Ia au i te Bibilia

Eaha te auraa o te tane te upoo?

I TE fenua e rave rahi, e peu matauhia ia euhe na hoa faaipoipo te tahi i te tahi, e euhe te vahine faaipoipo e auraro i ta ˈna tane. Tera râ, mea rahi te vahine e maˈeˈe i te parau o te tane te upoo. A hiˈo na i ta te Bibilia e haapii ra no nia i tera parau. E ite mai oe e mea tano te haapiiraa.

Te tiaraa upoo haamauhia e te Atua

Ua faataahia eaha te tiaraa upoo i roto i te Ephesia 5:22-24: “Ia auraro te mau vahine faaipoipo i ta ratou iho tane mai ta ratou e auraro i te Fatu, o te tane faaipoipo hoi te upoo o ta ˈna vahine, mai te Mesia atoa, o te upoo ïa o te amuiraa . . . Oia mau, mai ta te amuiraa e auraro i te Mesia, ia na reira atoa te mau vahine faaipoipo i te auraro noa i ta ratou iho tane e tia ˈi.” Ei “upoo o ta ˈna vahine,” na te tane e aratai i te utuafare. E pee te vahine faaipoipo i ta ˈna aratairaa, a auraro atu ai i to ˈna tiaraa upoo.—Ephesia 5:33.

E faaohipa te tane i to ˈna tiaraa upoo i roto noa i te mau otia o to ˈna auraro i te Atua e te Mesia. Aita to ˈna e tiaraa e faahepo i ta ˈna vahine ia ofati i te mau ture a te Atua aore ra ia ore e faaroo i to ˈna manaˈo haava haapiihia e te Bibilia. Ua faanaho te Atua e na ˈna e rave i te mau faaotiraa faufaa no te utuafare, i roto noa râ i taua mau otia ra.—Roma 7:2; Korinetia 1, 11:3.

Te faaue ra te Bibilia i te tane ia faaohipa i to ˈna tiaraa upoo ma te haapao na mua i te maitai o ta ˈna vahine. Te na ô ra te Ephesia 5:25: “Outou te mau tane faaipoipo, a here noa i ta outou iho vahine, mai te Mesia atoa i here i te amuiraa e i horoa i to ˈna ora no te amuiraa.” Te hoê tane o te pee i te hiˈoraa hau ê o te here o te Mesia, eita ïa e haapao noa ia ˈna.

Inaha, te faaue ra te Bibilia i te tane ia parahi e ta ˈna vahine “ma te taa i to [ˈna] huru.” (Petero 1, 3:7) Oia hoi ia taa ia ˈna te mau hinaaro mau o ta ˈna vahine, eiaha noa râ mea taa ê raua ei tane e vahine e to raua huru aau.

“E hoa hoi o ˈna no oe”

Te auraa anei aita ta te vahine e parau ia auraro o ˈna i ta ˈna tane? A hiˈo na ia Sara, ta te Bibilia e faahiti ra ei hiˈoraa no to ˈna auraro ia Aberahama. (Petero 1, 3:5, 6) Mea auraro o ˈna i ta ˈna tane i roto i te mau faaotiraa rahi, mai te faarueraa i to ˈna oraraa fanaˈo no te ora i roto i te fare ie, e te mau faaotiraa haihai mai te faaineineraa i te maa i tera iho â taime. (Genese 12:5-9; 18:6) No nia râ i te hoê fifi, ua faaite o ˈna i to ˈna manaˈo e ere hoê â e to Aberahama. Ua hinaaro hoi oia ia tiahi Aberahama ia Hagara ta ˈna tavini vahine e ia Isemaela ta ˈna tamaiti matahiapo. Aita te Atua i faahapa ia Sara, ua parau râ oia ia Aberahama ia “faaroo i to ˈna reo.” I muri iho, a auraro noa ˈi i ta ˈna tane, ua tiai Sara e na Aberahama iho â e tiahi ia Hagara raua Isemaela.—Genese 21:8-14.

Te faaite ra te hiˈoraa o Sara e “hoa” te vahine no ta ˈna tane, e parahiraa tura ïa to ˈna. (Malaki 2:14) E apiti oia i roto i te tahi mau faaotiraa e hopoia no nia i te utuafare. Na ˈna e haapao e rave rahi ohipa i te fare e i te pae moni. Parau mau, ei upoo utuafare, na te tane e rave i te mau faaotiraa hopea.—Maseli 31:10-31; Timoteo 1, 5:14.

Faatura i te Tumu o te faaipoiporaa

Na te Atua ra o Iehova i poiete i te tane e te vahine, e ua haamau oia i te faaipoiporaa no te taati ia raua. E faanahoraa moˈa te reira. (Genese 2:18-24) Ua faataa maitai atoa oia i ta raua hopoia ei tane e ei vahine faaipoipo ia oaoa roa hoi raua.—Deuteronomi 24:5; Maseli 5:18.

Ei Tumu o te faaipoiporaa, e tiaraa e e mana to Iehova e haamau i te mau ture aveia no taua faanahoraa ra. E haamaitai e e turu oia i te mau hoa faaipoipo o te haapao i ta ratou iho hopoia e o te faatura i te tiaraa upoo ta ˈna i haamau, eiaha noa no te mea e mea tano, no to ratou râ auraro i to ˈna tiaraa Atua.

EAHA TO OE MANAˈO?

◼ O vai tei horoa i te hiˈoraa tia roa no nia i te tiaraa upoo?—Ephesia 5:25.

◼ Ua taotia anei te Atua i te tiaraa upoo o te tane?—Korinetia 1, 11:3.

◼ Eaha te tumu o te faaipoiporaa e o te tiaraa upoo?—Maseli 5:18.

[Hohoˈa]

E oaoa na hoa faaipoipo ia faaohipahia te tiaraa upoo ia au i te hiˈoraa o te Mesia