A imi i te tauturu

“E nehenehe ta te tahi e haavî hoê noa taata, e mau maitai râ e piti taata i mua ia ˈna.”—Koheleta 4:12.

NO REIRA a ani i te tauturu a to oe utuafare e to oe mau hoa aore ra i te tahi atu taata tei nehenehe mau e tauturu ia oe e i te faaoromai atoa, ia hinaaro oe e faaea i te puhipuhi i te avaava.

A imi te feia tei faaea i teie peu, e nehenehe ratou e taa maitai ia oe e i te tauturu atoa. Te parau ra Torben te hoê Kerisetiano, no Danemata: “Ua faufaahia vau i te tauturu o vetahi.” Te papai ra Abraham, tei ora ra i Initia: “Ua tauturu te here mau ta to ˈu utuafare e te mau taeae e tuahine i faaite mai ia faaea vau i te avaava.” Te tahi râ mau taime, aita e navai te tauturu a te utuafare e a te mau hoa.

Te parau ra te hoê tane o Bhagwandas te iˈoa: “E 27 matahiti to ˈu puhipuhiraa i te avaava, no te mea râ ua haapii au eaha ta te Bibilia e parau ra no nia i te mau peu viivii, ua faaoti au i te faaea. Ua tamata vau i te faaiti mai. Ua taui au i to ˈu mau hoa. Ua haere atoa vau e hiˈo i te taote aita râ i manuïa. I te hoê râ po, ua pure au ia Iehova te Atua, ua taparuparu vau ia ˈna ia tauturu mai ia ˈu. I reira iho, ua manuïa mai au!”

Mea faufaa ia faaineine ia fa mai te mau haafifiraa. Eaha te reira? Ta te tumu parau i muri nei e faataa mai.

 [Parau iti faaôhia ô]

E FAAOHIPA ANEI OE TEIE MAU RAAU?

E imiraa faufaa rahi te mau raau o te tauturu ra i te feia puhipuhi i te avaava ia faaea i te reira, mai te nicotine. Hau oe a faaoti ai i te faaohipa i te mau raau, a hiˈo i te mau uiraa i muri nei:

Eaha te mau haamaitairaa? E rave rahi rapaauraa tei manuïa ma te faaiti mai i te hinaaro e puhipuhi i te avaava, tera râ, te vai ra te aimârôraa no nia te manuïaraa i te roaraa o te tau.

Eaha te mau haafifiraa? E faatupu te tahi mau raau i te hinaaro e pihae, te hepohepo, e te hinaaro e haapohe. A haamanaˈo atoa i te mau rapaauraa ua monohia te nicotine, tera râ, te vai noa ra te nicotine e te mau haafifiraa no te ea. Te mea papu, te taata o te faaohipa ra i te reira e vai noa ïa teie peu maha ore.

Eaha te mau ravea taa ê e vai nei? I roto i te hoê titorotororaa, 88 i nia i te hanere taata tei faaea i te avaava, tei parau e ua faaea ratou i te avaava ma te ore e rave i te mau raau.