Ia imi oe eaha te tauturu atu ia tamǎrû i te mauiui no te mea ua pohe tei herehia, mea rahi paha te manaˈo e horoahia ˈtu. Mai tei faahitihia râ i te omuaraa o teie tumu parau, mea taa ê ta te tahi e te tahi huru otoraa. No reira, e nehenehe te hoê aˈoraa e tano no te tahi, area no te tahi atu, eita ïa.

Te vai nei râ te mau aˈoraa papu e tano i te rahiraa. Pinepine te reira i te horoahia e te mau taata e tauturu ra i te feia e oto ra. No roto mai tera mau aˈoraa i te hoê buka tahito î i te paari, oia hoi te Bibilia.

• No vetahi feia hiˈopoa, tera te tauturu faufaa roa ˈˈe no te hoê taata e oto ra i tei pohe. I te tahi râ taime, e hinaaro paha oe e faaea o oe anaˈe e e riri atoa paha i te feia e tamata ra i te tauturu ia oe. Mea pinepine te reira i te tupu.

• Eiaha e manaˈo e titauhia ia faaea noa te taata i pihai iho ia oe, eiaha atoa râ oe e faaatea ê mai ia ratou. Peneiaˈe, e hinaaro oe i ta ratou tauturu i te mau mahana i mua nei. No reira ma te mǎrû, a faaite atu eaha ta oe e hinaaro, aore ra e ore e hinaaro, i teie nei.

• Ia au i to oe tupuraa, a faataa i te taime no te amuimui atu i te taata, e te taime no te faaea noa o oe anaˈe.

AˈORAA: “Mea maitai aˈe e piti i hoê noa . . . Ia topa hoi hoê, e nehenehe ta te tahi e tauturu i to ˈna hoa ia tia mai.”—Koheleta 4:9, 10.

• Ia haapao maitai oe i ta oe maa, e nehenehe te reira e tauturu i to oe tino ia faaruru i te hepohepo e tupu mai i muri aˈe i te poheraa o tei herehia. A tamata i te amu e rave rau maa hotu, maa tupu e te tahi atu mau maa o te ore e haamaraa i to oe kilo i nia.

• A inu faarahi i te pape, e i te tahi atu mau pape maitatai no te tino.

• Mai te peu eita oe e hinaaro e tamaa, a amuamu maa vahi iti maa e rave rahi taime i te roaraa o te mahana. E nehenehe atoa oe e ani i te taote ia horoa mai i te tahi mea no te faaitoito i to oe tino. a

• E nehenehe te haere-vitiviti-raa, e te tahi atu mau ravea faaetaetaraa tino e tauturu ia faatupu i te hoê huru feruriraa maitai aˈe. E nehenehe te faaetaetaraa tino e riro ei taime no te feruri i to oe oraraa, aore ra ei taime no te taui i to oe feruriraa.

AˈORAA: “Aita hoi e taata i hae aˈenei i to ˈna iho tino, e faatamaa râ e e aupuru oia i te reira.”—Ephesia 5:29.

• Mea faufaa no te taata atoa ia taoto maitai. Hau roa ˈtu râ, i te taime e pohe ai tei herehia, e rohirohi hoi te noaa mai ia oto noa.

• Eiaha e inu faarahi te taofe, te ti, te ava aore ra te tahi atu mau mea o te haafifi i to oe taotoraa.

AˈORAA: “Mea au aˈe hoê apu rima î i te faafaaearaa i e piti apu rima î i te ohipa rohirohi e te aˈuaˈuraa mataˈi.”—Koheleta 4:6.

• A farii mea taa ê te huru otoraa a te taata atoa, na oe iho ïa e maiti eaha te mea maitai aˈe no oe.

• Te tahi ravea o tei tauturu i te rahiraa o te feia e oto ra, o te faataaraa ïa to ratou mauiui ia vetahi ê. Area te tahi atu, eita ïa ratou e na reira. Ua rau te manaˈo o te feia hiˈopoa no nia i te haamahoraraa i te aau ia pohe tei herehia. Mai te peu te taiâ ra oe i te na reira, a haamata ma te faahiti poto noa i te mea e vai ra i roto i to oe aau i te hoê hoa piri.

• Ua mâmâ te aau o vetahi i to ratou taˈiraa i te taata herehia tei pohe. Area no te tahi atu, aita i titauhia ia taˈi rahi roa ratou.

AˈORAA: “Ua ite te aau i to ˈna hepohepo.”—Maseli 14:10.

• Ua tamata vetahi feia e oto ra i te tamǎrû i to ratou mauiui na roto i te ava aore ra te raau taero. Te manaˈo ra ratou e faaore te reira i te mauiui, e tamǎrûraa poto noa râ to te reira, e faahopearaa ino anaˈe to muri mai. A maiti ïa i te tahi atu ravea tamǎrûraa o te ore e tuino i to oe feruriraa e aau.

AˈORAA: “E tamâ anaˈe ia tatou iho i te mau viivii atoa.”—Korinetia 2, 7:1.

• No te ore e oto noa, ua maiti e rave rahi i te rave i te hoê ohipa o te tauturu atu ia taui i to ratou feruriraa.

• Ua tamǎrûhia vetahi ma te faahoa i te taata apî, ma te amuimui i te mau hoa, ma te haapii i te rave i te hoê ohipa apî, aore ra ma te faaanaanatae e o vetahi ê.

• A mairi ai te tau, e taui to oe tupuraa e to oe mau hinaaro. E tapao paha oe ua iti mai te taime otoraa, e ua rahi atu â te taime no te tahi atu mau ohipa. Mea maitai roa, e tapao faaite ïa te ore mǎrû noa ˈtu ra to oe mauiui.

AˈORAA: “E taime faataahia to te mau mea atoa . . . E taime no te taˈi e e taime no te ata. E taime no te auê e e taime no te ori.”—Koheleta 3:1, 4.

• Ia au i to oe tupuraa, a tamata i te rave faahou i te mau ohipa ta oe i matau na i te rave.

• Ia tamau oe i te faataa i te taime no te taoto, no te ohipa e no te tahi atu mau tapura ohipa, mea ohie aˈe no oe ia haere i mua i roto i to oe oraraa.

• Ia rahi noa ta oe ohipa maitatai, e tauturu te reira ia oe ia tamǎrû i to oe mauiui.

AˈORAA: “Eita oia e ite maitai i te mau mahana o to ˈna oraraa ia mairi, no te mea e faaoaoa noa te Atua mau i to ˈna aau.”—Koheleta 5:20.

• E rave rahi tei tatarahapa i te mau faaotiraa ru ta ratou i rave i muri noa mai i te poheraa o tei herehia.

• Mai te peu e nehenehe, a rave i te taime au no te feruri hou a taui ai i te nohoraa, te ohipa, aore ra hou a horoa ˈi i te mau taihaa a tei pohe.

AˈORAA: “E manuïa iho â te mau opuaraa a te taata itoito, e vevehia râ te taata atoa e ru noa.”—Maseli 21:5.

• Ua faaruru maitai aˈe e rave rahi i to ratou oto a rave ai ratou i te mau ohipa o te haamanaˈo atu i te taata herehia tei pohe.

• E nehenehe oe e tamǎrûhia na roto i te haaputuraa i te mau hohoˈa aore ra na roto i te papairaa i te mau tupuraa e aamu ta oe e hinaaro e haamanaˈo.

• A faaherehere i te mau taoˈa o te haamanaˈo atu i te mau taime oaoa, e ua ineine anaˈe oe, a rave mai i te reira.

AˈORAA: “A haamanaˈo i te mau mahana i tahito ra.”—Deuteronomi 32:7.

• A feruri e rave i te tahi mau mahana faafaaearaa.

• Mai te peu eita e nehenehe, e tia paha ia oe ia rave hoê aore ra e piti mahana no te mataitai haere i te natura, no te haere i te pae tatahi aore ra no te tere haere na nia i te pereoo.

• E nehenehe te mauiui e mǎrû rii mai ia rave oe i te tahi ohipa taa ê, eiaha mai ta oe i matau i te rave i te mau mahana atoa.

AˈORAA: “Mai, haere anaˈe i te hoê vahi moˈemoˈe e faafaaea rii.”—Mareko 6:31.

• Te mau taime atoa e tauturu ai oe ia vetahi ê, te tauturu atoa ra oe ia oe iho, e maitai mai hoi oe.

• E haamata paha oe ma te tauturu i te feia e oto atoa ra i te hoê taata herehia tei pohe. E hoa paha aore ra e fetii o te hinaaro ra i te hoê taata o te taa i to ˈna tupuraa.

• Ia turu e ia tamahanahana oe ia vetahi ê, e hopoi mai te reira i te oaoa e te mauruuru no te mea ua nehenehe oe e tauturu.

AˈORAA: “E rahi aˈe te oaoa ia horoa ˈtu ia horoahia mai.”—Ohipa 20:35.

• No te mea ua faaruru oe i tera huru tupuraa, ua taa maitai atura ia oe eaha te mea faufaa roa ˈˈe.

• A feruri i ta oe e rave nei i roto i to oe oraraa.

• Ia titauhia, a rave i te mau tauiraa no te tuu i te mau mea faufaa roa ˈˈe i te parahiraa matamua.

AˈORAA: “Mea au aˈe e haere i te fare otoraa i te haere i te fare tamaaraa, o te hopearaa hoi tera o te taata atoa, e ia feruri maitai te taata ora i te reira i roto i to ˈna aau.”—Koheleta 7:2.

 Eita iho â te mauiui e ore roa, tera râ, e rave rahi tei oto i te taata herehia tei pohe tei tamahanahanahia i to ratou peeraa i te mau aˈoraa mai tei faahitihia i roto i teie tumu parau. Aita te mau mea atoa o te tamǎrû i te mauiui i tuu-pauroa-hia i roto i teie tapura. Ia tamata râ oe i te pee i te tahi o tera mau aˈoraa, e nehenehe te reira e hopoi mai i te tamahanahanaraa.