine au i te haapopou ia ˈna?’
-
‘E nafea mau â vau e faaite ai e faatura vau i to ˈu hoa faaipoipo?’
A APARAU I TO OUTOU HOA FAAIPOIPO
-
Eaha ta to ˈu hoa faaipoipo e parau e e rave e ite ai au e faatura mai oia ia ˈu?
-
Eaha ta to ˈu hoa faaipoipo e parau e e rave e ite ai au eita oia e faatura mai ia ˈu?
MANAˈO TAUTURU
-
A papai e toru ravea e hinaaro ai oe ia faaturahia mai. A parau i to oe hoa faaipoipo ia na reira atoa. Ia faaite orua te tahi i te tahi i ta orua i papai, e ia tutava i te faatura te tahi i te tahi mai ta orua i papai.
-
A papai i te mau huru maitatai o to oe hoa faaipoipo. A faaite atu i to oe hoa te mau huru maitatai ta oe e faahiahia ra ia ˈna.
“Mea faatura na ˈu ta ˈu tane faaipoipo ia faaite au na roto i te ohipa e mea faufaa na ˈu o ˈna e e hinaaro vau ia oaoa o ˈna. Eita e titauhia te ohipa rahi, e nehenehe râ tau ohipa rii e faaite e te faatura mau ra vau ia ˈna.”—Megan.
I te pae hopea, e ere i te mea faufaa ia manaˈo oe e mea faatura oe, tera râ te manaˈo ra anei to oe hoa e te faatura ra oe ia ˈna.
ARATAIRAA BIBILIA: “Ia ahu mai outou i te here rahi, te aumihi, te hamani maitai, te haehaa, te mǎrû e te faaoromai.”—Kolosa 3:12.
